Tabıǵatta tylsym syry ashylmaǵan qupııa az emes. Alystan at shaldyryp kelgen týrıster Zerendi aımaǵyndaǵy Aıdahar úńgirinde bolǵan sátterinde tań-tamasha qalady. Biletinderdiń aıtýyna qaraǵanda, osy jerge tabany tıgen, úńgirge jaqyndaǵan adamnyń boıyna qısapsyz kúsh-qýat quıylady eken. Kıeli jerge jetý úshin taý asyp, tas basyp, áldeneshe shaqyrym joǵary órleýiń kerek. Biraq bir ǵajaby tabıǵattyń tilin, naqtyraq aıtsaq, kúıin tyńdaý. Sol úshin de keletinder az emes.
Jergilikti turǵyndar bul jerdi qasıetti sanaıdy. Adam aǵzasynyń tazarýy úshin óte paıdaly eken. Ásirese júıke aýrýymen aýyratyn adamdar kóp keledi. Bálkim tumsa tabıǵattyń tynyshtyq qushaǵyndaǵy jan júregińdi áldıleıtin, býsanta balqytatyn ereksheliginen be eken.
Úńgirdiń kirer aýzy onshalyqty úlken emes. Al ishki búıin ispettes bóligi at shaptyrym keń. Keıingige jetken ańyz boıynsha jaıdan-jaı qasıetti sanalmaǵan. Este joq eski kezeńde osy úńgirde aýyryp-syrqaǵandy emdeıtin emshi ómir súripti. Aldyna kelgen syrqat dertinen pyshaqpen sylyp alǵandaı aıyǵady eken. Biraq jetý qıyn. Sonda da pendege densaýlyq qymbat. Tabanyn tasqa tozdyryp, emshiniń qabiletine senip kelgenderdiń saǵy synǵandary joq desedi. Kúnderdiń bir kúninde ǵajaıyp qabiletke ıe emshi qartaıyp, ómirden ótken soń onyń boıyndaǵy shıpaly qýaty osy jerde bógip qalǵan. О́zi bolmaǵanymen, kózindeı tylsym kúsh áli kúnge deıin adamdarǵa sharapatyn tıgizýde.
Qazaq jerinde kıeli jerlerdiń az emestigi belgili. Qupııasy da jumbaq. Sondaı támam jurtty tańǵaldyratyn kıeli jerdiń biri osy – Aıdahar úńgiri.
Aqmola oblysy,
Zerendi aýdany