Úkimet kitap oqý mádenıetin damytý jáne zerdeli ult qalyptastyrý jónindegi keshendi jospardy iske asyrýǵa kiristi. Premer-mınıstrdiń orynbasary – Mádenıet jáne aqparat mınıstri Aıda Balaevanyń tóraǵalyǵymen Prezıdenttiń «Kitap oqý mádenıetin damytý jáne zerdeli ult qalyptastyrý jónindegi sharalar týraly» Jarlyǵyn iske asyrý máselelerine arnalǵan keńes ótti.
Jıynǵa Oqý-aǵartý mınıstri Juldyz Súleımenova, sondaı-aq Mádenıet jáne aqparat, Ulttyq ekonomıka, Jasandy ıntellekt jáne sıfrlyq damý, Ǵylym jáne joǵary bilim, Qorǵanys, Ishki ister mınıstrlikteriniń ókilderi qatysty.
Keńes barysynda qatysýshylardyń baıandamalary tyńdaldy. Mádenıet jáne aqparat vıse-mınıstri Rýstam Álı keshendi jospardyń negizgi baǵyttaryn tanystyrdy. Qujat kitaphana isin damytý, oqý mádenıetin ilgeriletý jáne zamanaýı sıfrlyq ınfraqurylym qalyptastyrý sharalaryn qamtıdy.
Keshendi jospar 9 negizgi baǵyttan turyp, 50-ge jýyq is-sharany kózdeıdi. Olardyń qatarynda kitap salasyn quqyqtyq turǵydan jetildirý máselesi de bar.
Vedomstvo málimetinshe, búginde elde 3 887 kópshilik kitaphana jumys isteıdi. Olardyń jalpy kitap qory 72,5 mıllıonnan asady. 2025 jyly kitaphanalarǵa kelýshiler sany 57 mıllıonnan asyp, rekordtyq kórsetkishke jetti.
Bıyl 4 kitaphana jańǵyrtylyp, 6 jańa kitaphana ashyldy. Jyl sońyna deıin taǵy 24 kitaphanany jańǵyrtý josparlanǵan.
Aıda Balaeva kitaphanalar qyzmetine jan-jaqty taldaý júrgizýdi tapsyrdy. Taldaý barysynda ınfraqurylymnyń jaı-kúıi, kitap qorymen qamtamasyz etilý deńgeıi jáne oqyrman suranysy eskerilýge tıis. Nátıjesinde, ásirese balalar men jastar ádebıeti boıynsha tapshylyqtardy anyqtap, kitaphana qoryn tolyqtyrýǵa qatysty naqty usynystar ázirleý qajet.
Balalar men jastar arasynda oqý mádenıetin damytý baǵytyndaǵy jumystar týraly Oqý-aǵartý mınıstri Juldyz Súleımenova baıandady. Mınıstrlik oqýshylardyń kórkem ádebıetke qoljetimdiligin arttyrý maqsatynda «Balalar kitaphanasy» jáne «Oqyrman» platformalaryn iske qosty.
Sonymen qatar bilim uıymdarynda oqyrman klýbtarynyń jumysyn damytý kózdelgen. Osy negizde «Kitap oqıtyn mektep» biryńǵaı modeli engizilip, «Birge oqıyq» jobasy júzege asyrylmaq. Joba aıasynda ata-analar men pedagogterdiń úlgisi arqyly balalardyń kitap oqýǵa qyzyǵýshylyǵyn arttyrý josparlanǵan.
Ǵylym jáne joǵary bilim vıse-mınıstri Gúlzat Kóbenova stýdent jastar arasynda kitap oqý mádenıetin damytý baǵytyndaǵy jumystardy tanystyrdy. Bul rette joǵary oqý oryndarynyń kitaphanalaryn jańǵyrtý jáne stýdenttik oqyrman klýbtarynyń jumysyn jandandyrý máselelerine basymdyq berilmek.
Keńes qorytyndysynda Ǵylym jáne joǵary bilim mınıstrligine salalyq ádebıettermen qamtamasyz etý deńgeıine taldaý júrgizý jáne pedagog kadrlardy daıarlaýda qoldanylatyn oqý materıaldarynyń mazmunyn zerdeleý tapsyryldy.
Sondaı-aq Qorǵanys jáne Ishki ister mınıstrlikterine qarasty uıymdardyń kitaphana qorlaryna taldaý júrgizý mindeti júkteldi. Áskerı bólimder men vedomstvolyq mekemelerdi zamanaýı ári mazmundy ádebıettermen qamtamasyz etý qajettigi atap ótildi. Taldaý nátıjeleri boıynsha kitaphana qorlaryn jańartý jáne tolyqtyrý jóninde naqty usynystar ázirlenbek.