Úkimet otyrysynda Ekologııa jáne tabıǵı resýrstar mınıstri elimizdegi ekotýrızmdi damytýdyń negizgi kórsetkishteri men aldaǵy josparlaryn tanystyrdy, dep habarlaıdy Egemen.kz.
Mınıstrdiń aıtýynsha, ekotýrızmdi damytý – vedomstvo jumysynyń eń mańyzdy baǵyttarynyń biri. Sońǵy jyldary elimizdiń tabıǵı aýmaqtaryna kelýshiler sany aıtarlyqtaı artqan.
«Eger 2024 jyly erekshe qorǵalatyn tabıǵı aýmaqtarǵa 2,8 mln adam kelse, 2025 jyly bul kórsetkish 3,7 mln adamdy qurady. О́sim shamamen 900 myń kelýshige jetti», dedi vedomstvo basshysy.
Mınıstrdiń aıtýynsha, bul kórsetkishter halyqtyń tabıǵat aıasyndaǵy demalysty, jaıaý marshrýttar men etnotýrızmdi jıi tańdaı bastaǵanyn aıǵaqtaıdy. Búginde ulttyq parkter aýmaǵynda 179 týrıstik marshrýt pen 42 ekologııalyq soqpaq jumys istep tur.
Salany damytý maqsatynda zańnamaǵa da mańyzdy ózgerister engizilgen.
«Atalǵan aýmaqtardyń jerlerin týrıstik obektilerge ınjenerlik ınfraqurylymdy jobalaý, salý jáne qyzmet kórsetý úshin, olardy bosalqy jerlerge aýystyrmaı, berýge múmkindik beretin norma 2025 jylǵy 26 maýsymnan bastap qoldanysqa engizildi», dedi E. Nysanbaev.
Sondaı-aq bıylǵy jyldyń aqpan aıynda ýchaskelerdi uzaq merzimdi paıdalanýǵa berýdiń úlgilik sharty bekitilip, barlyq 13 ulttyq park boıynsha ekotýrızmdi damytý tujyrymdamalary ázirlengen.
Sıfrlandyrý jáne «Taza týrızm» baǵdarlamasyMınıstrdiń aıtýynsha, jumystyń ashyqtyǵyn arttyrý maqsatynda salany sıfrlandyrý sharalary belsendi júrip jatyr. Qazir 6 ulttyq parkte 14 baqylaý-ótkizý pýnkti avtomattandyrylsa, aǵymdaǵy jyly taǵy 11 pýnkt boıynsha jumystar jalǵasyp otyr. Buǵan qosa, barlyq ulttyq parkter bank servısteri arqyly onlaın tólem júıesine qosylyp, saıttarǵa arnaıy QR kodtar ornalastyrylǵan.
Memleket basshysynyń «Taza Qazaqstan» bastamasy aıasynda «Jasyl Damý» AQ-men birlesip «Taza týrızm» baǵdarlamasy qolǵa alyndy.
«Onyń maqsaty – kelýshilerde tabıǵatqa uqypty qaraý jáne qaldyqtarmen durys jumys isteý mádenıetin qalyptastyrý», dedi mınıstr.
Mınıstrdiń aıtýynsha, Sharyn jáne Kólsaı kólderindegi sátti pılottyq jobadan keıin bul baǵdarlama Ile-Alataý, Altyn-Emel, Qarqaraly, Saıram-О́gem, Kókshetaý, Baıanaýyl jáne Býrabaı parkterine keńeıtilgen. Baǵdarlama aıasynda konteınerler, qoqys jáshikteri, aqparattyq bannerler men fandomattar ornatylyp, kelýshilerge bıoydyraıtyn paketter taratylyp jatyr. Bıyl bul jumystar Qaton-Qaraǵaı, Buırataý, Ulytaý, Jońǵar-Alataý jáne Tarbaǵataı parkterinde jalǵasyn tabady.
Ekotýrızmge aıryqsha kózqaras
О́ńirlerdegi ınfraqurylymdyq jobalarMınıstrdiń aıtýynsha, jergilikti ákimdiktermen birlesip birneshe iri ınfraqurylymdyq nysandar iske asyrylyp jatyr:
Shyǵys Qazaqstan oblysy: Qaton-Qaraǵaı ulttyq parkindegi Darby ózeni arqyly ótetin kópir jóndeldi. «Staro-Avstrııskaıa» jolynyń 45 shaqyrymdyq bóliginiń 32,1 shaqyrymyna aǵymdaǵy jóndeý júrgizý úshin jyl saıyn 200 mln teńgege shart jasaldy.
Soltústik Qazaqstan oblysy: Imantaý-Shalqar kýrorttyq aýmaǵyna aparatyn 17,5 km avtojol rekonstrýksııalandy. «Kókshetaý» parkinde jaıaý júrginshiler men velosıped joldaryn salý josparlanyp otyr.
Almaty oblysy: Kólsaı kóliniń jaǵalaý jelisi 130 mln teńgege abattandyryldy. Saty aýylynan Qaıyńdy kóline deıingi 12 km avtojoldyń qurylysy júrip jatyr.
Investısııalyq jobalar portfeli jáne ózekti máselelerMınıstrdiń aıtýynsha, Almaty ulttyq parkter tobynyń tabysty tájirıbesi negizinde 10 óńirde iske asyrylatyn 23 basym ınvestısııalyq jobadan turatyn portfel qalyptasqan. Jalpy aýmaǵy 108,6 gektardy quraıtyn bul jobalarǵa tartylatyn jeke ınvestısııa kólemi 31,6 mlrd teńgege baǵalanyp otyr.
«Jobalar sapaly týrıstik ınfraqurylymdy: marshrýttar men ekosoqpaqtardy, vızıt-ortalyqtardy, eko-qonaqúılerdi, glempıngterdi, kempıngterdi, qazaq aýyldaryn jáne karavanıng oryndaryn qurýǵa baǵyttalǵan», dedi mınıstr.
Iri jobalardyń qatarynda Túrkistan oblysy Saıram-О́gem ulttyq parkindegi Qasqasý (5 mlrd teńge) jáne Saıramsý (4 mlrd teńge) shatqaldarynda eko-qonaqúıler salý, Aqmola oblysy Zerendi men Shalqar kólderinde 8 mlrd teńgege 5 jobany iske asyrý, sondaı-aq Qaton-Qaraǵaıda 4 nysannan turatyn klasterdi iske qosý josparlanǵan. Mınıstrdiń aıtýynsha, bul jobalar sátti júzege asqan jaǵdaıda kelýshiler aǵyny táýligine 3 500 adamǵa deıin artady.
«23 jobanyń 8-i boıynsha ákimdikterde joldar men elektr berý jelilerin tartýǵa qarajat joq», dedi mınıstr
Investorlar daıyn bolǵanymen, bazalyq ınfraqurylymnyń joqtyǵy jumysty qıyndatyp otyr. Bul másele ásirese «Buırataý», «Qaton-Qaraǵaı» jáne «Kókshetaý» ulttyq parkterinde qatty baıqalady.
Jıyndy qorytyndylaı kele, mınıstr bul baǵyttaǵy jumystardy jandandyrý úshin Úkimet basshysynyń birinshi orynbasary Nurlybek Nálibaevtyń tóraǵalyǵymen arnaıy kóshpeli is-sharalar uıymdastyrý josparlanǵanyn jetkizdi.
Ile Alataýy ulttyq parkinde ekotýrızm áleýeti artyp keledi