08 Jeltoqsan, 2017

Astana men Almaty arasynda «222»-niń azaby bar

189 retkórsetildi

Kóliginiń dońǵalaǵy taqtaıdaı asfalt jolǵa túskende kóńiliniń dom­byrasy kúı oınap qoıa beretin júr­gizýshiniń jaıyn kim uǵar, shirkin?! Bul jumyr basty pendeńiz jyl­damdyqqa nege sonsha qumar boldy eken?! At jalyn ustap jelmen ja­rys­qan ata-babadan juqqan, qanǵa siń­gen qasıet-aý, paı-paı... 

Keńestik joldyń azabyn keremetteı tartqan urpaq keıde aınalaǵa bir kóz tastap, búgingi kúnge myń táýbe aıtady. 90-jyldardaǵy Almatynyń Tólebı (Komsomol) kóshesiniń bir qıyrynan ekinshi qıyryna júrip ótken avtomobıl ıesi ne dońǵalaqtyń maıysqan dıskisin túzep, ne jarylǵan shınasyn jamap, jabyrqaıtynyn umytty búgin, senesiz be?! Túske deıin Tarazǵa, asyǵyp shyqsaq keshke deıin Astanaǵa jetemiz. Joldyń jaqsy bolǵany!.. Tań bozyndaǵy Almatynyń keptelisine urynbaı shyqqan jeńil kólikti jolaý­shy jazdygúni shildede, tipti jolaı Balqashtyń tunyǵyna bir súńgip alyp, qas-qaraıa Astanaǵa jetip jyǵylady. Tamasha emes pe!? Átteń... ıá, osy arada aıtpasqa bolmas bir «gáp» bar-dy! 

Astanany betke alyp, kúre jolǵa qalqyp túsken jolaýshynyń Almatydan 100 shaqyrym uzap shyqpaı-aq «kóńil-kúıi» nildeı buzylady. Oǵan sebep Kúrtiden bastalatyn «ózimizdiń» ke­ńestik jol. Kúnniń qyzýynan shodyraıyp shyǵyp, yzǵarynan tasemen bop qatqan asfalt tómpeshikter oıdym-oıdym shuńqyrlarǵa jalǵasady. Zymyranmen jarysqan jyldamdyq áp-sátte kózden bul-bul ushady. En­di osy shoqalaqpen 222 shaqyrym júrýge májbúrsiz! «Itshilep» Býryl­baıtalǵa jetip, dańǵylǵa qaıta tú­sesiz. Árıne, «aman» ótseńiz, álgi jol azaby tús kórgendeı bop qalady. Shirkin, qaıta oralǵan jyldamdyq! Astanadan qaıtqanda da osy oqıǵa... Myń shaqyrymdy artqa tastap Býryl­baıtalǵa tumsyq tiregende zańmen bekitilgen jyldamdyqty saǵatyna 30 shaqyrymǵa deıin tejeısiz. Kóligińizdi aıaǵannan ǵana, altyn ýaqytty sarp etip, kónesiz! Sodan Kúrtige jetip, negizgi magıstralǵa ilikkende, alda – Almaty, álgi kúızelistiń bári qaıtadan umytylady... Almaty men Astana ara­lyǵyndaǵy 222 shaqyrymnyń ádeıi oılastyrylmaǵan bar sıqyrly syry sonda! Bárin de bastan keshken kýáger retinde jaýapkershilikpen mynany málimdeımin: kúre jol sono-oý 2001, 2003 jyldary kúrdeli jóndeýden ótken. Resmı rastalǵan málimet boıynsha, 1213 shaqyrym sol kezde zamanǵa laıyqtap jóndelgen. Biraq, qas qylǵandaı, aralyqtaǵy 222 shaqyrym umyt qalǵan. Ol jaǵy osy kúnge deıin beımálim! Izdeýshi-suraýshysy bolmaǵan?! Bıylǵy jazda almatylyq «zardap shegýshi» bıznesmen Beıbit Álibekov «222» týraly áleýmettik jelidegi «Menińshe, mundaı dáý shuńqyrlar Almatynyń kárizderinde de kezdespeıdi» dep kúıinip jazdy. 15 jyldyq jol azabynyń eń zor teńeýi osy boldy-aý deımin!

Memlekettik «Nurly jol» baǵ­darlamasy boıynsha taıaýda elimiz boıynsha jalpy uzyndyǵy 4,4 myń kılometrlik 22 avtomobıl joly jobasy júzege aspaq. Ol týraly Investısııalar jáne damý mınıstri Jeńis Qasymbek habarlady. Tańdanbańyz. Bul ekonomıkasy qaryshtaǵan Qazaqstannyń kólik-logıstıkalyq sharttarynyń bir bólshegi ǵana. Alaıda, áńgime tikeleı avtomobıl joldaryna qatysty bol­ǵandyqtan mınıstr sózi qoǵamdyq barlyq kólik paıdalanýshylar salasyn – qalaaralyq avtobýs júrgizýshiler men inDriver taksı jelisindegi eshbir deldalsyz servıstik qyzmet kórsetetin júrgizýshilerdi, Astana men Almaty arasyndaǵy belgili osynaý qashyqtyqta san ret jol azabyn tartqan jekemenshik kólik ıelerin eleń etkizdi. Eleń etkizgeni mınıstrdiń jospardaǵy shaqyrymdary emes, «Ońtústik-Ortalyq jobasy Býrylbaıtal men Kúrti arasyndaǵy 228 shaqyrym paıdalanýǵa beriledi. Oǵan Dúnıejúzilik jáne Eýropalyq bank qarjy bóledi» degen sózi edi. Ár shaqyrymyn umytpaı jadymyzda ustaǵan esep boıynsha bul aralyq 222 shaqyrym edi, mınıstrlik jol aıaldamalary men burylys-qıylystaryn esepke qosqan shyǵar dep túıdik. Eń bastysy, jyry kóp «222», áıteýir, nazarǵa ilinipti! 

...Kóliginiń dońǵalaǵy taqtaıdaı tegis beton jolǵa túskende kóńiliniń dombyrasy kúı oınap qoıa beretin júr­gizýshiniń jaıyn kim uǵar, shirkin?! Baıqadyńyzdar ma, bul joly «asfalt» sózin «betonmen» almastyrdyq. Endigi áńgime «Batys Qytaı – Batys Eýropa» magıstrali týraly. Almaty – Taraz aralyǵyndaǵy Qordaı asýy men áridegi Kúıik asýynyń oı-qyratyna betonyńyz tıimsiz bop shyqty. Ásirese, qystyń kúni. Ekinshi tarmaǵynyń qurylysy aıaqtalyp bitpegen atalmysh kólik magıstralinde beton ústine qazir shaqtap-shaqtap asfalt tóselýde. Nege? Jaýaby – kelesi jolǵy baǵanda...

Talǵat SÚIINBAI,
«Egemen Qazaqstan»
 

Banner
Sońǵy jańalyqtar

Taldyqorǵanda 5 myń aǵash otyrǵyzyldy

Aımaqtar • 12 Qazan, 2019

Keı óńirlerde aýa-raıy ózgeredi

Aımaqtar • 12 Qazan, 2019

Eń qysqa áńgime. Iesiz zyndan. Dıdar AMANTAI

Rýhanııat • 12 Qazan, 2019

Eń qysqa áńgime. Islam Qabyluly

Rýhanııat • 12 Qazan, 2019

Senatorlar senbilikke shyqty

Qazaqstan • 12 Qazan, 2019

Berdibek Saparbaev Aqtaý emhanalaryn aralady

Medısına • 11 Qazan, 2019

NZM IýNESKO syıaqysyna laıyq dep tanyldy

Qazaqstan • 11 Qazan, 2019

Oralda «LATYN FEST» jastar forýmy ótti

Aımaqtar • 11 Qazan, 2019

Uqsas jańalyqtar