Elimizge belgili sazger, pedagog, qoǵam qaıratkeri, kásibı uıǵyr mýzykasynyń negizin qalaýshy – Quddys Qojamııarulynyń qazaq óneri men mádenıetiniń órkendep, damýyna qosqan úlesi zor. Shyǵarmashylyǵyn Qazaq radıosynyń kórkemdik jetekshisi, Qurmanǵazy atyndaǵy Almaty konservatorııasynyń rektory ári professory, Kompozıtorlar odaǵynyń tóraǵasy syndy jaýapty qyzmettermen qatar órgen qaıratker tulǵanyń otandyq mýzykanttardyń birtutas dáýirin tárbıelep shyqqan ustazdyq joly da ózindik ulaǵatymen taǵylymdy.
– Taýlar alystaǵan saıyn bıikteıdi. Osy bir ulaǵatty sóz bizdiń uly ustazymyz – Quddys Qojamııarulyna qaratylyp aıtylǵandaı. Árıne ózińniń súıikti professoryńdy, ustazyńdy kúnde kórip, sát saıyn tildesip júrgende qadirin de, baǵasyn da óz deńgeıinde túsinbeýiń múmkin. Pedagogtik qyzmette de, shyǵarmashylyq pen basshylyq jumystarda da úlken qaıratkerlik, tulǵalyq minez tanytyp, qazaq óneri men mádenıeti úshin qanshalyqty qyrýar jumys atqaryp ketkenin endi túsinip jatqandaımyz. Ol kisi bizdiń boıymyzǵa sheber mýzykant bolýmen qatar, jaqsy adam bolý taǵylymyn da qosa sińirdi. Áli oń-solymyzdy tanymaǵan, danalyǵynan shalalyǵy basym bir-bir úıdiń tentegin tárbıelep, ónerge ǵashyq ete bildi. Sol meıiriminiń, ustazdyq ulaǵatynyń arqasynda biz mýzykany pir tutyp eseıdik, jetildik. Búginde jasaǵan ár jumysymyz ben jetken jetistigimiz kezinde balasynbaı, bizge úlken senim arta bilgen ustazymyzdyń, súıikti professorymyzdyń arqasy dep bilemin. Quddys Qojamııaruly shákirt tárbıelep, óziniń esimin mýzyka áleminde óshpesteı etip qashap ketti. Áli de jyldarǵa jyldar jalǵasyp, talaı ǵasyr alǵa jyljyr. Biraq ólmeıtin óner men esimin óshirmeıtin shákirtteri barda ustazymyzdyń qaıratkerlik joly máńgilik jasaı beretinine senemin», – dep Qazaqstan Kompozıtorlar odaǵynyń tóraıymy, Quddys Qojamııarovtyń shákirti, belgili kompozıtor Balnur Qydyrbek ustazǵa degen saǵynyshqa toly lebizin tolqyp turyp jetkizdi.
О́ner ıesiniń tól shákirtteri men qazaq mýzyka óneriniń talantty tulǵalary qatysqan eske alý keshinde alǵash ret Quddys Qojamııarovtyń týyndylary – Ishekti aspaptar orkestrine arnalǵan mýzyka mı mınor, Vıolonchelge arnalǵan konsert (jaryq kórmegen shyǵarmalar), «Bý Ahsham» áni (B.Qydyrbektiń óńdeýi), «Nazýgým» operasynan Nazýgým arııasy (kameralyq orkestrge arnalǵan H.Setekovtiń óńdeýi) oryndaldy. Sondaı-aq B.Qydyrbektiń «Qalqaman-Mamyr» operasynan Qalqaman arııasy, H.Setekovtiń «Skerso» goboı men orkestrge arnalǵan konsertiniń birinshi bólimi, S.Ábdinurovtyń «Báıdibek» syndy týyndylary tyńdarman nazaryna usynyldy. Mereıtoılyq konsertte opera trýppasynyń solısi, Qazaqstannyń eńbek sińirgen qaıratkeri Bıbigúl Januzaq (soprano), sımfonııalyq orkestr mýzykanttary – halyqaralyq baıqaýlardyń laýreattary Kýrvanjan Ahatov (vıolonchel), Damılıa Mahpırova (goboı) jáne taǵy da basqa talantty ónerpazdar án men jyrdan shashý shashty. Halyqaralyq baıqaýlardyń laýreaty Rýslan Baımýrzınniń jetekshiligimen «Astana Opera» Kameralyq orkestriniń súıemeldeýinde shyrqalǵan qazaq pen uıǵyr mýzyka jaýharlarynan quralǵan úzdik konsert kórermen kóńilin áýezdi ánniń besiginde terbedi.
Nazerke JUMABAI,
«Egemen Qazaqstan»
