Buǵan deıin habarlanǵandaı, 19-20 mamyrda elimizdiń 8 aımaǵynan jınalǵan balalar úıi tárbıelenýshileri arasynda Almatyda «Jeńimpaz joly» atty alǵashqy velojarys ótti. Balalar úıi men mektep-ınternattarda turatyn, jetim nemese ata-ana qamqorlyǵynan aıyrylǵan 14-16 jas aralyǵyndaǵy balalar eki kúnde 20 shaqyrymdyq qashyqtyqty baǵyndyrdy.
Jarysty uıymdastyrýǵa «BAURZHAN Foundation» jeke qory uıytqy boldy. Qordyń joba jónindegi úılestirýshisi Shyryn Sársenbekova jarystyń balalar úıleriniń arasynda alǵash ret ótkizilgenin baıandaı otyryp, «Biz alty jyl boıy balalar úıiniń tárbıelenýshilerimen qordyń basqa da jobalary boıynsha sporttyq jarystar uıymdastyryp kelemiz. Biraq velojarys alǵash ret ótkizildi. Bul joba arqyly sporttyń barlyq balaǵa qoljetimdi bolýyn maqsat etemiz. Al álemdegi úzdik «Ispanııa Výeltasy» grand-týryn óz kózderimen tamashalap, kýmırlerimen kezdesý balalar úshin ómirlerindegi esten ketpes sátke aınalary sózsiz. Bul bolashaqtaǵy úlken jetistikterdiń bastamasy bolaryna senemiz», dedi.
Bıylǵy jyly jeńimpaz komanda – álemdik «Ispanııa Výeltasy» grand-týrynyń birneshe kezeńine kýá bolady. Týr de Frans jáne Djıro d’Italııamen qatar álemdegi eń bedeldi úsh velojarystyń qataryna kiretin grand-týrdy óz kózimen kórip, kýmırlerimen kezdesý baqytyna Qaraǵandy qalasynyń «Tańsholpan» komandasy ıe boldy.
«Astana Pro Team» velokomandasynyń kásipqoı sportshysy Artıom Zaharov ta jarys týraly óz oıyn bildirip, balalarǵa sáttilik tileı kele, «Men balalar úıine de velosporttyń qoljetimdi bola bastaǵanyna qýanyshtymyn. Osy jobanyń qatysýshylary arasynan daryndy balalardy baıqaýǵa bolady. Aldaǵy ýaqytta jaqsy kásipqoı sportshy bola alady dep senemin. Barlyǵyna sáttilik tileımin!» dedi.
Jarys qorytyndysy boıynsha Qaraǵandy qalasynyń «Tańsholpan» komandasy, al jekeleı esep boıynsha tańsholpandyq Vıtalıı Shelkýshkın mejege birinshi jetip, jarystyń kóshbasshysy atandy.
Aınash ESALI,
«Egemen Qazaqstan»
ALMATY
