Orman rezervatynda byltyr 250 órt oqıǵasy bolsa, olardyń barlyǵy da kún kúrkirep, aǵashtarǵa naızaǵaı túsýi sııaqty tabıǵat qubylysyna baılanysty bolypty. Jáne tutanǵan kezde birden óshirilip otyrǵan. Sebebi, qazirde «Semeı ormany» memlekettik tabıǵı orman rezervatynda órt oqıǵasyn aldyn ala úsh kún buryn anyqtaı alatyn qural-jabdyq ornatylypty. Túgeldeı bolmaa da, qanatqaqty joba retinde ormannyń biraz tusyndaǵy qadaǵalaýshy munaralardyń basynda tur. Sondaǵy baqylaý júıesiniń belgileri mekeme ishindegi kezekshi operatorǵa dereý túsedi eken.
-Bul Semeı ormanynyń barlyq fılıaldarynda ázirshe ornatylǵan joq, qanatqaqty joba retinde Eýropalyq Qaıta Qurý jáne Damý Bankiniń kómegimen ornatyp edik, kóp paıdasy tıetindigin ańǵardyq,-dedi «Semeı ormany» memlekettik tabıǵı orman rezervatynyń dırektory Murat Dáýletov,-máselen, naızaǵaı túsip, ol jerde kóńirsip, ot janyp jatýy múmkin. Sol kezde kúni keshegidegideı qalyń órt alyp ketpes úshin, osy júıe bizge aldyn ala sál ǵana shyqqan tútindi kórsetip habarlaıdy. 24 saǵat boıy úzdiksiz jumys isteıdi. Kezekshi operator belgini kórip, dereý órt sóndirýshilerge habarlasady. Árıne, keshe órtengen tusta bundaı qural-jabdyǵy bar, baqylaý júıesine tirkelgen monıtor bolmady. Bundaı jabdyq Besqaraǵaı aýdanyndaǵy bólimshelerimizde de joq bolyp otyr. Máselen, Begen, Dolon, Bókebaı, Talısa, tipti Semeı fılıalynyń biraz jerinde áli ornatylmaǵan. Jaqynda ǵana memleket tarapynan osy qanatqaqty munaralyq qadaǵalaý júıesi qoldaý tapty. Soǵan oraı aldaǵy ýaqytta Semeı ormany men kórshi Pavlodardaǵy Ertis ormany aýmaǵyna osy jabdyq tolyq ornatylatyn boldy.Bul ormanshylar úshin asa qajet baqylaý júıesi.
Raýshan NUǴMANBEKOVA
SEMEI
