Úkimet • 26 Qazan, 2018

Úkimet úıinde Prezıdent Joldaýyn oryndaý aıasynda eńbekaqy mólsherin arttyrý máseleleri talqylandy

183 retkórsetildi

Astanada Baqytjan Saǵyntaev halyq tabysyn ósirý jáne eńbekaqy tóleý júıesin jetildirý turǵysynan Memleket basshysynyń bıylǵy 5 qazandaǵy Joldaýyn iske asyrý máseleleri boıynsha selektorlyq keńes ótkizdi, dep habarlaıdy Premer-Mınıstrdiń baspasóz qyzmeti.

Memleket basshysy Qazaqstan halqyna Joldaýynda eńbek salasyndaǵy negizgi áleýmettik ındıkatordyń — eń tómengi jalaqynyń parametrlerin ózgertýdi tapsyrdy. Sonymen qatar Prezıdent iri kompanııalardy osy ózgeristerdi qoldap, sáıkesinshe, eń tómengi jalaqy alatyn jumyskerlerdiń eńbekaqysyn kóterý sharalaryn qabyldaýǵa shaqyrdy.

Keńes barysynda jergilikti atqarýshy bılik organdary men jeke qurylymdardyń osy tapsyrmany oryndaýy boıynsha biryńǵaı tásilderdi ázirleý máseleleri talqylandy. Máseleni jan-jaqty qaraý úshin keńes jumysyna selektor rejıminde óńirlerdiń ákimderi, sondaı-aq, «Atameken» UKP jáne elimizdiń iri kásiporyndarynyń basshylary qatysty.

Keńes barysynda sóz sóılegen eńbek jáne halyqty áleýmettik qorǵaý vıse-mınıstri S. Jaqypova men óńirlerdiń ákimderi 42,5 myń teńgege deıin jalaqy alatyn, memlekettik jáne jekemenshik uıymdardaǵy qyzmetkerlerdiń sanyna statıstıka keltirip, Joldaý–2019-daǵy tapsyrmalardy oryndaý maqsatynda qabyldanyp jatqan sharalar týraly baıandady. Baıandamashylardyń pikirinshe, eń tómengi eńbekaqyny arttyrýdan kútiletin áleýmettik áser eń tómengi jalaqy alatyn qyzmetkerlerdiń ómir deńgeıin aıtarlyqtaı kóterýge jol ashady.  

Elimizdiń iri ári orta kásiporyndarynyń basshylary da óz oılaryn jetkizdi. Keńeste sóz sóılegen «Arselor Mıttal Temirtaý» AQ bas dırektory Kalon Sıngh Paramjıt tek eń tómengi jalaqy alatyndardyń emes, jalpy kásiporyn jumysshylarynyń 80%-ǵa jýyǵynyń eńbekaqysyn kóterýge tolyqtaı daıyn ekenin atap ótti.  

Memleket basshysynyń halyq jalaqysynyń deńgeıin kóterý týraly úndeýin tolyq qoldaý jónindegi bıznestiń shoǵyrlandyrylǵan pozısııasy «Atameken» UKP basqarma tóraǵasynyń orynbasary E. Jumaǵazıevtiń sózinde de kórinis tapty.

Máseleni talqylaý qorytyndysyn shyǵara otyryp, QR Premer-Mınıstri Baqytjan Saǵyntaev eńbek jáne halyqty áleýmettik qorǵaý, aqparat jáne kommýnıkasııalar mınıstrlikterine, oblystardyń ákimderine jáne Astana, Almaty, Shymkent qalalarynyń ákimderine tómengi jalaqy tólenetin jumysshylar sanattaryna qatysty eńbek zańnamasynyń saqtalýyn tıisti baqylaýdy qamtamasyz etýdi jáne barlyq jerde túsindirý jumystaryn júrgizý boıynsha sharalar qabyldaýdy tapsyrdy. Budan ózge, eńbekaqy tóleý júıesin retteıtin jáne eńbek zańnamasynyń saqtalýyn qadaǵalaıtyn, sonyń ishinde jumysshylardyń jappaı qyzmetten bosatylýyna jáne olardyń eńbek shartynsyz jumys isteýine jol bermeıtin ujymdyq kelisimderge, jumys berýshi aktilerine qol qoıylýyn jáne saqtalýyn qamtamasyz etý tapsyryldy.

Sońǵy jańalyqtar

Basty aqparat (19.02.2020)

Vıdeo • Keshe

Basylym basshylary - Nurlan ORAZALIN (1947)

Basylym basshylary • Keshe

Jaqsylyq júrek jylytady

Qazaqstan • Keshe

Erikti jastar erkin formatta pikir almasty

Ońtústik Qazaqstan • Keshe

Uqsas jańalyqtar