Parlament • 22 Aqpan, 2019

Senatta veterınarlyq qaýipsizdik máseleleri talqylandy

389 retkórsetildi

Senatta Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń uıymdastyrýymen «Veterınarlyq qaýipsizdik jaǵdaıy jáne ony zańnamalyq qamtamasyz etý» taqyryby boıynsha  dóńgelek ústel ótti. Bul týraly Parlament Senatynyń baspasóz qyzmeti habarlady.

Komıtet tóraǵasy Jeńis Nurǵalıev elimizdegi veterınarııa júıesi naqty ózgertýlerdi qajet etetinin atap ótti. Senatordyń aıtýynsha, saladaǵy negizgi máselelerdiń biri – mal aýrýy deńgeıiniń ósýi. Sondaı-aq, shetelden juqtyrylǵan Shmallenberg jáne teriniń nodýlıarly qabynýy sııaqty vırýstar maldyń qyrylýyna sebep bolyp otyr. О́tken jaz maýsymynda Batys Qazaqstan oblysynda atalǵan aýrý tirkelip, maldyń jappaı qyrylýyna ákelip soqty. Bul shekarada monıtrıng jasaýdy kúsheıtý jáne qatań baqylaýdy talap etedi.

«Ulttyń densaýlyǵy 60-80 paıyzǵa tamaqtaný men salaýatty ómir saltyna baılanysty ekeni málim. Veterınarlyq qyzmet mamandary halyq tutynatyn azyq-túlikke baqylaýdy únemi jetildirip otyrýdy qajet. Sebebi sońǵy kezderi saýda aınalymynda sapasyz taýarlardyń sany artyp kele jatqanyn baıqap júrmiz», - dedi J.Nurǵalıev. Onyń aıtýynsha, azyq-túlik ónimderiniń sapasyn baqylaýǵa ketetin shyǵyndar ónim qunynyń AQSh-ta – 25%, Eýropa elderinde – 12,5 paıyzǵa jýyǵyn quraıdy, al bizdiń elimizde bul kórsetkish áldeqaıda tómen. Bul jaǵdaı shıkizat pen daıyn ónimniń sapasy men qaýipsizdigin baqylaý tıimdiliginiń tómendeýine alyp keledi.

Senator Ańsar Musahanov óz baıandamasynda osy saladaǵy veterınarlyq-sanıtarlyq, profılaktıkalyq jáne dıagnostıkalyq sharalardyń jaǵdaıyna keri áser etetin máselelerge toqtaldy. Atap aıtqanda, senator bilikti mamandardyń tapshylyǵyn, joǵary oqý oryndarynda veterınarlyq mamandyqtar boıynsha oqytýda bilim granttary men kvotalar sanynyń jetispeýshiligin, veterınarlar jalaqysynyń azdyǵyn, aýyldyq jerlerge jas mamandardy tartý úshin áleýmettik-turmystyq jaǵdaılardyń joqtyǵyn atap kórsetti.

Odan basqa, A.Musahanov veterınarlyq qyzmetti basqarýdaǵy satyly júıeniń joqtyǵyn, veterınarlyq qyzmet kórsetýge arnalǵan arnaıy ǵımarattardyń (pýnkt, beket) jetispeýshiligin atap ótti. Osy máselelerdiń barlyǵy maldy sáıkestendirý jaǵdaıyna, ekpe egý sharalaryn ótkizýge, mal aýrýynyń aldyn alýǵa keri áser etip, aımaqtarda epızootıkalyq jaǵdaıdyń ýshyǵýyna alyp keledi. Depýtat atalǵan máselelerdi sheshý úshin salany qarjylandyrý tetikterin jetildirý jáne tıisti normatıvtik-quqyqtyq bazany qamtamasyz etý qajettigine nazar aýdardy.

Aýyl sharýashylyǵy mınıstrligi veterınarlyq baqylaý jáne qadaǵalaý komıtetiniń tóraǵasy Arman О́teǵulov  veterınarlyq qaýipsizdik jáne onyń zańnamalyq turǵydan qamtamasyz etý sharalary týraly baıandady. Ol elimizdegi epızootıkalyq jaǵdaıdy sıpattap, ony turaqtandyrý boıynsha qabyldanyp jatqan sharalar týraly aıtty.

S.Seıfýllın atyndaǵy Qazaq agrotehnıkalyq ýnıversıtetiniń rektory Aqylbek Kúrishbaev veterınarlyq sala mamandaryn daıarlaý máselelerine toqtaldy.

Dóńgelek ústel barysynda Aýyl sharýashylyǵy mınıstrligi veterınarlyq, fıtosanıtarlyq jáne azyq-túlik qaýipsizdigi departamentiniń dırektory Bıbigúl Bekenova, Astanadaǵy Halyqaralyq epızootıkalyq bıýrosy sýbaımaqtyq keńsesiniń dırektory Mereke Taıtýbaev, Qazaq veterınarlyq ǵylymı-zertteý ıntıtýtynyń dırektory Ahmetjan Sultanov, mal sharýashylyǵy jáne veterınarııa ǵylymı-ınnovasııalyq ortalyqtyń dırektory Bolat Seısenov sóz sóıledi. Talqylaýǵa sondaı-aq S.Seıfýllın atyndaǵy QazATÝ veterınarııa jáne mal sharýashylyǵy tehnologııasy fakýltetiniń oqytýshylary men stýdentteri qatysty.

Agrarlyq máseleler, tabıǵatty paıdalaný jáne aýyldyq aımaqtardy damytý komıtetiniń tóraǵasy Jeńis Nurǵalıev sharany qorytyndylaı kelip, dóńgelek ústel aıasynda aıtylǵan usynymdar men usynystar múddeli memlekettik organdarǵa joldanatynyn jetkizdi.

Sońǵy jańalyqtar

Ystyq tamaq taratty

Qazaqstan • Búgin, 17:59

Jaqsy ákim jalǵyz júredi

Tanym • Búgin, 17:02

Betperde kıgen kóktem

Tanym • Búgin, 16:55

Uqsas jańalyqtar