Qazaqstan • 14 Naýryz, 2019

Dári-dármek aınalymy máselesi talqylandy

608 retkórsetildi

Ortalyq kommýnıkasııalar qyzmetinde Dárilik zattardyń aınalymy jáne dárilermen qamtamasyz etý ótinimderi týraly baspasóz konferensııasy ótti.

Is-sharaǵa Qazaqstan Respýblıkasy Densaýlyq saqtaý mınıstrligi Farmasııa komıtetiniń tóraıymy Lıýdmıla Bıýrabekova, QR DSM Farmasııa komıtetiniń tóraıymy orynbasary Erjan Jýnisov, Sharııa Ismýhanova qatysty.

Aǵymdaǵy jyldyń sáýir aıynda Qazaqstanda dárilik zattardyń baǵasyna memlekettik retteý engiziledi. 12 naýryzda «Ashyq NQA» portalynda Densaýlyq saqtaý mınıstri buıryǵynyń jobasy jarııalandy, onda dárilerdiń shekti baǵasyn qalyptastyrý úshin ústeme baǵanyń mólsherin talqylaý úshin usynylǵan.

QR DSM Farmasııa komıtetiniń tóraǵasy Lıýdmıla Bıýrabekovanyń aıtýynsha, búgingi tańda bólshek baǵalardyń ıkemdi regressıvti júıesi ázirlendi. «Dári-dármekterdi bólshek saýdada ótkizýge arnalǵan ústeme baǵa quny 500 teńgeden az dári-dármek úshin 68% - dan bastap, baǵasy 100 000 teńgeden asatyn dári-dármek úshin 10% - ǵa deıin ózgeredi. Kóterme saýdada satý úshin ústeme baǵa kólemi 21-den 10 paıyzǵa deıin ózgeredi», - dep túsindirdi OKQ baspasóz máslıhatynda Lıýdmıla Bıýrabekova.

«Baǵany retteý erejelerin buzǵany úshin aıyppul nemese farmasevtıkalyq qyzmetke lısenzııanyń qoldanylýyn toqtata turý túrinde ákimshilik jaýapkershilik qarastyrylǵan», - dedi komıtet basshysy. Ereje jobasy ashyq derekter portalynda 19 naýryzǵa deıin talqylanady.

Sondaı-aq shara barysynda Lıýdmıla Bıýrabekova jaqynda Qazaqstan Respýblıkasy EAEO elderiniń aýmaǵynda alǵashqy medısınalyq qoldanýǵa arnalǵan dárilik preparattyń tirkeý kýáligin bergenin aıtty. Budan basqa EAEO aıasynda Qazaqstan 2018 jyly referenttik memleket retinde DZ saraptamasyn júrgizýge sheteldik jáne otandyq farmóndirýshilerden 23 ótinim qabyldady.

«2018 jyly barlyǵy 6,5 myńnan astam dárilik zattar men medısınalyq buıymdardyń saraptamasy júrgizildi. Bul 2017 jylmen salystyrǵanda 18% - ǵa artyq. Júrgizilgen saraptamalardyń jalpy sanynan 3% (176) – tirkeýden bas tartty, ıaǵnı sapasyz dári-dármekter men medısınalyq buıymdar Qazaqstan naryǵyna jiberilmedi», - dedi Lıýdmıla Bıýrabekova.

Onyń aıtýynsha, jyl saıyn Dárilik zattardy saraptaý ulttyq ortalyǵy Qazaqstanǵa ákelinetin jáne shyǵarylatyn dárilik preparattardyń qaýipsizdigi men sapasyna shamamen 63 myńǵa jýyq qorytyndy beredi. «2018 jyly bul sanat boıynsha bas tartý sany 1% - dy nemese 863 preparatty qurady», - dedi Farmasııa komıtetiniń tóraǵasy.

Sonymen qatar ol dári-dármekterdiń janama áserlerin monıtorıngileý boıynsha júrgizilip jatqan jumystar týraly da aıtyp berdi. 2018 jyly Qazaqstanda dárilik zattardyń janama áseri týraly 3200 habarlama, al 2019 jyldyń alǵashqy eki aıynda 398 ótinish tirkeldi. Olardyń ishinen keıbir medısınalyq preparattar ýaqytsha nemese tolyq aınalymnan alyndy.

Sondaı-aq Lıýdmıla Bıýrabekova otandyq farmasevtıkalyq ónim óndirýshilerge memleket tarapynan kórsetiletin ınvestısııalyq qoldaý týraly aıtty. «Jaqynda Biryńǵaı dıstrıbıýtor men otandyq taýar óndirýshiler arasynda 10 jylǵa deıingi merzimge kelisim-shart jasaýǵa arnalǵan kezekti konkýrstyń qorytyndysy shyǵaryldy. Konkýrsqa 24 áleýetti ónim berýshi qatysty, Konkýrs qorytyndysy boıynsha 15 otandyq taýar óndirýshiler 2668 medısınalyq buıym túri boıynsha uzaq merzimdi jetkizý sharttary túrinde mańyzdy ınvestısııalyq artyqshylyqtarǵa ıe boldy», - dedi ol.

QR DSM Farmasııa komıteti tóraǵasynyń orynbasary Erjan Júnisov OKQ brıfınginde Qazaqstanda dıspanserlik esepte turǵan pasıentterdi qamtamasyz etý úshin tegin dári-dármek jetkizý qalaı júrip jatqanyn aıtty. «Dıspanserlik esepte turǵan pasıentterdi qamtamasyz etý úshin dári-dármekterdi jóneltý qańtar aıynan bastap júrgizilýde. Qazirgi ýaqytta 25,4 mlrd teńgege dári-dármekter jóneltildi. Jyldyń alǵashqy eki aıynda 4,9 mlrd teńge somaǵa 1,1 mln resept jazyp berilgen. Olardyń ishinde qazirgi ýaqytta 4,5 mlrd teńgege reseptiler qamtamasyz etildi», - dedi Erjan Júnisov.

Onyń aıtýynsha, Biryńǵaı dıstrıbýsııa júıesi arqyly 45 nozologııa boıynsha emdelýshiler tegin qamtamasyz etiledi. Medısınalyq uıymdar 499 dári-dármekke qajettilik týraly málimdegen. Olarǵa 105,1 mlrd teńge somaǵa dári-dármekter satyp alynady. Al 2019 jylǵa Biryńǵaı dıstrıbýsııa júıesi arqyly satyp alý kezindegi únemdeý 19,6 mlrd teńgeni qurady. «Aldaǵy ýaqytta únemdelgen qarajat Densaýlyq saqtaý mınıstrliginiń bıýdjettik komıssııasynyń qaraýyna shyǵarylatyn bolady, bul qarajatty tapshylyq anyqtalǵan jaǵdaıda dári - dármekterdi qosymsha satyp alýǵa nemese medısınalyq uıymdardyń basqa da muqtajdyqtaryna bólý týraly másele qaralady», - dep túsindirdi Erjan Júnisov.

Sondaı-aq ol pasıentterdi tegin dári-dármekpen qamtamasyz etýdi turaqty monıtorıngileý úshin Densaýlyq saqtaý mınıstrligi halyqpen keri baılanysty qamtamasyz etý boıynsha jobalarǵa bastamashylyq jasady. Pasıentterdi tegin dári-dármekpen qamtamasyz etý týraly ony alǵandyǵyn rastaıtyn SMS-habarlama júıesi, sondaı-aq 1439 nómiri boıynsha halyqty tegin dári-dármekpen qamtamasyz etý máseleleri boıynsha Biryńǵaı dıstrıbıýtordyń baılanys ortalyǵy iske qosyldy.

Sońǵy jańalyqtar

Juma: Almatyda 28 indet oshaǵy karantınde tur

Ońtústik Qazaqstan • Keshe

Almatyda zerthanalar sany artady

Ońtústik Qazaqstan • Keshe

Uqsas jańalyqtar