16 Naýryz, 2019

Áleýmettik álemniń órisi keń

774 retkórsetildi

Memleket basshysy N.Á.Nazarbaev táýelsizdiktiń alǵashqy jyldarynan elimizde bıznes pen kásipkerliktiń órkendeýine qoldaý kórsetip keledi. Sonyń nátıjesinde búginde tabysy mol otandyq kompanııalar qatary kóbeıe túsýde. Sondaı-aq búginde olardyń eńbekti qorǵaý men onyń qaýipsizdigin saqtaı otyryp áleýmettik qoldaý baǵytyn ustanatyn da kezi keldi. Qazirgi kúni elimizdegi óndiristik kásiporyndarǵa jalaqy mólsherin udaıy ósirip otyrý, bul iste qaryz bolyp qalýǵa jol bermeý, eńbek daýlaryn boldyrmaý jáne jumysshylar sanyn qysqartýǵa jol bermeý úderisteri tán bolýǵa tıis. Tek sonda ǵana jańa áleýmettik álemniń órisi odan ári keńeı túspek.

Premer-mınıstrdiń orynbasary Gúlshara Abdyhalyqova Aqtóbe oblysyndaǵy iri jáne orta deńgeıdegi kásiporyn basshylarymen kezdesýi kezinde sóz tıegin osy arnadan sabaqtady. Budan ári Úkimet basshysynyń orynbasary bıznestiń áleýmettik jaýapkershiligi jónindegi máselege toqtalyp tabysty kompanııalar men kásiporyndar tarapynan qajetti kómek eń muqtaj, turmysy tómen tabysy az otbasylarǵa joldanýy kerektigin jetkizdi.

Kezdesýde Halyqty áleýmettik qorǵaý mınıstri Berdibek Saparbaev óńirlerde kásiporyndarmen jasalatyn ujymdyq kelisimder men memorandýmdar da áleýmettik ahýalǵa oń áserin tıgizip júrgenin aıtyp berdi. Sondaı-aq mınıstrdiń aıtýynsha sheteldikterdiń basqarýyna berilgen kompanııalar arasynda jumysshylarǵa eńbekaqy tóleý isinde aıyrmashylyqtar kezdesedi. Mundaı jaǵdaıda áleýmettik shıelenisýshilik kórinisteri oryn alýy múmkin. Sondyqtan mundaı jaǵdaıǵa jol berilmegeni jón dedi ol.

Basqosý kezinde óńirdegi «KazHrom» kompanııasynyń basshysy Aman Esenjolov, «AqtóbeMunaıGaz» AQ bas dırektorynyń orynbasary Tahta Lıfým Esenǵulov, Aqtóberels-Arqalyq zaýytynyń bas dırektory Andreı Kýzmın, «Nektar» óndiritik kooperatıvynyń jetekshisi Shamıl Kazpranov jáne «Aqtóbe munaı qurylys» JShS-nyń basshysy Serik Estemisovter áleýmettik qoldaý kórsetýge qatysty atqarylǵan jumystar jóninde baıandap berdi. Tujyrymdap aıtqanda atalǵan kásiporyndarǵa ortasha jalaqy mólsheriniń turaqty ósimi tán. Buǵan qosa ujym múshelerine qarjylaı qoldaý kórsetý tutqalary engizilgen. Kásiporynda qyzmet jasaıtyn kóp balaly otbasylarǵa qaıtarymsyz baspanalar berilgen. Atalǵan kásiporyn basshylarynyń biri jeti jetim balanyń bankidegi esepshotyna 14 mıllıonǵa jýyq qarajat aýdarǵan.

Premer-mınıstrdiń orynbasary Gúlshara Abdhalyqova kóp balaly analarǵa jalpy aýmaǵy 140 sharshy metr baspana salyp bergen bıznes ókili Serik Estemisovke rızashylyǵyn jetkizdi. Taǵy bir aıtarymyz súıinshti jáıt kásiporyn jetekshisiniń aıtýynsha bul eńbek ujymynyń músheleri esh ýaqytta bankiden nesıe alyp kórmepti. Jumysshylardyń barlyq muqtajdyqtary kásiporynnyń óz ishinen, jumysshynyń alatyn qarajaty esebinen óteledi, -  deıdi kásiporyn basshysy. Sondaı-aq «AqtóbeMunaıGaz» JShS kompanııasy shetelderden óz atamekenine oralǵan otandastarymyzǵa jumys berýshi retinde ereksheletinin de aıta ketken jón.

Kezdesýdi Aqtóbe oblysynyń ákimi Ońdasyn Orazalın qorytyndylap áleýetti kompanııalar tarapynan jasalatyn áleýmettik áriptestik pen qamqorlyq aıasynyń odan ári arta túsýine senim bildirdi.

Temir QUSAIYN,

«Egemen Qazaqstan»

Sońǵy jańalyqtar

Ystyq tamaq taratty

Qazaqstan • Búgin, 17:59

Jaqsy ákim jalǵyz júredi

Tanym • Búgin, 17:02

Betperde kıgen kóktem

Tanym • Búgin, 16:55

Uqsas jańalyqtar