Saıasat • 20 Maýsym, 2019

Qasym-Jomart Toqaevtyń «Tarıh jasaǵan tulǵa» atty kitabynyń tusaýkeseri ótti

394 retkórsetildi

Ankara qalasynda Halyqaralyq Túrki Akademııasynyń jáne Qazaqstan Respýblıkasynyń Túrkııadaǵy elshiliginiń qoldaýymen Memleket basshysy Qasym-Jomart Toqaevtyń «Tarih Yapan Adam» (Tarıh jasaǵan tulǵa) atty kitabynyń tusaýkeser rásimi ótti.

Tusaýkeser rásimine Qazaqstan Respýblıkasynyń Túrkııadaǵy Elshisi Abzal Saparbekuly, Túrkııa Respýblıkasy Prezıdentiniń Bas keńesshisi Iаlchyn Topchý, Túrki Keńesiniń Bas hatshysy Baǵdat Ámireev, Túrki Keńesiniń Aqsaqaldar Keńesiniń múshesi, professor Ádil Ahmetov, Elshi Halıl Akynjy, ANKASAM zertteý ortalyǵynyń bas keńesshisi, professor Sınjer Imer, Ankara Saıasattar ortalyǵynyń dırektory Hasan Kanbolat, Túrkistan oblysynyń ákim orynbasary Málik Otarbaev, Saıasat, ekonomıka jáne qoǵamdy zertteý qoryna (SETA) qarasty Syrtqy saıasat zertteý ortalyǵynyń dırektory, professor Muhıttın Ataman jáne Túrkııanyń belgili saıasattanýshylary, zııaly qaýym ókilderi men qoǵam belsendileri, dıplomatııa mekemeleriniń ókilderi qatysty.

Kitapta egemen elimizdiń irgesin qalap, táýelsiz memleketimizdi búkil álemge tanytqan Qazaqstannyń Tuńǵysh Prezıdenti – Elbasy Nursultan Nazarbaevtyń kóshbasshylyǵy men qaıratkerligi, parasat bıiginen kóriner tulǵalyǵy men adamgershilik asyl qasıetteri, elimizdiń jarqyn bolashaǵy úshin jasaǵan álemdik mańyzy bar ıgilikti isteri týraly baıandaǵan tolǵanystary men estelikteri toptastyrylǵan. Avtor Qazaqstan táýelsizdiginiń irgesi qalanǵan sol bir shytyrmany men shyrǵalańy mol kúrdeli tarıhı kezeńdi qyzyqty oqıǵalary men tarıh kitaptarynda kezdese bermeıtin álemdik saıasattyń názik tustary arqyly sheber jetkizedi. Jańa memlekettiń qalyptasý tarıhyn Elbasynyń tulǵalyq qasıetimen, memleketti basqarý qarymdy qabiletimen jáne jaratylysynan qaıratker bolyp týǵan bolmysymen sabaqtaıdy. Memleket basshysy Qasym-Jomart Toqaev Elbasymen alǵashqy tanysqan kezderin eske alyp, qoǵamdy sonaý qıyn-qystaý kezeńnen qalaı alyp shyqqandyǵyn jazady. Tuńǵysh Prezıdentimizdiń óziniń ustanǵan saıasatynda eýropalyq reformızmdi, azııalyq dástúrshildikti, pragmatızm men demokratııalyq rásimderdi saqtaý syndy qoǵamnyń damýyna negiz bolatyn mańyzdy faktorlardy qalaısha sıntezdegendigin jetkizedi.

Halyqaralyq Túrki Akademııasynyń prezıdenti Darhan Qydyráli kitapqa arnap jazǵan óziniń alǵy sózinde Qazaqstannyń táýelsizdik jyldarynda qol jetkizgen jetistikterdiń barlyǵy Elbasy N.Nazarbaevtyń esimimen baılanysty ekendigin aıtyp, Tuńǵysh Prezıdenttiń qaıratkerligi men kemeńgerligine, iskerligi men qaıratkerligine uzaq jyldar boıy kýá bolǵan, búgin de Memleket basshysy bolyp saılanǵan Q.Toqaevtyń álemdik saıasattyń, el basqarýdyń bilgiri, túrki ıntegrasııasynyń damýyna aıryqsha úles qosqan memleket qaıratkeri retinde osyndaı qundy kitapty jazǵany elbasytanýǵa, qazaq saıasatyn tanýǵa qosqan zor úlesi ekendigin jetkizedi. Kitaptyń túrik tilindegi nusqasyn Akademııa tarapynan shyǵarý úlken mártebe sanaımyn dep jazady.

Jıyndy ashqan Elshi A.Saparbekuly Qazaqstannyń Tuńǵysh Prezıdenti N.Nazarbaevtyń memleket táýelsizdiginiń bekı túsýine sińirgen zor eńbegin atap ótip, bıylǵy jyly qabyldaǵan taǵdyrly sheshimniń nátıjesinde jańa Memleket basshysy bolyp Q.Toqaevtyń saılanǵanyn aıtty. Sonymen qatar, Qazaqstannyń syrtqy saıasatynyń Elbasy salǵan sara jolmen damı beretindigin, Qazaqstan men Túrkııa arasyndaǵy qarym-qatynastardyń jańa deńgeıge jetkendigin jáne ary qaraı qarqynmen kúsheıe beretindigin jetkizdi. 

Túrkııa Prezıdentiniń Bas keńesshisi Iаlchyn Topchý óz sózinde tusaýy kesilgen kitaptyń asa qundy eńbek dep baǵalady. «Bizder – túrki halyqtary jetistikterimizben maqtanýymyz kerek. Maqtanyp qana qoımaı, bolashaq urpaqqa, óskeleń jas býynǵa jetkizýimiz kerek. «Tarıh jasaǵan tulǵa» atty kitap sol kúrdeli kezeńnen elin aman alyp shyqqan túrki áleminiń Aqsaqaly N.Nazarbaevtyń qajyrly qaıratyn, elge sińirgen eren eńbegin, tolaǵaı jetistikterin, Qazaqstannyń syrtqy saıasatynyń tarıhyn sheber baıandaıdy. Sondyqtan Q.Toqaevqa alǵys aıtamyn!»

Quttyqtaý sóz sóılegen professor Á.Ahmetov túrki tarıhynyń búkil álemmen tamyrlas ekenin aıtyp, sol tamyrdan nár alǵan búgingi urpaq jańa dáýir bastap jatqandyǵyn baıandady.

Kitapty túrik tiline aýdarǵan belgili qalamger, dıplomat, Halyqaralyq «Jambyl» syılyǵynyń laýreaty M.Otarbaev óziniń arnaıy baıandamasynda Túrkistan óńiriniń damýy týraly sóz qozǵap, kún keshe ǵana bir jyldyǵyn atap ótkendigin aıtty. Sondaı-aq, atalǵan kitaptyń túrkitildes elderi úshin asa qundy ekendigin jetkizdi. «Memleket basshysy Q.Toqaevtyń kitap shyǵarýǵa kelisim alǵan Halyqaralyq Túrki Akademııasy byltyr ózime aýdarýǵa usynys jasady. Kitap qolyma túskennen keıin muqııat oqyp shyqtym. Budan buryn Elbasy týraly jazylǵan kitaptardan bólek formada jazylǵan. Saıasattaǵy názik tustardy sheber jetkizgen. Aýdarma barysynda kóptegen málimet alǵanym da jasyryn emes. О́ıtken kitaptyń avtory – tájirıbesi mol, táýelsizdigimizdiń damýyna zor úles qosqan, ıntellektýaldyq deńgeıi óte bıik tulǵa. Kitap túrik oqyrmanynyń kóńilinen shyǵady dep senemin.»

Sonymen qatar, tusaýkeser rásimine qatysqandar «Túrki álemi jáne Elbasy», «Qazaqstannyń Tuńǵysh Prezıdenti jáne Túrkistannyń damýy», «Demokratııalyq prosesinde oryn alǵan 9 maýsym prezıdenttik saılaýy» jáne «Jańa kezeńde Qazaqstan-Túrkııa qarym-qatynastary» taqyryptarynda baıandama jasady.


Sońǵy jańalyqtar

Un kvota arqyly eksporttalady

Ekonomıka • Búgin, 14:53

Qan maıdanda ańyz bolǵan Qarager

Tanym • Búgin, 14:32

Qostanaı oblysynda brakonerler ustaldy

Aımaqtar • Búgin, 13:43

Kók shalǵynǵa kómilip jattym keshki...

Ádebıet • Búgin, 13:37

Qazaqtyń qyzy kóp, tek qazaq qyz az

Qoǵam • Búgin, 13:14

Urlyq ta óristep barady

Aımaqtar • Búgin, 13:11

«Astana Opera» onlaın-terapııa usynady

Rýhanııat • Búgin, 13:01

Qazaqstannyń kredıttik reıtıngi rastaldy

Ekonomıka • Búgin, 12:13

Zaısanǵa aqqý keldi (vıdeo)

Vıdeo • Búgin, 12:09

Uqsas jańalyqtar