Rýhanııat • 12 Qyrkúıek, 2019

Qostanaıda «Bizdiń aıtys» teleaıtysy bastaldy

99 ret kórsetildi

Ol I. Omarov atyndaǵy oblystyq qazaq drama teatrynyń kishi zalyna jınalǵan kórermender aldynda kıiz úıdiń ishki beınesi kórsetilgen, qazaqtyń dástúr-saltymen bezendirilgen sahnada  túsiriledi.

Aıtys jastar jylyna arnalyp, tek jas aqyndar arasynda ótkiziledi. Oǵan 25 jyl boıy oblysta úzdiksiz ótip kele jatqan oqýshylar aıtysynyń jeńimpazdary, oblysqa belgili jas aqyndar, barlyǵy 12 jup bolyp, jas aqyndar qatysady. Aıtysty oblystyq mádenıet basqarmasynyń basshysy Erlan Qalmaqov ashyp, halqymyzdyń rýhanı ómirindegi bul ónerdiń orny týraly aıta kelip, jas aqyndarǵa sáttilik tiledi. Qazaqstannyń halyq aqyny Ásııa Berkenova jastardy quttyqtap, aıtystyń óner ǵana emes, nasıhat quraly ekenin aıtty.

«Elbasynyń «Bolashaqqa baǵdar: rýhanı jańǵyrý», «Uly dalanyń jeti qyry» baǵdarlamalyq maqalalarynda aıtylǵan máselelerdi jurtshylyqqa jetkize túsýde aıtystyń alar orny erekshe bolýy tıis. Halqymyzdyń dástúrin, rýhanı qundylyqtaryn búgingi urpaqtyń joǵaltpaýyna, keler urpaqqa jetkizýine qyzmet etý aqyndardyń paryzy da, mindeti» dedi Ásııa Áıipqyzy. Belgili aıtys aqyny Álfııa Ormanshına jastarǵa arnaǵan aqyndyq tilegin jyrmen jetkizdi.

Osy aıtysty ótkizýge bastama kóterip, oblystyq «Qostanaı» tele arnasynda «Bizdiń aıtys» atty habardy uıymdastyrǵan ári sol habardy júrgizýshi Marǵulan Ospanov 24 aqyn qatysqan tele aıtysty oblys telekórermenderi jyl boıy ekrannan qyzyqtaıtynyn aıtty. Birer jyl ol osyndaı teleaıtys uıymdastyrylǵan edi. Ony tek Qostanaı qalasynyń tele kórermenderi kóre alǵan bolatyn. Endi bul joly aıtys ekran arqyly oblys kórermenderine jetedi.

«Aıtys úsh kezeńnen turady. Alǵashqy kezeńge 24 aqyn qatysady. Ekinshi kezeńde odan iriktelgen 12 aqyn 6 jup bolyp aıtysady. Úshinshi kezeńge úsh jup shyǵyp, jeńimpazdar anyqtalady. Birinshi kezeńnen shyǵyp qalǵandarǵa 20 myń teńgeniń, ekinshi kezeńnen ketkenderge 50 myń teńgeniń sertıfıkaty tapsyrylady, al jeńgen aqyndar kelesi kezeńge ótip otyrady. Aıtystyń úshinshi sheshýshi kezeńinde oza shapqan jeńimpazdarǵa qomaqty júlde tapsyrylady» deıdi Marǵulan.

Sonymen qatar osy aıtystaǵy jeńimpazdar respýblıkalyq «Altyn dombyra» aıtysyna joldama alady.

«Bıyl aıtysqa tek oblys aýdandary men qalalaryndaǵy jas talap aıtyskerlerdi tarttyq. Bul sharany oblystyq mádenıet basqarmasy qarjylandyrdy. Eger kelesi jyly bıylǵydaı qarjy bolsa, aıtysty aımaqtyq etip ótkizgimiz bar. Osy joly fınalǵa shyqqan aqyndarmen qatar Qazaqstannyń soltústik oblystarynan 6 jup aqyndar shaqyrar edik» deıdi Marǵulan Ospanov.

 

Qostanaı

Sońǵy jańalyqtar

Uıysa bilsek, urlyq tyıylady

Aımaqtar • Keshe

Eýro taǵy qymbattady

Ekonomıka • Keshe

Báıterekte órt shyqty

Aımaqtar • Keshe

Uqsas jańalyqtar