Sport • 09 Qazan, 2019

Jańaózenniń jampozy

65 retkórsetildi

Reseıdiń Ekaterınbýrg qalasynda bokstan erler arasynda ótken álem chempıonaty tarıh qoınaýyna ketti. 90 memleketten 400-ge jýyq boksshy baq synaǵan saıysta elimiz 1 altyn, 1 kúmis jáne 4 qola medalmen beıresmı jalpykomandalyq esepte úzdik úshtikten kórindi. Al qurama qorjynyna jalǵyz altyn medaldy Bekzat Nurdáýletov saldy.

 Shırek fınalda júldesiz qala jazdady

Mańǵystaý oblysyndaǵy Jańaózen qalasynda týyp-ósken Bekzatty ákesi eń alǵash ret 10 jasynda boks úıirmesine ertip barǵan eken. Úıdiń úlkeni bolǵandyqtan ini-qaryndasyna qorǵan bolsyn degen oı ǵoı. Jekpe-jektiń bul túri bolashaq chempıonǵa birden unaǵan kórinedi. Sodan jaǵdaı ózgerip, bala Bekzat 11 jyldan keıin álem chempıony atanyp otyr.

Negizi, Bekzat baǵy bar jigit eken. Áıtpese qanshama talantty boksshy álem túgili qurlyq birinshiliginde boı kórsete almaı, qolǵabyn shegege ilip jatqanyn kórip júrmiz. Al 22 jastaǵy boksshynyń baǵy men baby qatar shapty. Olaı deıtimiz, Jańaózenniń týmasy buǵan deıin 91 kılo salmaqta baq synap keldi. Jastar arasynda álem birinshiliginiń qola júldegeri, Qazaqstan chempıonatynyń fınalısi, Spartakıadanyń qola júldegeri atandy. Barlyǵy júldeli oryn. Onyń ústine Qazaqstan chempıonatynda tájirıbeli Vasılıı Levıtke esesi ketkeni bar. Vasıa turǵan kezde 91 kılo salmaqta №1 boksshy bola almaıtynyna kózi jetken Marat Jákıevtiń shákirti 81 kılo salmaq dárejesine aýysýǵa bel býdy. Ol birden jańa salmaqty jatsynbady. Prezıdent kýbogyna qatysyp kórip edi, kúmis medal enshiledi. Nátıjesinde, álem birinshiligine baratyndardyń tiziminen Bekzat ta tabyldy. Bul týraly bas bapker Ǵalym Kenjebaev bylaı degen edi: «81 kıloda báseke óte kúshti. Azııa chempıony Bek Nurmaǵambet, Prezıdent kýbogynyń fınalısi Bekzat Nurdáýletov jáne jastar arasynda álem chempıony Nurbek Oralbaı qurama sapynda jattyǵyp júr. Bul jolǵy tańdaý Bekzatqa tústi».

Bas bapker Ǵalym Qalıuly durys tańdaý jasapty. Shırek fınalǵa deıin Bekzat Hon In Gı (Ońtústik Ko­reıa), Korbaı Nalek (Venesýela), Macha­do Kenony (Brazılııa) ońaı utty. Al shırek fınalda túrik boksshysy Baıram Malkanmen qolǵap túıistirgen jerlesimiz oıda joqta júldesiz qala jazdady. Sebebi ekinshi kezeńniń qo­rytyndysy boıynsha eki boksshynyń upaıy teń bolatyn. Tek sońǵy sheshýshi raýndta ǵana bapkerler aqylyna qulaq asqan Nurdáýletov túrik boksshysyna birneshe soqqy darytyp, jeńisti julyp aldy.

La Krýzdyń armanyn kúl-talqan etti

Jartylaı fınal. Kóp boksshylar rıngke shyǵarda túrli qımyldar jasap, sekirip, aıqaılap jatady emes pe? Solardyń biri Bekzattyń qarsylasy – Rıo Olımpıadasynyń jeńimpazy, álemniń tórt dúrkin chempıony Hýlıo Sezar La Krýz edi. Jekpe-jek aldynda «Bul joly qalaı bolady eken?» dep taqymymyzdy qysqanymyz ras. Sóıt­sek, jerlesimiz alynbas qamaldaı kó­ringen «Kýba qabylanyn» sabady ǵoı, shirkin. Sol qolmen ıek pen mań­daıdan, oń qolmen qulaq shekeden birneshe soqqy jasaǵan Bekzat tipti ekinshi raýndta qarsylasyn nokdaýnǵa ji­berdi. Keıin statıstıkaǵa qarasaq, on jyl boıy álemde №1 boksshy atanǵan La Krýz karerasynda birde-bir nokdaýn alyp kórmepti. Osylaısha bul 81 kı­loda Kýba dáýiriniń bitken kúni boldy.

«Ár aıqas ózinshe qıyn boldy. So­lardyń ishinde kýbalyq La Krýz­ben ótken kezdesýdi erekshe atap óter edim. Qalaı degenmen Olım­pııa oıyndarynyń chempıony, álem birin­shi­likterinde de top jarǵan. Aty jer jarǵan qarsylas Ádilbek Nııazym­be­tovtiń jolyn birneshe ret baılaǵan boksshy. Ádilbek aǵam da taktıkalyq turǵyda keńesin aıtty, óz tájirıbesimen bólisti. Bapkerler de ony ábden zerttegen ǵoı. Sonyń arqasynda jeńiske jettim. Osyndaı azýly qarsylasty jeńý úshin durys taktıka qurǵan bapkerlerime alǵys aıtqym keledi. Bul – jeńis tek meniń emes, qazaq halqynyń, bapkerlerimniń, komandamyzdyń jeńisi», dedi Bekzat.

La Krýz buǵan deıin 81 kıloda synǵa túsken jerlesimiz Ádilbek Nııazym­betovti 2011, 2013 jylǵy álem birin­shiliginiń fınalynda eki ret jeńgenin, Rıo Olımpıadasynda altynsyz qal­dyrǵanyn bilemiz. Bir qyzyǵy, Ádilbek te, Bekzat ta Mańǵystaý oblysynan jáne ekeýi de Marat Jákıevtiń shákirti. Endi zańdy suraq týady. Osyndaı jeńis Nurdáýletovke qalaı keldi? Jaýap izdep kórelik. Birinshiden, bizge Bekzat barlyq qarsylasynan iri kórindi. Iri bolatyndaı jóni bar. Ol buǵan deıin 91 kıloǵa deıingi salmaqta synǵa túsken-di. Sol qolmen jasaǵan soqqylary kóbine dittegen jerine jetip otyrdy. Ekinshiden, Bekzattyń qaısarlyǵyna tánti boldyq. Rıngke shyǵar aldynda ol ózin salmaqty ustap, kózben qarsylasynyń mysyn basyp tastaı alady eken. О́zine óte senimdi. Úshinshiden, Jákıev bapkerge Hýlıo tańsyq boksshy emes. Onyń shákirti Nııazymbetovpen úsh ret kezdeskenin aıttyq. Álem chempıonaty aldynda Reseıde Qazaqstan men Kýba boksshylary oqý-jattyǵý jıynyn ótkizdi. Sol kezde Marat bapker shákirtin kýbalyq boksshyǵa arnaıy daıarlaǵan. Osynyń barlyǵy bir arnaǵa toǵysqannan keıin jerlesimiz bul jekpe-jekte jeńimpaz atanyp otyr. 

Bekzat bul jekpe-jek jaıly: «La Krýz nokdaýn alǵan kezde-aq jeńiske jetetinimdi bildim. Osydan keıin 81 kıloda Kýba dáýiriniń kúnin aıaqtaldy dep oılaımyn. La Krýzdyń ózi de álem chempıonatynda tórt ret top jaryp, atyn boks tarıhyna qaldyrǵysy kelgeni anyq. Biraq onyń armany bul joly oryndalmady».

Rýhy myqtyǵa jeńis baqyty buıyrady

Rýhy myqty degen osy shyǵar. Bardy, álem chempıony, Olımpıada chempıony demeı  shyqty, jeńiske jetti. Osyndaı rýhpen Bekzat álem chem­pıo­natynyń fınalynda ózbek Dılshodbek Rýzmetovpen qolǵap túıis­tirdi. Dál osy ózbek boksshysy bıylǵy Azııa birinshiliginde taǵy bir jerlesimiz Bek Nurmaǵambetovten jeńilgen bolatyn. Bul joly da onyń Alash balasyna esesi ketti. Barlyq tóreshi biraýyzdan Bekzat Nurdáýletovti (5:0) jeńimpaz dep tanydy. Budan artyq ne kerek?! Bekzatqa bárekeldi deımiz.

 Endi 81 kılony «qazaqtyń salmaǵy» deıtin kún de alys emes. Sebebi bapkerler qazirdiń ózinde lısenzııalyq týrnırge kimdi alyp baramyz dep bas qatyryp otyr. Bul salmaqta álem chempıony Bekzat Nurdáýletovten bólek, Azııa chempıony Bek Nurmaǵambet, jas­tar arasynda álem chempıony Nurbek Oralbaı bar. Úsheýiniń kez kelgeni atoı salýǵa daıyn. Básekeniń joǵary ekenin, al básekelestik artsa, quramanyń kórsetkishi joǵary bolatyny sózsiz.

«Armanym – Olımpıada chempıo­ny bolý. Soǵan umtylamyn. Eń aldymen otbasym men halqymnyń úmiti. Bir qaýym el senip turǵanyn bilgende, bosańsýǵa haqym joq dep sanaımyn. Sondyqtan demalys ýaqytynda da jattyǵýdan qol úzbeımin», dedi chempıon.

Bárekeldi! Endi Bekzatqa jáne quramadaǵy boksshylarymyzdyń esine sala ketsek. Aldaǵy ýaqytta dańǵazaǵa boı uryp toı toılap ketpeı, 2020 jyly Tokıo Olımpıadasyna deıin aıanbaı ter tókse deımiz. Qansha jerden ataq-dańqyń dúrkirep turǵanymen, kimniń daıyndyǵy kúshti, sol árdaıym bıik tuǵyrdan kórinetinin umytpaý kerek.

 

Almas MANAP

Banner
Sońǵy jańalyqtar

Elıtaly kezeńge joldama aldy

Sport • Búgin, 09:58

Eki qola medal enshiledi

Boks • Búgin, 09:57

«Barystyń» qarqyny qatty

Hokkeı • Búgin, 09:52

Kıprdi de jeńe almadyq...

Fýtbol • Búgin, 09:51

Galbadrah bolmasa qaıter edik?!

Sport • Búgin, 09:49

«Qara altyndy» qapysyz aǵyzǵan

Qazaqstan • Búgin, 09:44

Qyz áýlıe

Rýhanııat • Búgin, 09:34

Qaıtalanbas qymyz dámi

Qazaqstan • Búgin, 09:33

Rýhanı jańǵyrǵan aýyl

Rýhanııat • Búgin, 09:28

Ekijaqty kelisimge qol qoıyldy

Qazaqstan • Búgin, 09:26

Tálim men tájirıbe ushtasqan uıa

Qazaqstan • Búgin, 09:10

Jambyldyqtardyń jarqyn jobasy

Aımaqtar • Búgin, 08:36

Joshy ulysynyń joǵalǵan shaharlary

Rýhanııat • Búgin, 08:31

Úılestirý keńesiniń kezekti basqosýy

Qazaqstan • Búgin, 08:27

Túgel túrkini túgendegen

Álem • Búgin, 08:20

Katonqaraǵaıdy qalaı saqtap qalamyz?

Qazaqstan • Búgin, 08:12

«Dostastyq vızasyn» engizýdi usyndy

Prezıdent • Búgin, 08:03

Taldyqorǵanda 5 myń aǵash otyrǵyzyldy

Aımaqtar • 12 Qazan, 2019

Keı óńirlerde aýa-raıy ózgeredi

Aımaqtar • 12 Qazan, 2019

Eń qysqa áńgime. Iesiz zyndan. Dıdar AMANTAI

Rýhanııat • 12 Qazan, 2019

Eń qysqa áńgime. Islam Qabyluly

Rýhanııat • 12 Qazan, 2019

Senatorlar senbilikke shyqty

Qazaqstan • 12 Qazan, 2019

Uqsas jańalyqtar