Qazaqstan • 14 Qazan, 2019

Basty maqsat – el halqynyń ómir súrý deńgeıin kóterý

20 retkórsetildi

Úkimet basshysynyń orynbasary Berdibek Saparbaev jumys saparymen Atyraý oblysyna bardy. Sapar aıasynda vıse-premer óńir jurtshylyǵynyń ókilderimen, medısına qyzmetkerlerimen kezdesti. Kezdesýde densaýlyq saqtaý jáne bilim berý júıelerin damytý, kóp balaly jáne az qamtylǵan otbasylardy qoldaý, sondaı-aq halyqtyń jumyspen qamtylýyn arttyrý jónindegi bıznes bastamalardy qoldaý máseleleri kóterildi.

Osy saparda B.Saparbaev pen Atyraý oblysynyń ákimi Nurlan Noǵaev óńir jurtshylyǵymen kezdesti. Vıse-premer óz sózinde el Prezıdentiniń Qazaqstan halqyna arnaǵan Joldaýyndaǵy qoıylǵan mindetterdi sheshýge baǵyttalǵan sharalar týraly baıandady. Onda aıtylǵandaı, negizgi maqsattardyń biri – otandastarymyzdyń ómir súrý deńgeıin kóterý. Jyl saıyn áleýmettik salany qarjylandyrý ósip keledi. Aǵymdaǵy jyly memleket bıýdjetiniń 45%-y densaýlyq saqtaý, bilim berý, mádenıet pen sport salalaryn qarjylandyrýǵa jumsaldy. Taǵy bir mańyzdy mindet – jalaqy deńgeıin kóterý. Bul másele Úkimettiń jyl saıynǵy kún tártibinen túspeı keledi.

«Az qamtylǵan, kóp balaly otbasylardy qoldaý kún tártibinen túspeıdi. Osy sanattaǵy otandastarymyzdy qoldaý úshin búginde bıýdjetten 147 mlrd teńge bólingen. Bul baǵytta 2 mln adam qamtyldy», dedi B.Saparbaev.

Osyndaı otbasylardyń óz isin ashyp, áleýmettik jaǵdaıyn jaqsartýy úshin memleket barlyq jaǵdaıdy jasaýda. 8 myńǵa jýyq adam óz isin bastap, 7 myń adam ataýly áleýmettik kómekti jeke sharýashylyǵyn damytýǵa jumsaǵan. 3,5 myńǵa jýyq kóp balaly otbasy grant aldy. Bul da áleýmettik jaǵdaıdy durystap, qoǵamdaǵy ahýaldy retke keltirýge septigin tıgizedi.

B.Saparbaev ataýly áleýmettik kómek berý týraly aıta kelip, qoldaý kórsetý masyldyq pıǵyldyń órshýine soqtyrmaý kerektigin de atap ótti. Sonymen qatar daryndy balalardy qoldaý kartasy men 2030 jylǵa deıin jasaqtalǵan balalardyń múddesine arnalǵan memlekettik saıasat týraly tujyrymdama jóninde  bólek áńgime qaýzady. Áleýmettik jaǵynan az qamtylǵan toptarǵa qarjylyq salmaqty azaıtýǵa baǵyttalǵan biraz sharýa atqaryldy. 500 myń otandasymyzdyń tutyný nesıeleri azaıtyldy.

Azamattyq qoǵamdy damytý da ózekti taqyryptardyń biri. B.Saparbaev aıtyp ótkendeı, qazir eki tujyrymdama ázirlenip jatyr. Olar – «Halyq únine qulaq asatyn memleket» jáne 2025 jylǵa deıingi azamattyq qoǵamdy damytý. Bul qujattar jyldyń sońyna deıin daıyn bolýy kerek.

«Memlekettik qyzmetkerler óz jurtshy­lyǵyna eleńdeýi kerek. Azamattardyń birde-bir ótinishi men shaǵymy qaraýsyz nemese jaýapsyz qalmaýy tıis», dep atap ótti Berdibek Saparbaev.

Ol bilim berý salasyndaǵy, pedagogtardyń quqyǵyn qorǵaý jónindegi atqarylǵan jumystarǵa da toqtalyp ótti.

«Bizde daryndy balalar óte kóp. Olar – eldiń bolashaǵy, olardy qoldaýymyz kerek», dedi B.Saparbaev.

Premer-Mınıstrdiń orynbasary Atyraý oblystyq perınataldyq ortalyǵynda bolyp, medısına mekemesiniń ujymymen kezdesý ótkizdi. B.Saparbaev Atyraý oblystyq densaýlyq saqtaý basqarmasynyń basshysy Mánshúk Aımurzıevadan jáne qoǵamdyq densaýlyq saqtaý departamenti basshysynan óńirdegi sábı óliminiń joǵary bolýy sebepterine túsinik berýdi ótindi.

«Bala men ana ólimi máselesi kún tártibindegi qatań baqylaýdaǵy ózekti másele. Jaǵdaı múldem ýshyǵyp ketti deýge bolmas. Toqsan saıyn ortalyqtyń mamandary otandyq jáne sheteldik medısına salasynyń bilikti qyzmetkerlerinen dáris alyp keledi. Mysaly, bıyl shilde aıynda 13 dáriger-neonatolog Nur-Sultan qalasyndaǵy medısınalyq ortalyqtardyń birinde biliktilikti arttyrý kýrstarynan ótti. Kásibı shyńdalý Perınataldyq ortalyqtyń dárigerleri Lıtva qalasyndaǵy oqýǵa barady. Bıyldyń ózinde ortalyqtyń qondyrǵylarmen jabdyqtalýy úshin 600 mln teńge bólindi», dedi Mánshúk Aımurzıeva.

Aıta keteıik, qańtar-qazan aılary araly­ǵynda Atyraý oblysynda 12 403 bala dúnıege kelgen, osylaısha sońǵy eki jyldaǵy týý kórsetkishi 500 sábıge kóbeıgen.

Qalyptasqan jaǵdaıdy ońtaılandyrý úshin Berdibek Saparbaev shuǵyl sharalardy qolǵa alýdy tapsyrdy.

Budan soń vıse-premer perınataldyq ortalyqtyń qyzmetkerine málimdeme jasady.

«Sizder Gıppokrat antyn berdińizder, sondyqtan bir mınýtqa da óz jumystaryńyzdy tastaýǵa, adamdardy emdeýdi toqtatýǵa bolmaıdy! О́z qyzmetterińizdi adal atqarýdy ótinemiz. Perınataldyq ortalyqtaǵy jaǵdaı­dy jeke qatań baqylaýǵa alýdy Atyraý obly­synyń basshylyǵyna tapsyramyn. Onyń ishinde medısınalyq mekemedegi anyqtalǵan kemshilikterdi joıý kerek. Qylmystyq isti tergeý zań talaptaryna saı júrgiziledi, jumys barysyna kedergi keltirmeıdi», dedi ol.

Sonymen qatar vıse-premer oryn alǵan jaǵdaıǵa baılanysty densaýlyq saqtaý basqarmasynyń jáne qoǵamdyq densaýlyq saqtaý departamentiniń basshylaryn jaýapkershilikke tartý máselesin qaraýdy tapsyrdy.

Halyqqa medısınalyq qyzmet kórsetý sapasyn arttyrý máseleleri oblystyq aýrýhanany aralaý barysynda jalǵasty. Munda Berdibek Saparbaev mindetti áleýmettik medısınalyq saqtandyrý máselesine qatysty keńes ótkizdi.

Vıse-premerdiń sózine qaraǵanda, mindetti áleýmettik medısınalyq saqtandyrýdy engizýmen qatar, kórsetiletin medısınalyq qyzmetterdiń sapasyn arttyrý da mańyzdy.

«Elbasy men Memleket basshysy densaýlyq saqtaý salasy qyzmetteriniń qoljetimdiligi men sapasyn kóterýge qatysty naqty tapsyrmalar berdi. Bul jerde basty nazardy «Dıplommen – aýylǵa!» baǵdarlamasyna aýdarý kerek. О́ıtkeni medısına salasy eń aldymen aýyldyq jerde aqsap otyr. Jas mamandarǵa baspana men jalaqydan bastap, barlyq jaǵdaı jasalýy kerek», dedi B.Saparbaev.

Keńes qorytyndysy boıynsha Berdibek Saparbaev mindetti áleýmettik medısınalyq saqtandyrý júıesin engizýge arnalǵan jumys­tardy jedeldete túsip, turǵyndar mártebesin naqty­laý, ony aqparattandyrý jumystaryn jalǵas­tyra berýdi tapsyrdy.

Atyraýda B.Saparbaev «Kórpe Fest» festı­valine qatysqanyn da aıta keteıik. Festı­valdyń maqsaty – ulttyq ónerdi nasıhattaý, álemge qolónerdiń básekege qabilettiligin kórsetý, qazaqstandyq qolóner kásibin damytý. Fes­tıval aıasynda kóp balaly, az qamtylǵan, jumyssyz áıelder úshin dástúrli qolóner bo­ıynsha úsh kúndik tegin sheberlik synyptary ótkizildi. Konkýrs qorytyndysy boıynsha 25 úzdik qatysýshyǵa tigin mashına syıǵa tartyldy.

«7-8 balaly analardyń ulttyq qolónerdiń arqasynda óz eńbekterimen tabys taýyp otyrǵanynyń kýási boldyq, olardyń kópshiligi ataýly áleýmettik kómekke muqtaj emes. Qol­óner kýrsynan ótken áıelder óz isterin ashyp jatyr, ýaqyt óte kele otbasylyq bızneske aınaldyrýda. Bul keremet. Bul úlken eńbek», dedi Premer-Mınıstrdiń orynbasary.

Sońǵy jańalyqtar

Kúlki kerýeni № 16

Rýhanııat • Keshe

Aqynǵa arnalǵan kún

Rýhanııat • Keshe

Qalany damytý qujaty daıyn

Aımaqtar • Keshe

Baspanamen qamtıtyn basty qujat

Baǵdarlamalar • Keshe

Er Edige jáne eldik múdde

Rýhanııat • Keshe

Bolmysy bútin Baǵaev

Rýhanııat • Keshe

Uqsas jańalyqtar