Qazaqstan • 16 Qazan, 2019

Qurylysshylar nege ereýilge shyqty?

19 retkórsetildi

Almatyda kópir qurylysshylary jylǵa jýyq jalaqy almaǵandyqtaryn aıtyp ereýilge shyqty. Shahardaǵy Rysqulov dańǵyly men Emsov kóshesiniń qıylysyndaǵy kópir ústine shyǵyp narazylyq bildirgen jumysshylar bazynalaryna bas qatyrmaıtyn kompanııa basshylaryna qapaly. Ereýildetken jumyskerler tobynyń sýretteri áleýmettik jelilerge jappaı taraǵan bolatyn.

Ańdaǵanymyzdaı, qoǵam nazaryn ózderine aýdarǵan bul azamattar qala­da­ǵy Rysqulov pen Emsov kósheleriniń qıylysyndaǵy qurylysy saǵyzsha sozy­lyp, bul kúnde turalap qalǵan aspaly jolda jumys istegen eńbekkerlerdiń bir toby ǵana. Olardyń sapynda 8-9 aı boıy eńbeginiń óteýin ala almaı júrgender bar. Olar «Qansha ýaqyttan beri ýádege toıdyq, mundaı jaǵdaıǵa qaryn ashyp, qadir qashqannan bardyq» dep otyr. Aıtýlarynsha, alyp kompanııa olarǵa osy aıdyń 11-ne deıin jala­qylary tolyq tólenetinin ýáde etken. Alaıda «ákimdik aqsha aýdarmaı jatyr» degen jeleýmen jalaqy jaıy taǵy da keıinge shegerilipti. Jaǵdaıǵa qatysty túsinikteme bergen jergilikti bılik ókilderi merdiger fırma aldynda eshqandaı qaryzymyz joq degen bolatyn.

 – Kimge senerimizdi bilmeı dal bol­dyq. Búgin munda narazylyǵymyzdy bildi­rip Almaty mańynda turatyn 32 azamat qana kelip otyrmyz. Bizge «A. Rıazanov atyndaǵy №25 kópir qurylysy jasaǵy» kompanııasy 18,3 mln teńge qaryz. Bizden bólek basqa óńirlerden kelip jumys istegen qanshama qurylysshylar bar. Qolymyzda 102 azamattyń tizimi tur. Kompanııa olardyń árbirine orta eseppen 1 mln teńgeden bereshek. О́zim 1 mln 200 myń teńge kóleminde eńbekaqymdy ala almaı sendelip júrmin. Barmaǵan jer, baspaǵan taýymyz qalmady. Áne-mine, búgin-erteńge salyp ýáde berip shyǵaryp salady. Qanshama ýaqyttan beri adal eńbegimizdiń aqysyn ala almaı ábigerge tústik, – deıdi qurylysshy Aslan Jábráıilov.

Aslan buǵan deıin 5 jyl qatarynan atal­ǵan kompanııanyń quramynda jumys istegenin, degenmen buryndary jala­qylary azar bolsa 1-2 aıǵa ǵana keshigetinin, bul joly máseleniń sıyr­quıym­shaqtanyp ketkenine qatty alań­dap júrgendikterin aıtady.

 Jumysshylardan túsinistik tanytýdy ótingen merdiger kompanııanyń basshysy mundaı túıtkilder kez kelgen mekemede bolatynyn, son­dyq­tan qyz­met­kerlerinen jaǵdaıdy ýshyq­tyr­maı aı sońyna deıin kútýlerin surady.

«Búginge deıin qur alaqan otyrǵan joqpyz. Kórip otyrǵandaryńyzdaı, jumys toqtap qaldy. Ákimdikten eki aıǵa ǵana qarajat tústi. Endi tehnıkalarymdy satýǵa májbúrmin. Qurylysshylar sotqa berse óz jalaqylaryn óndirip ala alady. Kishkene sabyrlyq suraımyn. Aǵymdaǵy aıdyń 29-30 kúnderi jalaqy tólenedi» dedi kompanııa dırektory Tımýr Nakýsov.

Oqıǵa ornyna jetken eńbek qaýip­siz­di­gin baqylaý bóliminiń basshylyǵy men Almaty qalasynyń áleýmettik ál-aýqat basqarmasynyń ókilderi qyzmetkerlerge eńbek zańnamasynyń normalary tur­ǵysynda túsindirý jumystaryn júr­giz­di. Jaýapty mamandar atalǵan fakti boıynsha Almaty oblysynyń eńbek ınspeksııasy tarapynan jospardan tys tekseris júrgizilgenin, jumys berýshi tarap ákimshilik jaýapkershilikke tartylatynyn atap ótti.

«Buzýshylyqtardy joıý týraly uıǵarymdar berildi. Búginde nusqamalar oryndalmaǵan. Tekserý materıaldary QR QK 152-baby boıynsha sheshim qabyl­daý úshin quqyq qorǵaý organdaryna jiberildi», dep habarlady qala ákimdigi. Joǵaryda tilge tıek etkenimizdeı, vedomstvoda olardyń tapsy­rys berýshiler retinde merdiger uıym­nyń basshylyǵymen tolyq esep aıy­rysqany aıtylǵan.

Ázirge ózara kelisimge kelgen taraptar mámilemen tarqasqandaı boldy. Dese de sabyry sarqylyp, tózimi taýsylǵan qurylysshylar aı sońyna deıin kezekti ýáde oryndalmasa taǵy da bas kóterip, adal eńbegimizdi daýlap talaı tabaldyryqty tozdyramyz dep otyr. Jurtty ábigerge salǵan eńbek daýy kóp uzamaı oń sheshimin tabady degen senimdemiz.

 

 

ALMATY

 

Sońǵy jańalyqtar

VII PR forýmy Almatyda ótti

Aımaqtar • Búgin, 10:45

Fermerdiń maýsymdyq tabysy qansha?

Aımaqtar • Búgin, 09:51

Jánibek aýdanynda et óndirý artty

Aımaqtar • Búgin, 09:26

MRT alýǵa jarty mıllıard jumsalǵan

Aımaqtar • Búgin, 09:21

Bas basylymnyń baıtaq belesi

Aımaqtar • Búgin, 09:08

Qaıta oralǵan qumarshyq

Aımaqtar • Búgin, 07:54

Termeshiler tereńnen terbedi

Ádebıet • Búgin, 07:52

Túrik kınolary tegin kórsetiledi

Qoǵam • Búgin, 07:47

«Arý» – kóz arbaǵan kórkemdik álemi

Rýhanııat • Búgin, 07:45

Haziretter qazynasy

Rýhanııat • Búgin, 07:43

«Speshranda» saqtalǵan...

Rýhanııat • Búgin, 07:26

«Tákappar eken qulja alma»

Qoǵam • Búgin, 07:23

Zań kerek!

Ekologııa • Búgin, 07:20

El qurmeti erekshe

100 • Búgin, 07:14

It júgirtip, qus saldy

Aımaqtar • Búgin, 07:12

Senim hám serpin

Rýhanııat • Búgin, 07:09

Ekologııany qorǵaýǵa adaldyq kerek

Ekologııa • Búgin, 07:03

Ǵarysh salasy jańa deńgeıge kóteriledi

Tehnologııa • Búgin, 06:38

Parasattylyq – basty nazarda

Aımaqtar • Búgin, 06:30

Hat qorjyn (14.11.2019)

Ádebıet • Búgin, 06:28

Kúrish suryptary suıylyp barady

Ekonomıka • Búgin, 06:24

Sıpaty bólek kýálik

Qoǵam • Búgin, 06:14

Altyn Adam Afınada

Qazaqstan • Keshe

Uqsas jańalyqtar