Úkimet • 19 Jeltoqsan, 2019

Úkimet Densaýlyq saqtaýdy damytýdyń 2020-2025 jyldarǵa arnalǵan memlekettik baǵdarlamasyn bekitti

153 ret kórsetildi

Premer-Mınıstr Asqar Mamınniń tóraǵalyǵymen ótken Úkimet otyrysynda Densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasyn iske asyrý qorytyndylary jáne 2020-2025 jyldarǵa arnalǵan jobasy qaraldy. Bul týraly Premer-Mınıstrdiń baspasóz qyzmeti habarlady.

Densaýlyq saqtaý mınıstri E. Birtanov ótken kezeńde qol jetkizilgen nátıjeler jáne jańa Memlekettik baǵdarlamanyń negizgi baǵyttary týraly, Ulttyq ǵylymı kardıohırýrgııalyq ortalyqtyń basqarma tóraǵasy Iý. Pıa medısınalyq qaýymdastyqtyń pozısııasy týraly baıandady. 

3 jyl ishinde «Densaýlyq» memlekettik baǵdarlamasyn iske asyrýǵa shamamen 513 mlrd teńge bólindi. Elimizde negizgi medısınalyq-demografııalyq kórsetkishter jaqsardy, ortasha ómir súrý uzaqtyǵy 73 jasqa jetti.

«Tuńǵysh Prezıdent – Elbasy Nursultan Ábishuly Nazarbaev medısınalyq kómektiń sapasyn jaqsartý, alǵashqy medısınalyq-sanıtarııalyq kómekke jumsalatyn shyǵystardy 60%-ǵa deıin ulǵaıtý boıynsha naqty tapsyrmalar berdi. Memleket basshysy Qasym-Jomart Kemeluly Toqaev aýrýlardyń aldyn alý jáne salaýatty ómir saltyn nasıhattaý boıynsha sharalar qabyldaýdy, medısınalyq uıymdardyń qadamdyq qoljetimdiligin qamtamasyz etýdi tapsyrdy», dedi A. Mamın.

Úkimet basshysy jańa Memlekettik baǵdarlama aıasynda halyqty salaýatty ómir saltyna beıimdeý úshin qoǵamdyq densaýlyq saqtaý qyzmeti jańǵyrtylatynyn atap ótti. Jalpy salaýatty ómir salty mádenıetin qalyptastyrýǵa baǵyttalǵan sharalardy keńeıtý josparlanǵan. 

«Medısınalyq kómek sapasyn arttyrý, densaýlyq saqtaýdyń biryńǵaı sıfrlyq keńistigin qurýdy aıaqtaý boıynsha sharalar qabyldanady. Ol úshin aýrýlardy erte anyqtaýǵa yntalandyrý maqsatynda emhanalar men aýrýhanalardy qarjylandyrý jetildiriledi», dedi A. Mamın. 

Premer-Mınıstr barlyq óńirlerde medısınalyq qyzmet kórsetýdiń jańa tehnologııalary engizilip jatqan alǵashqy medısınalyq kómek kórsetýdiń ozyq tájirıbe ortalyqtaryn damytý jalǵasatynyn atap ótti. 

Medısına qyzmetkerleriniń statýsyn arttyrý úshin medısınalyq kadrlyq resýrstardyń ulttyq júıesi qurylady.

«Dárigerler men meıirbıkelerdiń jalaqysy orta eseppen 2 ese artyp, olardy áleýmettik qoldaý sharalary kúsheıtiledi, sondaı-aq kásibı jaýapkershilik sharalary da kúsheıtiledi. Jalpy bir dárigerdiń júktemesi Ekonomıkalyq yntymaqtastyq jáne damý uıymynyń deńgeıine deıin azaıady (1500 adamǵa 1 dáriger)», dedi A. Mamın. 

Úkimet basshysy medısına salasyndaǵy ınvestısııalyq ahýaldy túbegeıli jaqsartý jáne jobalyq basqarýdy engizý josparlaryn atap ótti.

«Alǵash ret salaǵa 2,8 trln teńge qarjy bólý josparlanǵan, sonyń ishinde, 2,2 trln jeke ınvestısııalar. Osy qarajat esebinen 431 densaýlyq saqtaý obektisi salynady, onyń ishinde 10 myń orynǵa arnalǵan, halyqaralyq deńgeıdegi 19 kópsalaly aýrýhana memlekettik-jekeshelik áriptestik mehanızmi arqyly salynady. Bul aýrýhanalardaǵy emdeý oryndaryn 50%-ǵa ulǵaıtýǵa, medısınalyq nysandarynyń tozýyn 56%-dan 38%-ǵa deıin azaıtýǵa múmkindik beredi», dedi A. Mamın.

Premer-Mınıstr osy sharalardyń barlyǵy medısınalyq ınfraqurylymdy jaqsartýǵa jáne aýrý-syrqaýdyń deńgeıin azaıtýǵa jáne qazaqstandyqtardyń ortasha ómir súrý uzaqtyǵyn 2025 jylǵa qaraı 75 jasqa deıin jetkizýge yqpal etetinin atap ótti.

Sońǵy jańalyqtar

«Inter» – jartylaı fınalda!

Sport • Búgin, 02:50

Tashkent tragedııasy

Sport • Keshe

Uqsas jańalyqtar