Aımaqtar • 01 Qańtar, 2020

Kaınozoıdan jetken balyq

139 retkórsetildi

Balyqtardyń ejelgi «babasynyń» qańqasy Sokolov-Sarybaı ken óndirý birlestigine qarasty Qashar kenishinen tabyldy. Ekskavator shómishine tutas ilingen qańqany baıqasymen kenshiler sazǵa aralasyp qatyp qalǵan qańqa súıekti aman alyp qalýǵa tyrysty. Saz balshyqqa jabysqan qańqa súıektiń omyrtqalary aıqyn kórinedi.

– Kendi arshyǵanda ejelgi janýar­lardyń omyrtqasy, taǵy basqa súıek­teriniń synyǵy ekskavator shómishine ilinip qalady. Al ótken ǵasyrdyń 80-jyldarynan bastap osy geologııa salasynda júrgen meniń tájirıbemde birinshi ret qańqa tutas qolymyzǵa tıdi. Topyraq qyrtysyna baılanysty ǵoı, qumdaýyt jerlerdegi qańqalar durys saqtalmaıdy. Qańqa saz balshyqta jatyr, sondyqtan tutas shyqty. Biraq biz qansha tyrysqanymyzben balyq qańqasynyń quıryq jaǵy saz balshyqpen birge synyp túsip qalypty, – deıdi ken alybynyń bas geology Nıkolaı Solomın.

Geologtardyń aıtýyna qaraǵanda,olja kenishtiń 45 metr tereńdiginen tabylǵan. Al teńiz deńgeıinen alǵanda 150 metr­deı bolady. Tabylǵan súıektiń turqy bir jarym metrden aspasa, kem emes. Biz bul jańalyqtyń jaı-japsaryn bilý úshin bıolog Andreı Andrıýshenkoǵa habarlastyq.

– Men osy habardy estisimen onyń sapaly túsirilgen sýretin alyp, almatylyq áriptesim, poleontolog Dmıtrıı Malahovqa habarlasqan edim. «Bul súıek árıne, ejelgi kesirtkelerdiń bir túri nemese basqa janýar emes, balyq ekeni aıqyn. Biraq jasyn, balyqtyń qaı túrine jatatynyn tek ol tabylǵan tereńdiktiń topyraq qyrtysyn zertteýden keıin aıtýǵa bolady», dedi Dmıtrıı. Men de áriptesimniń sózine tolyq qosylamyn, zerttemeı turyp, sýretke qarap pálendeı qorytyndy jasaýǵa bolmaıdy, – dedi Andreı.

Al ken kásipornynyń bas geology  Nıkolaı Solomın balyqtyń jasyn aıtýǵa batyldyq jasady.

– Árıne bıologtardyń sózine qo­sylamyn. Balyqtyń qaı túri, taǵy basqa aqparattardy aıtý olardyń enshisinde. Alaıda, bul tabylǵan janýardyń jasyna baılanysty pikir aıta alamyn. Sebebi geologııada áńgime aldymen  jer qyrtystary týraly bolady ǵoı. Biz tapqan qańqa poleogendik ekeni aıqyn. Ol tabylǵan jer qyrtysy bizdiń dáýirge jaqyn, ıaǵnı 20 mıllıon men 60 mıllıon jyldar arasy. Balyqtyń jasy kem degende 20 mıllıon jyl bolady, ıaǵnı qańqa kaınozoı dáýirine tıesili, – dedi Nıkolaı Ivanovıch.

Bıologtar óz sózin aıta jatar. Qashar balyǵynyń qańqasy jergilikti mýzeı sóresinen oryn alady.

 

Qostanaı oblysy,

Rýdnyı qalasy

Sońǵy jańalyqtar

Tiri maldy satý - tıimsiz

Aımaqtar • Keshe

Uly Abaı murasy Kereký elinde

Rýhanııat • Keshe

Abaıdy taný – asyl paryz

Rýhanııat • Keshe

Uqsas jańalyqtar