Qoǵam • 15 Qańtar, 2020

Krıvogýzdan Qasymnyń desi basym

146 retkórsetildi

Bul kúnde kóshe nemese eldi meken ataýlaryn ózgertý ótkirdiń júzindeı qylpyldap-aq turǵan sharýa boldy. Bylaı júrseń ógiz ólip, bylaı tartsań arbań synatyndaı kóringenmen, bul sharýany báribir de birjaqty etpeske bolmaıdy. Mán-maǵynasy ulttyq múdde kózqarasymen múlde qabyspaıtyn kerataýlardan qutylatyn kez de áldeqashan jetken. Iá, az-maz qarajattyń sheti kertilýi múmkin. Biraq odan qazyna ortaıyp qalmas. Bul jerdegi másele ulttyq sananyń namys otynan qýat alyp, rýh erkindiginiń ushar bıigine kóterilýinde jatsa kerek.

Kúni keshe, osy maqsat jolynda Qaraǵandydaǵy «Dostyq úıinde» oblys ortalyǵyndaǵy kóshelerdiń ataýlaryn ózgertýge baılanysty kópshilik tyńdaý uıymdastyryldy. Qoǵamdyq mańyzy zor sharaǵa adamnyń kóp jınalǵany sonshalyqty, olardyń kóbi 400 oryndyq negizgi zalǵa syımaı, ishte bolyp jatqan pikirtalasty syrtta otyryp ekrannan tamashalady.

Kún tártibinde kenshiler astanasyndaǵy 10 kósheniń ataý­yn aýystyrý máselesi turdy. Onyń ishinde qaladaǵy basty kóshelerdiń biri – atyshýly Lenın kóshesi de bar edi. Sonymen qatar bul tizimge Prıkanalnaıa, Krıvogýz, Zashıtnaıa, Zonalnaıa, Olımpııskaıa, Volochaevskaıa, Kývskaıa, Amanjolov, Nurjanov syndy kósheler de kirgen bolatyn.

Jıyn barysynda zııaly qaýym ókilderi, qoǵam belsen­dile­ri jáne kóshe ataýlaryn óz­ger­týge qarsy toptyń músheleri sóz alyp, pikir talastyrdy. My­saly, belgili aqyn Serik Aqsuń­qar­uly, qoǵam belsendileri Aıtqoja Fazyl men Jeksen Ábdirah­manov, tarıhshy Záýresh Saqtaǵanova ózgeristerdiń ýaqyty jet­kenin, bul iste endi jaltaq­taý­dyń esh qajeti joqty­ǵyn árgi-bergi tarıhtan mysal­dar keltire otyryp, kópshiliktiń kókeıindegini tap basyp aıtty.

О́zge ult ókilderiniń de ózger­týdi jaqtap, ún qosqanyn aıta ketken lázim. Mysaly, Qazaqstan halqy Assambleıasynyń janyn­daǵy «Jańǵyrý joly» jastar qoz­ǵalysynyń belsendi múshesi Elızaveta Sedysheva men «Da­kııa» rýmyn mádenıeti qoǵamy» qoǵamdyq birlestigi jastar qanatynyń jetekshisi Aleksandr Ýrmashov qoǵam belsendileriniń bastamasyn sanaly túrde qol­daıtyndyqtaryn bildirdi.

Pikirtalas kezinde «Kóshe ataýlaryn aýystyrýǵa qyrýar aqsha jumsaǵansha, sol qarjyny qalanyń kem-ketigin túzeýge jumsasa bolmas pa edi?» degen syńaıdaǵy qarsy pikir aıt­qan­dar da boldy. Mundaı pikir ıe­lerine qarata belgili kásipker, «Nátıje» sút kompanııasynyń basshysy Erlan Áshim ataýlardy aýystyrýǵa ketetin shyǵyn­nyń bárin ózi basqaratyn kásip­orynnyń kóterip alýǵa daıyn ekenin málimdedi.

Son­daı-aq top ishinen áleýmettik jelide júrgizilgen saýalnamada kóshe ataý­laryn ózgertýge qarsy bolǵandar da bar ekenin aıtty. Buǵan jıyn­­dy júrgizip otyrǵan qalalyq más­l­ı­hattyń hatshysy Qudaıbergen Bek­sul­tanov bylaı dep kesimdi jaýa­byn berdi: «Ǵalamtordaǵy saýal­namaǵa qatysqan adamdardyń kim ekenin biz bilmeımiz. Múmkin olar basqa memlekettiń azamattary shy­ǵar? Bálkim, feık-akkaýnt bolar? Son­dyqtan ol esepke alynbaıdy».

Sonymen, qoǵamdyq tyńdaýǵa jıyl­ǵan qaraǵandylyqtar ózgeris­terdi qoldap, Lenın kóshesiniń – Abaı Qunanbaıuly, Prıkanalnaıa kóshesiniń – Saryarqa, Krıvogýz kóshesiniń – Qasym Amanjolov, Zashıtnaıa kóshesiniń – Grıgorıı Potanın, Zonalnaıa kóshesiniń – Aleksandr Zataevıch, Olımpııskaıa kóshesiniń – Narmanbet Tólepov, Volochaevskaıa kóshesiniń – Kamalı Dúısembekov, Kývskaıa kóshesiniń – Qazybek Nurjanov, Amanjolov kóshesiniń – Balqantaý jáne Nurjanov kóshesiniń Mereı kóshesi bolyp aýys­tyrylýyna biraýyzdan daýys berdi.

Kópshilik tyńdaýdy júrgizýdiń jaýapkershiligin moıynyna alǵan  Qudaıbergen Beksultanovtyń aıtýynsha, tártip boıynsha jıyn hattamasy qalalyq máslıhattyń kezekten tys sessııasynda qaralǵannan keıin baryp tıisti sheshim qabyldanýy kerek eken. Odan ári ol sheshim Qaraǵandy oblystyq máslıhatynyń sessııasy men oblystyq onomastıka komıssııasynda bekitilýi tıis. Bekitilgen sheshim respýblıkalyq onomastıka komıssııasynyń qaraýyna jiberilip, ol jaqtan kelisim berilgen jaǵdaıda, qorytyndy qujat BAQ-tarda jarııa­lanady. Iаǵnı, munyń bárine ýaqyt kerek bolady. Qalalyq máslıhattyń hatshysy qansha ýaqyt qajet bolatynyn naqty aıta almasa da, bul úderistiń mamyr aıyna deıin sozylýy bek múmkin ekenin eske saldy.

Jasyratyny joq, osy bastamaǵa baılanysty áleýmettik jelilerdi alataıdaı búldirgisi kelgender de boldy. Bulardyń kelmeske ketken kommýnıstik kezeńniń kún kósemin shyr-pyr bolyp qorǵaǵanyn tarıhqa degen ózderinshe qurmeti ǵoı dep qabyl­daǵan kúnniń ózinde «Prı­kanalnaıa», «Zonalnaıa» degen mán-maǵynadan maqrum ataýlardyń qazaqy­lanǵany úshin  de ertoqymyn baýyryna ala týlaǵan qylyqtary eriksiz qaıran qaldyrdy...  Degenmen, bul sanattaǵy jerlesterimizdiń dáýreni ótken ambısııadan birjolata arylyp, kópshiliktiń pikirimen erte me, kesh pe, túbi sanasaryna senim bildirgimiz-aq keledi. Bul degenińiz, eń aldymen ortaq shańyraq astyndaǵy tonnyń ishki baýyndaı tatý-tátti turyp jatqan qazaqstandyqtar bola­shaǵynyń jarqyn bolmaǵy úshin kerek dúnıe. «Yrys aldy – yntymaq» dep halqymyz tegin aıtpaǵan ǵoı!

Bul kúni «Dostyq úıinen» shyq­qan qandastarymyzdyń qýany­shynda shek bolmady. Eńsesi tik­telip, rýhy kóterilgen jurt bórkin aspanǵa atyp, bir-birin quttyqtap jatty. Dese de, kóptiń kókeıinde Qaraǵandy qala­syndaǵy Oktıabr aýdanyn Alash­tyń kósemi Álıhan Bókeıhannyń aty­men atalar kúndi kórsek degen arzý  armannyń da jatqany anyq edi.

 

QARAǴANDY

 

Sońǵy jańalyqtar

Almaty jasyl qalaǵa aınalady

Ekologııa • 17 Qańtar, 2020

Elimizde UFC TV telearnasy iske qosyldy

Sport • 17 Qańtar, 2020

Tátti ómirdi tárk etkender (vıdeo)

Vıdeo • 17 Qańtar, 2020

Kókshetaýda beti ashyq qudyq kóp

Aımaqtar • 17 Qańtar, 2020

Shymkentte Poezııa minberi ashyldy

Rýhanııat • 17 Qańtar, 2020

Bulandydaǵy berekeli is

Aımaqtar • 17 Qańtar, 2020

Mal baqqanǵa bitedi...

Aımaqtar • 17 Qańtar, 2020

Batys Qazaqstanda jańa jobalar maquldandy

Aımaqtar • 17 Qańtar, 2020

Kýveıt týrnırinde top jardy

Sport • 17 Qańtar, 2020

Gran-prı jarysyna qatysady

Sport • 17 Qańtar, 2020

Ekinshi qolany qorjynǵa saldy

Sport • 17 Qańtar, 2020

Atqa miný mádenıetin nasıhattady

Qoǵam • 17 Qańtar, 2020

Uqsas jańalyqtar