Aımaqtar • 16 Qańtar, 2020

Maqtaaralda dıqanshylyq bastaldy

420 retkórsetildi

Túrkistan oblysy Maqtaaral aýdanynyń eńbekqor sharýalary qańtardyń qaq ortasynda dıqanshylyqty bastap jiberdi. Erte ónim beretin qyryqqabat daqylyn egý naýqanyna qazirdiń ózinde 10-nan astam brıgada qatysyp, qyzý jumystar júrip jatyr. Bul týraly Maqtaaral aýdany ákimdiginiń baspasóz qyzmeti habarlady.

Qańtardyń jaýyn-shashynyna qaramastan egistik alqapta jumys istep jatqan dıqandardyń jaı-kúıinen habar alý úshin Maqtaaral aýdany Maqtaaral aýyldyq okrýginiń ákimi Álim Ibraev «Dúısenbek» sharýa qojalyǵyna bardy. Serik Sádýovtiń basshylyǵyndaǵy qojalyqtyń enshisinde 4,5 gektar jer bar bolsa, sonyń barlyǵyna qyryqqabat daqyly egilip jatyr eken. 60 adamnan quralǵan brıgada qańtardyń árbir kúnin paıdalanyp, jaýyn-shashynǵa qaramastan jumys istep jatyr.

«Jumysshylarǵa kúnine 3200 teńgeden eńbekaqysyn tólep otyrmyz. Negizinen 2 aıdyń kóleminde ekken eginimiz pisip, jetiledi. Sondaı-aq 90 kúnde jetiletin sortyn da ektik. Egilgen kóshettiń ústin japqyshpen jaýyp, jaýyn-shashynnan qorǵaımyz. Eń bastysy – kútip-baptaýǵa úlken mán berilýi kerek» dedi S.Sádýov.

Maqtaaraldyq dıqandar negizinen salmaǵy 1-1,5 keliden aspaıtyn qyryqqabattyń pandıon, rında, farao suryptaryn otyrǵyzyp jatyr. Erte pisetin ónim túrine eýropalyqtar men reseılikter tarapynan suranys kóp. Qazirdiń ózinde Maqtaaral aýyldyq okrýginde 50 gektardan astam jerge qyryq qabat egilip úlgergen.

Jalpy, qyryqqabat daqyly erte pisetindikten, maqtaaraldyq dıqandar onyń sońynan qaýyn-qarbyz, maqta, taǵy da basqa daqyldar egýge kirisedi. Osylaısha, jer emgen sharýalar 1 jylda eki ret, tipti úsh ret ónim alady. Byltyr sáýir aıynda alǵashqy ónimin alǵan dıqandar respýblıkanyń birneshe oblysyn jáne Reseı Federasııasyn qyryqqabatpen qamtamasyz etken bolatyn.

Aıta keteıik, Maqtaaral aýdanynda 2019 jyly 50 myń tonnaǵa jýyq kókónis ónimi qambaǵa jınalǵan. Al onyń basym bóligi qyryqqabat ónimi bolatyn.

Sońǵy jańalyqtar

Jazyǵy joq kóktemniń

Ádebıet • Keshe

Uqsas jańalyqtar