Úkimet • 19 Qańtar, 2020

Aýyl mektepterinde pılottyq joba iske qosylady

148 ret kórsetildi

Berdibek Saparbaev elordadaǵy Nazarbaev zııatkerlik mektebine bardy. Bul týraly Premer-Mınıstrdiń baspasóz qyzmeti habarlady.

Vıse-premer oqý úderisimen, oqýshylardyń jetistikterimen tanysyp, bilim berý salasyndaǵy ozyq ınnovasııalyq tehnologııalar qoldanylatyn ózin-ózi taný, nanotehnologııalar, bıotehnologııalar kabınetterin, qysh sheberhanasyn jáne zerthanalardy aralap kórdi.

«NZM» DBBU basqarma tóraıymy Kúlásh Shámshıdınova aǵymdaǵy qyzmeti men damý perspektıvalary týraly aıtyp berdi.

Sondaı-aq NZM basshysy qala jáne aýyl mektepteri arasyndaǵy bilim berý sapasyndaǵy alshaqtyqty qysqartýǵa baǵyttalǵan «Aýyl mektebi» jobasymen tanystyrdy.

Joba aıasynda aýyldyq jerlerdegi mektepterdiń kúshti jáne álsiz jaqtaryna, sondaı-aq olardyń qajettilikterine taldaý júrgizý josparlanyp otyr. Ázirlengen usynystardy eskere otyryp, aýyldyq mektepterdegi bilim berýdiń sapasy men materıaldyq-tehnıkalyq bazasyn jaqsartý jóninde keshendi sharalar qabyldanatyn bolady.

Berdibek Saparbaev usynylǵan jobany maquldap, Bilim jáne ǵylym mınıstrligine ony Qaraǵandy, Qyzylorda jáne Shyǵys Qazaqstan oblystarynda pılottyq rejımde iske asyrýdy tapsyrdy.

«Memleket basshysy qaladaǵy jáne aýyldaǵy bilim berý deńgeıindegi aıyrmashylyqtardy barynsha qysqartýdy, balalardyń sapaly bilimge qol jetkizýin qamtamasyz etýdi tapsyrdy. Bul problemany sheshý úshin bizge NZM respýblıkalyq jelisiniń ozyq tájirıbesin paıdalaný qajet. Bizdiń maqsatymyz – balalardyń jan-jaqty damýyna, olardyń shyǵarmashylyq qabiletteri men kreatıvti oılaýyna barynsha qolaıly jaǵdaı jasaý. Mektep qabyrǵasynan bastap balalarda óz talanttaryn ashýǵa múmkindik bolýy tıis» dep atap ótti B. Saparbaev.

Sondaı-aq keńes barysynda EYDU oqýshylardyń bilim jetistikterin baǵalaý jónindegi halyqaralyq baǵdarlamasy (PISA) aıasynda Qazaqstannyń kórsetkishterin jaqsartý máseleleri talqylandy.

Budan ózge, Berdibek Saparbaev L. Gýmılev atyndaǵy Eýrazııa ulttyq ýnıversıtetiniń jáne Halyqaralyq týrızm jáne qonaqjaılylyq ýnıversıtetiniń jumysymen tanysty.

 

Sońǵy jańalyqtar

Qazaqstanda dollar qymbattady

Ekonomıka • Keshe

Uqsas jańalyqtar