Qoǵam • 22 Qańtar, 2020

Aqtyq saparǵa shyǵaryp saldy

43 retkórsetildi

О́miriniń sońyna deıin antyna adal bolyp, betpe-bet kelgen ajaldan qaımyqpaǵan er júrek ulmen qoshtasý rásimi marqumnyń týǵan jeri Áýlıekól aýdanyna qarasty Lavrentev aýylynda ótti. Qaraly jıynda Ishki ister mınıstriniń orynbasary Alekseı Kalaıchıdı marqumnyń ata-anasy men týys­taryna kóńil aıtyp, qaıǵylaryna ortaqtasty.

– О́kinishke qaraı, táýelsizdik jyldary qyzmettik boryshyn atqarý barysynda 791 polısııa qyzmetkeri mert boldy. Dar­hannyń mezgilsiz qazasy sizderge ǵana emes, el tynyshtyǵyn oılaǵan bar­­sha halyqqa ortaq qaıǵy. Ishki ister mınıstrligi aldaǵy ýaqytta marqumnyń otbasyna qoldaý kórsetetin bolady. Beı­bit ómir kúzetinde naǵyz erliktiń úlgisin kórsetken  Darhan Bazarbaevtyń esimi Qazaqstan polısııasynyń tarıhynda máńgi qalady, – dedi mınıstr orynbasary.

IIO Ardagerler keńesiniń tóraǵasy О́mirzaq Bolsambekovtiń: «Qurmetti Serik baýyrym, Láz­zat, Móldir! Qur­metti jerles­ter! Keshe ǵana ortamyzda jú­rip, qylmysqa qarsy kúresip, qo­­ǵam­dyq tártipti nyǵaıtýǵa úles qo­syp júrgen, antyna berik ulymyz qyl­­myskerdiń qolynan qaza taýyp, ómirden ozdy. Serik, aınalaıyn! О́sir­diń, baqtyń, qaqtyń. Bizdiń qata­rymyzǵa qyzmetke keldi. Bul orny tolmas qaıǵy! Biz – mınıstrden bastap, búkil ishki ister organdarynyń quramy sizderdiń qaı­ǵylaryńa ortaqpyz. Darhan balamyz­dyń batyrlyǵy  men jarqyn beınesi máńgilik  este qalady!» – dep egile sóılegen sózi qabyrǵasy qaıysqan qaraly kópshilikti tebirentip ótti.

Qaraly mıtıngte sóz alǵan Qostanaı oblysy ákiminiń orynbasary Sergeı Kar­plıýk  Darhannyń esimin jerlesteri eshqashan umytpaıtynyn aıtty.

 Oblystyq Polısııa departamentiniń basshysy Beket Aıtmaǵambetov:

– Darhan óte jas ketti. Sońynda talaı armany oryndalmaı qaldy. Ata-anasy, aıaýly jary, kishkentaı uly qaldy.  Orny tolmas qaza barlyǵymyzdyń qabyr­ǵamyzdy qaıystyryp ketti. Darhannyń otbasy endi bizdiń qamqorlyǵymyzda bolady, – dedi.

Jıyn aıaqtalǵan soń qaraly kósh batyr uldyń máıitin kindik qany tamǵan týǵan jeri – Lavrentev aýylyndaǵy qorymǵa qoıdy.

Darhan Serikuly Bazarbaev 1995 jyly 24 sáýirde Qostanaı oblysy Áý­lıe­kól aýdany Lavrentev eldi meke­ninde dúnıege kelgen. Mektepti támam­daǵannan keıin, 2011 jyly Qostanaı ekonomıkalyq kolledjine oqýǵa túsip, ony 2014 jyly aıaqtaıdy. 2016 jyly Qazaqstan Respýblıkasynyń Qarýly Kúshteri qatarynda qyzmet etedi. Otan aldyndaǵy áskerı boryshyn  abyroımen atqaryp, 2017 jyly týǵan jerine oralǵan ol birden ishki ister organdaryna qyzmetke alynady. Darhan qańtardyń 19-yna qaraǵan túni qyzmettik boryshyn atqaryp júrip, qaskóıdiń qolynan mert boldy.

28 jastaǵy Tobyl qalasynyń tur­ǵyny óz úıinde janjal shyǵaryp, otbasy múshelerin pyshaqtap tastamaq­shy bolady.  Týystary ony syrtynan qulyptap, polısııa shaqyrǵan. Quramynda Darhan Bazarbaev pen Amangeldi Syzdyqov bar patrýl jasaǵy oqıǵa ornyna 6 mınýt ishinde jetedi. Qaskúnemdi ustap jatqanda  Darhan júrek tusynan pyshaq jaraqatyn alady. Biraq qylmyskerdiń sýyq qarýyn tartyp alyp, qolyna ki­sen salyp, otbasyn ajaldan qutqaryp úlgeredi. Qylmyskerdi etbetinen túsir­gen samdaǵaı polıseı serigi Amangeldi Syzdyqovqa qarap: «Osy maǵan pyshaq uryp alǵan sııaqty»,  degen eken. Bir otbasyn ajaldan qutqaryp qalǵan qahar­man serjant sol jerde kóz jumdy. De­reý jetken jedel járdem qyzmeti onyń ómirine arasha tura almady. Batyr­dyń sońynda ata-anasy, jary, 4 aılyq uly qaldy.

Darhan Bazarbaev qyzmettik boryshyn atqarý ústinde kórsetken erligi men janqııarlyǵy úshin Memleket basshysy Qasym-Jomart Toqaevtyń Jarlyǵymen III dárejeli «Aıbyn» ordenimen nagradtaldy.

Qostanaı oblystyq Polısııa depar­ta­mentinde ótken qaraly jıynda Ishki ister mınıstriniń orynbasary Alekseı Kalaıchıdı ordendi  marqumnyń ata-anasyna tabys etti. Al aımaq basshysy Arhımed Muhambetov Darhannyń otbasyna Qostanaı qalasynan bir bólmeli páter berdi.

 

Nurqanat QULABAEV

 

QOSTANAI

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar