Aımaqtar • 23 Qańtar, 2020

Dosym oqyǵan kitap

16 retkórsetildi

Jas urpaqty kórkem ádebıettiń kómegimen tárbıeleý qıyn túıinge aınalǵaly qashan. Taıaýda Býrabaı aýdanynda bolǵanymyzda «Dosym oqyǵan kitap» dep atalatyn jańa jobanyń jaı-japsarymen tanysyp, ońtaılysy osy eken destik.

Aýdanda 34 kitaphana jumys isteı­di. 16715 oqyrmany bar. Deni aýyl­dyq jerdegi kitapqumarlar. Rýhanı sura­nysty qanaǵattandyrý úshin jyl saıyn múmkindiginshe jańa ádebıettermen tolyqtyrylyp otyrylady. Bul oraıda memlekettik baǵdarlamamen keletin qundy kitaptar kóp. Bir súıinish­tisi, sońǵy jyldary jergilikti ult tilindegi ádebı kitaptar men kúnde­likti basylymdar kóbeıip keledi.

Qazir jas tolqyndy ádebı álemniń sıqyrly syrymen qyzyqtyrý ońaı-ospaq sharýa emes. Oǵan qoldary­nan kúni-túni túspeıtin qalta telefon­daryndaǵy áleýmettik jeli kesir bolyp tur. Al oqı bilgenge kórkem ádebıet qun­dy dúnıe. Qasıetin uqtyrý úshin tym quryǵanda óz boılary men oılary­na shaqtalǵan shyǵarmalardyń sólin bir ret tatyrsa. Ol úshin ne isteý kerek? Eliktegish jas kóńildi eptep aýdarǵan jón. Biz sóz etip otyrǵan jobanyń basty ereksheligi de osy. Balalar ózderi oqyp, jetesine toqyǵan jaqsy kitaptardy dostaryna beredi, tipti, mazmun-maǵynasyn aýyzsha aıtyp berse de olqy soqpas edi. Keńese qalǵan sátterinde ózge dúnıe emes, kitap týraly sóz sabaqtasa nur ústine nur. О́ıtkeni, balǵyn balalardyń ádebıeti barsha ádebıettiń baspaldaǵy.

Kitaphanashylar da balalarǵa qandaı kitap oqý kerektigin aıtyp, keńes berip otyrady. Jobanyń joly ashylsa, jas urpaq kórkem ádebıetti serik etip, jan azyǵyna aınaldyratyndary daýsyz. Qazir aýdandaǵy kitaphanalardyń kishkentaı oqyrmandary batyrlar jyryn, elitetin ertegilerdi  oqyp júr. Ki­tap­hanashylar bala kóńilin baýraý úshin balalar ádebıetine qalam tartatyn ja­zý­shylarmen kezdesýler ótkizýdi de jos­par­laýda. Oǵan mol múmkindik bar. Býra­baıdyń baýraıyna qalamgerler jıi keledi emes pe?

Bul oraıda aýdandyq kitaphana janynan «Avtor jáne oqyrman» jobasy ashylǵan. Onyń basty maqsaty – aqyn-jazýshylardyń shyǵarmalaryn nasıhattaý. Alǵashqy júzdesýler de ótkizildi. Oqyrmandardyń qyzyǵýshylyǵy da kóńil súısinterlik.

Endi biraýyz sóz qıyndyq haqynda. Máselen, aýdandyq kitaphananyń óz aldyna jeke ǵımaraty joq. Al aýyldyq jer­lerde másele tipti kúrdeli. Birqatar aýyldyq kitaphanalar jergilikti bilim oshaqtarynda, ákimshilikterde, jalǵa beretin mekemelerdiń aınalymǵa kelmeı­tin bólmelerinde ornalasqan.

– Sondyqtan oqyrmandardyń talap-tilegin sapaly oryndaý qıyndyq týǵyzý­da, – deıdi ortalyqtandyrylǵan kitap­ha­nalar júıesiniń dırektory Nazıra Ra­ma­zanova, – qaıtken kúnde de oıly oqyr­mandy kitaphanaǵa tartý barysynda tyr­­banyp jumys atqarýdamyz. Shyǵar­ma­­shylyq klýbtar da ashylyp, jumys isteýde.

Ilkimdi izdenis ústindegi kitaphana­shylar ujymynyń yjdahatty sharýasy ońynan oralsa, Býrabaı baýraıyn­daǵy jas tolqyn jaqsy dástúrdi jalǵas­tyr­maq. Kórkem ádebıetpen kóńilińdi kórkeıtkenge ne jetsin, shirkin?! 

 

Aqmola oblysy,

Býrabaı aýdany

 

 

Sońǵy jańalyqtar

Mańǵystaýda «ANTIKOR ORTALYGY» ashyldy

Rýhanııat • Búgin, 11:38

Tennıs: Elena Rybakına fınalda

Tennıs • Búgin, 08:52

Basty aqparat (21.02.2020)

Vıdeo • Keshe

Uqsas jańalyqtar