Parlament • 23 Qańtar, 2020

Senat Bıýrosynyń otyrysy ótti

20 retkórsetildi

Darıǵa Nazarbaevanyń tóraǵalyq etýimen Qazaqstan Respýblıkasy Parlamenti Senatynyń otyrysy boldy. Bul týraly Parlament Senatynyń baspasóz qyzmeti habarlady.

Senat Tóraǵasy kirispe sózinde depýtattar jyl basynda aımaqtarǵa barǵanyn jáne jergilikti jerlerdegi jumystyń jaǵdaıymen, zańdar men memlekettik baǵdarlamalardy júzege asý barysymen, jergilikti atqarýshy organdardyń qyzmetimen tanysqanyn atap ótti. «Bul saparlardyń nátıjeleri depýtattyq saýaldardyń negizi bolady ári parlamenttik tyńdaýlarda, úkimet saǵattarynda jáne basqa da kezdesýlerde talqylanady jáne komıtetterdiń usynystary men jumys josparlaryna engiziledi» dedi D.Nazarbaeva.

Senat Tóraǵasy Palata komıtetterine zań shyǵarý jumystaryn zań jobalaryn ázirleýshilermen úılestirýdi tapsyrdy. Úkimet 2020 jylǵa arnalǵan jospardy bekitken bolatyn, oǵan asa mańyzdy máselelerdi sheshýge jáne Tuńǵysh Prezıdent – Elbasy men Memleket basshysynyń tapsyrmalaryn iske asyrýǵa arnalǵan 17 zań jobasy engizildi.

Senat Tóraǵasy Qazaqstan Prezıdenti Q.Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýyn júzege asyrý jónindegi Jalpyulttyq is-sharalar josparyn iske asyrý aıasyndaǵy palatanyń negizgi mindetterine jeke toqtaldy.

Darıǵa Nazarbaeva senatorlarǵa zańdardy qabyldaý kezinde azamattar quqyqtaryn qorǵaý kepildikterin arttyrý, arandatý is-áreketterine quqyq qorǵaý organdary nemese arnaýly memlekettik organdar qyzmetkerleriniń jaýapkershiligin kúsheıtý, zańnamadaǵy barlyq qaıshylyqtardy azamattar men bıznestiń paıdasyna túsindirýdi qamtamasyz etý, olarǵa memlekettik organdarmen ózara qarym-qatynasta teń jaǵdaılar jasaý, bıliktiń aýdandyq, qalalyq jáne aýyldyq deńgeıleriniń derbestigi men jaýapkershiligin keńeıtý máselelerine erekshe nazar aýdarýdy tapsyrdy.

Parlament joǵarǵy Palatasynyń basshysy «Qazaqstandaǵy jeńil ónerkásiptiń jaǵdaıy», «Agroónerkásip keshenin damytý», «Qazaqstannyń tranzıttik áleýetin damytý» taqyryptaryna arnalǵan parlamenttik tyńdaýlar ótkizý qajettigin atap ótti.

Joǵarǵy palata Tóraǵasy otyrys barysynda Senat janynan qurylǵan keńesterdiń jumysy týraly áńgimeledi. D.Nazarbaeva parlamenttik tyńdaýlarǵa daıyndyq barysynda aýyl sharýashylyǵy salasynyń kóptegen ókilderimen kezdesýler bolǵanyn aıtty. «Olar kótergen máseleler keńinen talqylaýdy talap etedi. Senat janynan Agroónerkásip kesheni jóninde keńes qurý qajettigi týyndady» dedi Palata basshysy. Jastar saıasaty salasyndaǵy zańnamany jetildirý jónindegi usynystardy qaraý maqsatynda jeltoqsan aıynan bastap Parlament Senatynyń janynda Jastar keńesi jumysyn bastady, dedi D.Nazarbaeva.

Kún tártibindegi birinshi másele boıynsha Senat Tóraǵasynyń orynbasary Bektas Beknazarov sóz sóıledi. Ol senatorlardyń el aımaqtaryndaǵy, onyń ishinde shalǵaı aýyldardaǵy 460 kezdesýiniń qorytyndysy týraly aıtty. Tóraǵa orynbasary azamattardyń aımaqtarda aıtqan eskertýlerimen jáne qoldanystaǵy zańnamany jetildirý jónindegi usynystarymen áriptesterin tanystyrdy. «Halyqpen kezdesý barysynda biryńǵaı jıyntyq tólem tóleý, ataýly áleýmettik kómek alý sharttary, sondaı-aq aýyldyq eldi mekenderdiń bıýdjetin qalyptastyrý (4-shi deńgeı) jáne «Aýyl-el besigi» arnaıy jobasy aıasynda tirek retindegi aýyldyq eldi mekenderdi anyqtaý máseleleri boıynsha zańnamany jetildirilýdegi kemshilikter týraly syn eskertýler aıtyldy» dedi ol.

Otyrys barysynda «2004 jylǵy 22 jeltoqsandaǵy Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratıfıkasııalaý týraly» zań qabyldandy.

Sońǵy jańalyqtar

Beıqamdyqqa jol berilmeýi kerek

Rýhanııat • Keshe

Koronavırýssyz Qostanaı

Aımaqtar • Keshe

Kúrish eksportyna kedergi joq

Aımaqtar • Keshe

Álem únemdele bastady

Álem • Keshe

Uqsas jańalyqtar