Aımaqtar • 18 Aqpan, 2020

Berdibek Saparbaev Jambyl GRES máselesin sheshýdi tapsyrdy

102 retkórsetildi

Jambyl oblysynyń ákimi Berdibek Saparbaev Taraz qalasyndaǵy turǵyn úı-kommýnaldyq, energetıkalyq jáne ónerkásiptik nysandardyń jumysymen tanysty. 1967 jyldan beri úzdiksiz jumys atqaryp kele jatqan «T. I. Batýrov atyndaǵy Jambyl GRES» kásipornynyń sońǵy ýaqytta júktemesi 30 paıyzǵa deıin tómendep ketken. Atalǵan kásiporyn jumysymen tanysqan ákim ondaǵy shuǵyl sheshilýi qajet basty máselelerdi atap ótti.

Ol boıynsha tıisti salalyq basqarmaǵa turǵyndar úshin tarıfti tómendetý múmkindikterin qarastyrý maqsatynda baǵa belgileý sharalaryna monıtorıng júrgizýdi tapsyrdy. Ondaǵy túpki maqsat – básekelestik ortadaǵy baǵany qalyptastyrý, tutynýshylar sanyn arttyrý jáne kásiporyndy kezeń-kezeńimen tolyq qýatqa shyǵarý.

Taldaý júrgizilip, qajetti usynystar ázirlengennen keıin qalyptasqan jaǵdaıdy sheshý maqsatynda Berdibek Saparbaev energetıka mınıstrliginiń jáne KEGOC ókilderiniń qatysýymen jıyn ótkizýdi josparlaýda. Berdibek Saparbaev bul oraıda energetıkalyq kásiporynnyń aksıonerleri de óz úlesin qosýy tıis ekenin atap ótti. Kelesi kezekte ákim «Jambyl sý» memlekettik kommýnaldyq kásipornynda bolyp, sýmen qamtý mekemesiniń jáne ondaǵy halyqqa qyzmet kórsetý ortalyǵynyń jumysymen tanysty. 98,5 myń abonentke qyzmet kórsetetin kásiporynnyń qurylymy qyzmet kórsetýge negizdelgen. Tutynýshylardyń basym bóligi jeke tulǵalar. Alaıda búginde atalǵan kásiporynnyń sý men káriz júıeleriniń tozýy, debıtorlyq bereshek, sý esepteý quraldaryn ornatý, Eýropalyq qaıta qurý jáne damý bankimen birlesip kásiporyndy jańǵyrtý jónindegi jobany iske asyrý basty máselege aınalyp otyr. Al, «Tarazenergosentr» AQ oblys ortalyǵy tutynýshylarynyń 80 paıyzyn qamtamasyz ete otyryp, jylý jáne elektr energııasyn óndirýmen jáne taratýmen aınalysatyn mekeme. Ol úshin gaz jáne mazýt otyndary paıdalanylady. Bul kásiporynnyń da negizgi jelileri tozǵan desek, kelesi jyly ondaǵy qýat óndirýshi  men qosalqy qurylǵylardy qaıta jańartý sharalary josparlanýda. Ol jumystardyń jalpy quny 160 mıllıon AQSh dollarynan asady dep josparlanǵan. Qazirgi tańda  jobanyń tehnıkalyq-ekonomıkalyq negizdemesi daıyn, memlekettik saraptamadan ótken. Atalǵan joba iske asqan jaǵdaıda Taraz qalasynyń turǵyndaryn jyl boıy ystyq sýmen qamtamasyz etý máselesi sheshiletin bolady.

Sonymen qatar Berdibek Saparbaev «Qazfosfat» JShS-niń Mıneraldy tyńaıtqyshtar zaýyty men Jańa Jambyl fosfor zaýytyn aralady. О́tken jyldyń qorytyndysy boıynsha Mıneraldy tyńaıtqyshtar zaýyty 45,7 mıllıard teńgeniń ónimin, al fosfor zaýyty 98,9 mıllıard teńgeniń ónimin óndirgen. Ákim mundaǵy tehnologııanyń qurylymymen, basym bóligi eksporttalatyn daıyn ónimniń úlgilerimen tanysty. Munda óndiris qaldyqtaryn jınaýǵa jáne keıinnen kádege jaratýǵa arnalǵan alańdardyń jetispeýshiligi máselesi týyndap otyr. Hımııa ónerkásibiniń alyby búginde óz jumysyn 2019-2025 jyldarǵa arnalǵan damý strategııasyna  sáıkes atqarýda. Osy turǵyda 114,3 mıllıard teńge mólsherinde ınvestısııa tartý kózdelgen.

 

Jambyl oblysy

Sońǵy jańalyqtar

Uqsas jańalyqtar