Qoǵam • 19 Aqpan, 2020

Alysty jaqyndatatyn qurylǵy

24 retkórsetildi

Kókshetaýdaǵy «Tynys» zaýyty jańa jyldan bastap alǵashqy otandyq elektr qozǵaltqyshty múgedekter arbasyn qurastyrýdy qolǵa aldy. Buǵan deıin elektr qýatymen júretin arbalar Reseı, Qytaı, jáne Eýropa elderinen tasymaldanyp kelgen bolatyn.

Elektr qozǵaltqyshty múgedekter arbasyn qurastyrý isi bıyl Qazaqstan Respýblıkasynyń Eńbek jáne áleýmettik qorǵaý mınıstrliginiń arnaıy tapsyrysynan soń qolǵa alynǵan. Qazirgi tańda elimizde 14 myńnan astam múmkindigi shekteýli jan múgedekter arbasyna zárý eken. Oblysta arbaǵa qoly jetpeı otyrǵan 600-ge jýyq adam bar. О́tken jyly aımaqtaǵy múmkindigi shekteýli azamattardy qajetti tehnıkalyq jabdyqtarmen qamtý men ózge de ońaltý is-sharalaryna oblys bıýdjetinen 466 mıllıon teńge kóleminde qarajat qarastyrylypty.

–Osy qarajat esebinen 504 adam bólmeishilik jáne serýendeýge arnalǵan  múgedekter arbasyna ıe boldy. Bıyl 1231 arbaǵa tapsyrys berildi. Onyń 777-sine respýblıkalyq bıýdjetten qarjy qarastyrylmaqshy. Sóıtip, biz aımaqtaǵy qajettilikti tolyq óteýge  múmkindik alamyz. О́tinishter jyl sońyna deıin qabyldanady,–deıdi oblystyq jumyspen qamtý jáne áleýmettik baǵdarlamalardy úılestirý basqarmasy basshysynyń orynbasary Altyn Aqbarova.       

Elektr qýatymen júretin arbalar ár 5 jyl saıyn aýystyrylyp otyrýy kerek eken. Iаǵnı, ortasha alǵanda jylyna 2 myńǵa jýyq  arba qajet. О́zdiginen júretin elektr qozǵaltqyshty arba  serýen qurýǵa jarap tur. Jalpy salmaǵy 70 keli shamasynda. 15 jáne 30 shaqyrymǵa arnalǵan eki akkýmýlıatormen jabdyqtalǵan. 140 kelige deıin salmaqty kótere alady. Al, jyldamdyǵy saǵatyna 6 shaqyrym. Elektr qozǵaltqyshy isten shyqqan jaǵdaıda arbany qolmen ıterip júrýge de bolady. Sondaı-aq ony jınap, avtokóliktiń júk salǵyshyna da salýǵa yńǵaıly. Qosalqy bólshekterdi de «Tynys» kásipornynan alýǵa bolady.

–2018 jyly osy buıymdardyń birinshi danalaryn tutynýshylarǵa qoldanysqa berdik. Ármen qaraı kemshilikterin túzep, qazir endi myna serııalyq jaǵdaıda shyǵarýǵa daıyndalyp otyrmyz. Negizi bul jobany ıgerý salasynda Úkimet tarapynan eshqandaı qarjy suraǵan joqpyz. Qazirgi ýaqytta memlekettik tapsyryspen 1379 arbaǵa suranys tústi,–deıdi «Tynys» aksıonerlik qoǵamynyń bas dırektory Qaırat Qalmanbaev.

Qazirgi tańda zaýytta eresekter men balalarǵa arnalǵan múgedekter arbasyn qurastyratyn arnaıy bólim ashylǵan. Munda 60-qa jýyq adam eńbek etedi. Zaýyttyń óndiristik qýaty jylyna 2700 arba shyǵarýǵa qaptal jetedi.

 

 

Kókshetaý qalasy

Sońǵy jańalyqtar

Sımptomsyz sybaılastyq

Qoǵam • Keshe

Uqsas jańalyqtar