Koronavırýs • 21 Naýryz, 2020

Elorda kásipkerleri jalǵa bergen páter aqysyn keshirdi

421 retkórsetildi

«Jumyla kótergen júk jeńil». Jekelegen adamdarǵa ǵana emes, el basyna qıyndyq túskende judyryqtaı jumyla ketetin atymtaı azamattardyń ıgi isteri jaıly aýyz toltyra aıtpaý múmkin emes. Álemdi jaılaǵan indettiń, ókinishke qaraı, elimizge de kelip jetkeni elorda kásipkerlerin beıjaı qaldyrmady. Árıne olar, eń aldymen, «biz el úshin ne isteı alamyz?» degenge bas qatyrdy.

Juqpaly derttiń órshýine jol bermes úshin eki qala birdeı jabylyp, júris-turys qıyndap, bireýge jalaqy tóleý muń bolyp, bireýge jumysqa shyǵý múmkin bolmaı jatqany ras. Tipti kúni keshe otbasyn asyrap otyrǵan azamatynyń eńbekaqysy kesheýildep, jórgektegi balasyna jaıalyq satyp ala almaı otyrǵan jas analardyń bizge habarlasqany da bar. Maska tapshylyǵyn aıtpaǵanda, paıdakúnemderdiń baǵany sharyqtatýynan bir japyraq betperdeni alyp, taǵa almaı otyrǵan kisiler de kezigedi. Osyndaı máselelerdi eleýsiz qaldyrmaǵan elordadaǵy bir top kásipker Prezıdenttiń #bizbirgemiz uranyna ún qosyp qana qoıǵan joq, qaıyrymdy iske jumyla kiristi.

1

Igi bastamany qolǵa alǵan kásipkerlerdiń ózderimen de tildestik. Páter, saýda orny jáne basqa da nysandardy jalǵa berip otyrǵan «Jibek joly shoý tehnıka» JShS dırektory Erbosyn Nurmuhan, «Kahan qurylys» JShS dırektory Ǵızat Kárimuly, jeke kásipkerler Myrzabek Meıirbekuly jáne Erjan Úrim qatarlylar bir aılyq jaldaý aqysyn keshirse, «Kengýrý» jolaýshylar tasymaldaý JShS dırektory Myńjas Ádilbek taksılerin júrgizýshilerge 50% jeńildikpen jalǵa berip otyr. Budan bólek keıbireýi keminde 2-3 qyzmetkerin aqyly demalysqa jiberipti. Kásipker Ernur Bolatuly jýrnalısterge, qala turǵyndaryna jáne kóshe tazalyǵyna jaýapty jumysshylarǵa tegin maska taratsa, «Demer» JShS dırektory Erlan Dáleluly da 300 myń teńgeniń maskasyn satyp alyp, halyqqa tegin berýdi josparlap otyr. «Altaytrade» JShS dırektory Baqytbek Násiphan turmysy tómen jumysshylaryna 120 myń teńgeden aqshalaı  kómek kórsetken.

2

Osy oıdy eń alǵash ortaǵa salǵan «Jibek joly shoý tehnıka» JShS dırektory Erbosyn Nurmuhan: «Nur-Sultan qalasynda turatyn WhatsApp jelisindegi «Bizdiń jigitter» tobyndaǵy barlyq kásipker azamattar  jalǵa bergen páterlerimizdiń páter aqysyn osy bir aılyq tótenshe jaǵdaı kezinde  jalǵa alýshylardan 100% almaıtyn bolyp kelistik. Bul bizdiń memleket pen halyqtyń qıynshylyǵyn sheshý úshin qarlyǵashtyń qanatymen sý sepkendeı bolsa da jasaǵan kómegimiz», deıdi.

Jomart jandardyń barlyǵy Qytaıdan atajurtyna oralyp, kásibin dóńgeletip otyrǵan azamattar. Olar elimizdegi basqa da kásipkerlerdi chellendjdi jalǵastyrýǵa shaqyrdy. «Biz úlken bıznesmender sııaqty mıllıondap kómek kórsete almasaq ta, qolymyzdan kelgenge tyrystyq.  Sondaı-aq «Bizdiń jigitter» tobyndaǵylar elimizdegi barlyq kásipkerlerdi eldiń turaqtylyǵy, ekonomıkanyń odan ári quldyramaýy, jaǵdaıy tómen otbasylardyń ash-jalańash qalmaýy úshin bir jaǵadan bas, bir jeńnen qol shyǵaryp,  elge kómektesýge shaqyramyz», deıdi E.Nurmuhan.

Sońǵy jańalyqtar

Jetisaılyq jomart jandar

Aımaqtar • Keshe

Ishan baǵy qaıta qalpyna keledi

Rýhanııat • Keshe

? (Suraq belgisi) Poema

Ádebıet • Keshe

Senzýrasyz Abaı

Rýhanııat • Keshe

Uqsas jańalyqtar