Aımaqtar • 06 Sáýir, 2020

Shymkentte COVID-19 vırýsyn juqtyrǵandarǵa gospıtal salynýda

134 ret kórsetildi

Álemdi úreı qushaǵyna alǵan koronavırýs pandemııasy elimizdi de biraz ábigerge saldy. Memlekettik deńgeıdegi saqtyq sharalary arqyly aty jaman indettiń kómeıine jutylyp ketpedik. Degenmen, derttiń dúrbeleńinde otandyq medısına salasynyń keıbir kemshin tustary men tótenshe jaǵdaı qyzmetiniń beıǵamdyǵy kózge kórinip-aq qaldy.

Birinshi kezekte tótenshe jaǵdaı kezinde naýqastardy qabyldaıtyn gos­pıtal jetispeýshiligi iri ortalyqtarda baıqalyp jatty.

Degenmen, el Prezıdentiniń shuǵyl tapsyrmasymen Almaty, Shymkent qalalarynda gospıtal qurylysy bas­talyp ketti. Tótenshe jaǵdaı kezinde naýqastardy qabyldaıtyn gospıtal tez qurastyrylatyn materıaldardan turǵyzylmaq. Oǵan túgeldeı otandyq qurylys ónimderi paıdalanylmaq. Tipti 400-ge jýyq jumysshy jergilikti jerden tartylǵan. Eldegi aýyr jaǵdaı kezinde qolǵa alynǵan qurylys ju­mysymen tanysqan qala ákimi Murat Áıtenov sala basshylaryna karantın kezinde jumysshylardy arnaıy avtobýspen tasymaldaý, qaýipsizdik sharalaryn saqtaý kerektigin aıtty.

Sondaı-aq karantın kezinde aýyr júk kólikteriniń táýlik boıy qurylys zattaryn toqtaýsyz jetkizý máselesinde kedergi bolmaýyn júktedi.

Shaharda salynyp jatqan arnaıy aýrýhana stasıonar, jansaqtaý syndy birneshe bólikten turady. Jáne onda medısına qyzmetkerleri jatyp jumys isteıtin jaı salynyp, oǵan qajet mamandar iriktelip alynbaq.

Bul rette ýaqytsha aýrýhananyń jabdyqtalýy men sanıtarlyq-epı­demııalyq jaǵdaıy bel­gilen­gen normatıvterge tolyq saı bolady. Mundaǵy búkil uıymdastyrý jumys­taryn Shym­kent qalalyq juqpaly aýrýlar aýrýhanasy úılestirmek.

«Shymkentte qurylysy bastalǵan 200 oryndyq modýldik ınfeksııalyq gospıtal birinshi kezekte mıllıon turǵyny bar qalamyzdyń qaýipsizdigin qamtamasyz etý úshin qajet. Osyndaı jedel sheshim qabyldaý arqyly bul qurylys COVID-19 pandemııasynyń órshýin toqtatý maqsatynda iske asyrylyp jatyr. Modýldik gospıtal sanıtarlyq-epıdemıııalyq talaptarǵa saı, qala qurylysy normatıvteri men arhıtektýralyq zańnama tolyqtaı saqtalǵan. Bul turǵyndarǵa qaýipti emes. Gospıtal ınfeksııalyq aýrýlardyń aldyn alýdy jaqsartatyn bolady», deıdi qalalyq juqpaly aýrýlar aýrý­hanasynyń bas dárigeri Amangeldi Ergeshbekuly.

Anyǵynda osyǵan deıin shahardyń qaq ortasynda ornalasqan týbdıspanser men ınfeksııalyq aýrýhana qala turǵyndarynyń biraz mazasyn alyp kelgen bolatyn. Aýa arqyly tez taralatyn aýrýlardyń juǵýyna alańdaǵan shymkenttikter jergilikti bılikke talaı márte shaǵymdanǵan edi.

Sońǵy jyldary osy túıtkildi sheshý úshin qala ákimdigi Shymkenttiń irgesinen densaýlyq saqtaý salasyna arnalǵan ǵımarat turǵyzyp, ortalyqta oryn tepken aýrýhanalardy qala irgesine kóshiretin bolyp kelisken-tuǵyn. Mine, sol sozbalańǵa salynyp kele jatqan máseleniń núktesi qoıylatyn kún de alys emes. Birinshi kezekte, koronavırýs pandemııasy da tizgindeledi. Máselen, Nur-Sultan qalasynyń ortalyǵyndaǵy álemge áıgili «Hilton» qonaqúıi indetpen kúresýshi dárigerler men vırýs juqtyrǵandardy emdeý úshin berilip otyr. Kúni erteń tótenshe jaǵdaı aıaqtalǵannan keıin qonaqúı óz qyzmetin jalǵastyra beredi degen sóz. Demek, Shymkenttegi ınfeksııalyq gospıtal karantın jaǵdaıynan soń da qalada basy aýyryp, baltyry syzdaǵandarǵa qyzmet ete bereri anyq.

Sońǵy jańalyqtar

Qalalar arasynda blokbeketter qoıylmaıdy

Qazaqstan • Búgin, 15:47

Elbasy koronavırýstan jazylyp shyqty

Elbasy • Búgin, 15:07

8 elden 15 fınteh-startap irikteldi

Qazaqstan • Búgin, 13:37

Tabys ósip, qaryz edáýir azaıdy

Ekonomıka • Búgin, 12:23

Dollardyń búgingi baǵamy belgili boldy

Ekonomıka • Búgin, 11:35

Jambyl oblysynda dinı ahýal turaqty

Aımaqtar • Búgin, 09:45

Qazaqstan men álemdegi fıntehtiń damýy

Ekonomıka • Búgin, 09:39

Turǵyndar Olımpıadaǵa qarsy

Sport • Búgin, 08:44

Uqsas jańalyqtar