Aımaqtar • 09 Sáýir, 2020

TJ kezinde Nur-Sultanǵa 14 myń tonnadan astam azyq-túlik jetkizilgen

16 retkórsetildi

Qalada halyq qajettiligin qamtamasyz etetin 30 myń tonna kóleminde azyq-túlik qory bar. Bul rette bılik tarapynan azyq-túlik qoryn tolyqtyrýǵa baǵyttalǵan qajetti sharalar qolǵa alynǵan dep habarlaıdy Nur-Sultan ákimdiginiń resmı saıty.

Nur-Sultan qalasy Investısııalar jáne kásipkerlikti damytý basqarmasynyń basshysy Erlan Bekmurzaev: «Karantın rejımi engizilgennen beri jarty aıdan asa ýaqyt ótti. Qalaǵa taýarlar úzdiksiz jetkizilip jatyr, tapshylyq baıqalmaıdy. Júk tasymaly úshin kire beriste «jasyl dáliz» jasalǵan. Karantın engizilgen sátten bastap qalaǵa jalpy kólemi 39812,2 tonnaly 3,776 júk kóligi kirdi. Onyń ishinde azyq-túlik ónimderi – 14 315,4 tonna. Bul bazar naryǵyndaǵy búgingi satylym kólemine sáıkes keledi. Búginde qalada azyq-túlik qory jetkilikti», - deıdi Ortalyq kommýnıkasııalar qyzmetindegi ótken brıfıngte.

E.Bekmurzaevtyń aıtýynsha, qazirgi ýaqytta elordada 19 baǵdar boıynsha 30 myń tonna kóleminde áleýmettik mańyzǵa ıe azyq-túlik bar. Onyń 25 myń tonnasy qoımalarda bolsa, qalǵan 5 myń tonnasy qalanyń turaqtandyrý qorynda saqtalǵan.

Sonymen qatar, qala basshylyǵy qala rezervterin toltyrý boıynsha birqatar sharalar qabyldaýda. 

«Birinshiden, óńirlermen jemis-kókónis, et jáne azyq-túlik ónimderiniń belgilengen baǵasy boıynsha «forvardtyq kelisimsharttar» jasaımyz. Bul Túrkistan, Jambyl, Aqmola jáne Pavlodar oblystaryna qatysty. Ekinshiden, «aınylym shemasy» boıynsha kúrish, qaraqumyq jáne kókónis tobyna (kartop, pııaz, sábiz, qyryqqabat) belgilengen baǵamen satylatyn iri bólshek saýda jelilerimen jeńildetilgen nesıe týraly kelisimge qol qoıdyq», - deıdi basqarma basshysy.

Sonymen qatar jergilikti bıýdjetten qosymsha 1,5 mlrd. teńge bólindi. Bul áleýmettik mańyzy bar azyq-túlik taýarlarynyń baǵasyn belgileý úshin jeńildetilgen nesıelerge de baǵyttalǵan. Sonyń ishinde kúnbaǵys maıy, sút, et jáne azyq-túlik ónimderin satyp alý josparda tur.

«Qajetti un satyp alynǵandyqtan, birinshi sortty bólke nan baǵasy 90-95 teńge kóleminde saqtalady. Turaqtandyrý qorynan qanttyń baǵasy 220 teńgeden aspaıtyn taýarlyq ıntervensııa jasalyp jatyr. Bul «Magnum», «KeńMart», «Astyqjan», «VkýsMart», «A2», «Metro» sýpermarketteri men «Shapaǵat» bazary arqyly júzege asydy.

Úkimet tarapynan áleýmettik mańyzy bar azyq-túlik taýarlarynyń baǵasyn retteý maqsatynda 9 taýarǵa shekti baǵa qoıyldy. Atap aıtsaq, olar: suryptalǵan bıdaı uny, (197 teńge), birinshi surypty unnan jasalǵan qalypty nan, (150 teńge / kg, 82,5 teńge / 500 gr.), ólshemeli makaron (230 teńge), qaraqumyq jarmasy (239 teńge), óńdelgen kúrish (307 teńge), sıyr eti (ıyq-keýde súıekteri) (2113 teńge), taýyq jumyrtqasy (I sanat) (351 teńge), kúnbaǵys maıy (481 teńge), as tuzy («Ekstrany» qospaǵanda) (55 teńge).

Baǵalar ár óńirde jeke belgilengen. Bekitilgen baǵalar týraly aqparat e-gov.kz resmı saıtynda ornalasqan. Sonymen qatar tıisti mekemeler quramynda mobıldi toptar quryldy. Aryz-shaǵymdar men túsken aqparattar boıynsha reıd jasalady.

«Múmkindikti paıdalana otyryp, saýda salasyndaǵy barlyq kásipkerlerdi shekti baǵa mólsherin qatań saqtaý qajettigi týraly taǵy da habardar etkim keledi. Belgilengen baǵadan asqan jaǵdaıda kásipkerlerge  265 myń teńgeden 530 myń teńgege deıin aıyppul salynady», - deıdi Nur-Sultan qalasy ınvestısııalar jáne kásipkerlikti damytý bóliminiń basshysy Erlan Bekmurzaev.

Sońǵy jańalyqtar

Áke rýhynan qýat alǵan qaısar jan

Rýhanııat • Búgin, 11:54

Abylaıhannyń aq joly

Aımaqtar • Búgin, 10:05

Aqmolada qaıyrymdy jandar kóp

Aımaqtar • Búgin, 09:31

Halyqaralyq stýdentter forýmy aıaqtaldy

Aımaqtar • Búgin, 09:25

Shaıqynyń dombyrasy

О́ner • Búgin, 08:15

Teatr aldyndaǵy tarlandar

Rýhanııat • Búgin, 08:13

Shámshi ǵumyrynyń beımálim betteri

Rýhanııat • Búgin, 08:09

Uqsas jańalyqtar