Rýhanııat • 29 Sáýir, 2020

Qamqorlyqtan qaǵajý qalǵan emespiz

19 retkórsetildi

Men – I toptaǵy múmkindigi shekteýliler sanatyndaǵy janmyn. 2007 jyly jol apatyna túsip, bel omyrtqama zaqym kelip, uzaq ýaqyt tósek tartyp jattym. Qusaǵa batyp, ózińdi ishteı kemirip, jatsań jata beredi ekensiń.

Ol kezde qylshyldap turǵan 25 jasqa endi tolǵan shaǵym. О́zimdi ózim qaırap kúsh jınap, eki aıaqqa turyp ketýge talpyndym. Biraq bul áreketimnen túk shyqpady. Aqyry taǵdyrdyń mańdaıǵa jazǵanyna kónip, múgedek arbasyna tańyldym. Basqa tússe baspaqshyl, moıyndaǵanmen moıýǵa bolmaıdy. Jigitke masyldyq jaraspaıdy, boıdaǵy bar jigerimdi janyp, belsendi ómirge aralasýǵa talpyndym. Jalpy talpynǵan adam qandaı jaǵdaıda bolmasyn muratyna jetedi. Qazir múmkindigi shekteýliler qoǵamynyń múshesimin. Osy qoǵamnyń janynan ashylǵan «Jastar-2016» JShS basqaramyn. Seriktestiktegi jigitterdiń bári ónerli. Temirdi qamyrdaı ıleıtin usta da, metaldy bir-birine jymyn bildirmeı japsyratyn dánekerleýshi de, sheber aǵash jonýshy da bar. Karantınge deıin kóp nársemen aınalystyq. Tapsyrys boıynsha shatyr da japtyq, qorshaý, qaq­pa­lardyń neshe túrin jasadyq. Mek­tepterge arnap ústel, oryndyq, parta, kıim ilgish sııaqty jıhazdar shyǵardyq.

Jalpy elimizde múkindigi shekteýli jandarǵa múmkindik mol. О́z basym memlekettiń qamqorlyǵyn kóp kórdim. Seriktestigimiz talaı ret tyǵyryqqa tireldi. Sol qıyndyqtardyń bárin úkimet qoldaýynyń arqasynda eńserdik. Máselen, memlekettik satyp alý kon­kýrs­­tary kezinde eń birinshi kezekte bizge basymdyq beriledi.

Qazir pandemııa degen báleket kelip tirshiligimiz ýaqytsha toqtap, kásibimiz toqyrap, aıaqqa tusaý túskendeı bolyp qaldyq. Oblys karantınge jabyldy. Indetke ilikkender sany kún sanap ósip jatyr. Biraq amal ne? Búkil eldiń basyna túsken aýyrtpalyq, sondyqtan karantın talaptaryn saqtap, jumysymyzdy toqtatyp qoıdyq. Betperdemdi taǵyp, ınvotaksıge minip kúnara jumys ornyna baryp turamyn. Jigitterge qońyraý shalyp, kóńilderin aýlap, biraýyq áńgi­me­lesemin. Barlyǵy memleketten qarjy­laı járdemaqy aldy. Qajetti azyq-tú­lik­terin de tegin jetkizip berip jatyr eken. О́z basym eshteńeden tary­ǵyp, qam­qorlyqtan qaǵajý qalyp jat­qan joqpyn. Osydan 10 shaqty kún buryn esepshotyma 50 myń teńge tústi. Onyń syrtynda azyq-túlikke dep qo­symsha aqsha aýdaryp jatyr. О́zim­niń aı saıyn alatyn zeınetaqym bar. Osy­nyń barlyǵy memleket tarapynan múm­kindigi shekteýli jandarǵa jasa­lyp jatqan erekshe qamqorlyq dep bi­lemin. Ási­rese múmkindigi shekteýli jandar­ǵa degen eldiń yqylasy ystyq, memle­ke­ti­mizdiń qamqorlyǵy mol. Meni osy qýantady.    

 

Rýslan BAIǴANIN,

Rýdnyı qalalyq múmkindigi shekteýliler qoǵamynyń múshesi

 

Qostanaı oblysy

 

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar