Qazaqstan • 11 Mamyr, 2020

Qazaqstanda Bıologııalyq qaýipsizdik jóninde ǵylymı keńes qurylady

38 retkórsetildi

Qazaqstan Respýblıkasynyń Úkimetinde ótken onlaın-brıfıngte Premer-Mınıstrdiń orynbasary Eraly Toǵjanov búgingi tańda elimizde sanıtarlyq-epıdemıologııalyq júıeni nyǵaıtýǵa, ǵylymı zertteýlerdi jáne farmasevtıkalyq óndiristi damytýǵa qadamdar jasalyp jatqanyn aıtty. Bul oraıda medısınalyq kadr áleýetin arttyrý, olardy qoldaý máseleleri qarastyrylady. Bul týraly Premer-Mınıstrdiń baspasóz qyzmeti habarlady.

«Prezıdent Qasym-Jomart Kemeluly Toqaev «myna qıyn kezeń ótisimen biz densaýlyq saqtaý júıesine qatysty barlyq máselelerdi qaıta qarap, ózektiligin anyqtap, alda kezdesetin qandaı da jaǵdaılarǵa daıyn bolýyn qamtamasyz etýimiz kerek» degen mindet qoıdy. Osyǵan oraı, Úkimet janynan, bedeldi ǵalymdar men ekspertterden qurylǵan Bıologııalyq qaýipsizdik jóninde ǵylymı keńes qurylady», dedi E. Toǵjanov. 

Sonymen qatar vıse-premer endigi kezekte ekonomıkalyq belsendilikti kezeń-kezeńimen retke keltirip, azamattar úshin qalypty tirshilik jaǵdaılaryn jasaý mindeti turǵanyn atap ótti.

«Karantındik shekteýler árbir adam úshin qundylyqtardy qaıta baǵalap, ózi men óz ortasyna jaýapkershiligin arttyrdy. Kúndelikti ómirimizde gıgıenalyq, sanıtarlyq talaptardy saqtaý, qaýipsizdik sharalaryn oryndaý qalypty jaǵdaıǵa aınalyp otyr. Koronavırýs ınfeksııasynyń taratylý qaýpi turaqtalyp kele jatqanyna qaramastan, áli de karantındik sharalardyń saqtalýy asa mańyzdy», dedi Premer-Mınıstrdiń orynbasary. 

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar