Ekonomıka • 12 Mamyr, 2020

Báıdibektikterdiń bási basym

7 retkórsetildi

Elimizde aýylsharýashylyq salasy eńbekkerlerine jan-jaqty qoldaý kórsetilip keledi. Osy qamqorlyqty sezingen hám ómir súrý deńgeıin jaqsartý, tabysty ósirý jolyndaǵy qoldaýdy barynsha paıdalanǵan Báıdibek aýdanynyń eńbekshileri ótken jyldy tolaǵaı tabysymen aıaqtady.

Byltyr aýdanda aýyl sharýa­shylyǵynyń negizgi kapıtalyna ınves­tısııa tartý boıynsha mindet 5 mıl­lıard teńge bolsa, bul meje 15 mıl­lıard 843200 teń­gege asyra oryndaldy. Osy­laısha, jyl qorytyndysy boıynsha «Oblys kóleminde úzdik ın­vestısııa tartýshy aýdan» ata­nyp, arnaıy dıp­lommen mara­pat­taldy.

Jospar bar jerde tııanaqty tirlik bar. Osyny jaqsy túsingen báıdibektikter mindettemelerin árdaıym artyǵymen oryndap keledi jáne muny jaqsy úrdiske aınaldyra bilgen. Bul oraıda aýdan ákimi Baqyt Tanakózovtiń uıymdastyrýshylyq qabiletin, iskerligi men biliktiligin aıtyp ótkimiz keledi. Byltyr aýdanda 91,8 myń gektar egistik jerdi ıgerý josparlansa, bul kórsetkish 93,4 myń gektarǵa (102 paıyz) jetti. 200 gektar sýarmaly jerdiń shyǵymyn jaqsartyp, aınalymǵa qosý jospary 220 gektardy (110 paıyz) qurady. Tamshylatyp sýarý tehnologııasyn engizý boıynsha jyldyq tapsyrma da 100 paıyzǵa oryndaldy. Qarqyndy baý sharýashylyǵyn damytý jospary da mejeli bıikten kórine bildi.

Osynsha aýqymdy jumys tehnıka kúshinsiz atqarylmaıtyny belgili. Osy rette báıdibektikter aýylsharýashylyq tehnıkalaryn jańalaý boıynsha tapsyrmany 105 paıyzǵa kótergen.

«Damý» baǵdarlamasy aıasynda byltyr aýylsharýashylyq salasynyń jalpy ónim kólemi 21 mıllıard 947 mıllıon teńge bolyp, oblys boıynsha birinshi oryndy ıemdendi. Sonyń ishinde mal sharýashylyǵynda 10 mıllıard 715 mıllıon 500 myń teńgeniń ónimi óndirildi.

Mal basyn óz tóli esebinen kóbeıtip otyrý úlken mánge ıe. Osy turǵydan alǵanda aýdanda mal basyn kóbeıtý artyǵymen oryndalyp otyr. Atap aıtqanda, jylqy jospardaǵy 17780-nen 20696-ǵa, túıe 239-dan 257-ge, iri qara 52748-den 53809-ǵa, qoı-eshki 489825-ten 500366-ǵa jetti. Sharýalardyń jemisti eńbegi nátıjesinde byltyr báıdibektikter 92692 tonna et, 288739 tonna sút óndirdi.

«Altyn asyq» baǵdarlamasy bo­ıynsha aýdanǵa 3310 tusaq satyp alynýy tıis edi. Meje tolyǵymen ıgerildi. «Qulan» baǵdarlamasy boıynsha 371 bas jylqynyń ornyna 480 jylqy satylyp alyndy. «Sybaǵa» baǵdarlamasy boıynsha 5490 iri qara alyndy.

Byltyr aýdanda 14 otbasylyq sút fermasy ashylýy kerek edi. Qazir osynsha sút fermasy jumys istep tur. Sondaı-aq bir balyq sharýashylyǵy iske qosyldy.

Elbasy N.Nazarbaev  H Dúnıe­jú­zi­lik Islam ekono­mı­ka­lyq forýmynda «Qazaqstan aýyl sharýashylyǵy maqsatyndaǵy, jalpy aýdany 90 mıllıon gektar jerge ıe bola otyryp, azyq-túlik qaýipsizdiginiń jahandyq ortalyǵyna aınala alady» degen bolatyn. Tabıǵaty qatal, adýyndy Arystandy-Qarabas jeliniń ótindegi aýdanda azyq-túlik tapshylyǵynan qutylý maqsatynda osyndaı jemisti jumystar atqarylyp jatyr. Iá, el ekonomıkasyn damytý jolynda eńbek yrǵaǵyn saqtaı otyryp, shalǵaı aýdannyń eńbekqor halqy osylaı uıymshyldyqtyń eren úlgisin tanytyp keledi. Tabys jolyndaǵy básekede báıdibektikterdiń bási basym.

 

Sabyrbek OLJABAI

 

Túrkistan oblysy

 

Sońǵy jańalyqtar

Jigittiń jaqsysy

Rýhanııat • Keshe

Uqsas jańalyqtar