Aımaqtar • 14 Mamyr, 2020

Abaı aılaǵy teńizge attanady

64 retkórsetildi

Oral qalasyndaǵy «Zenıt» zaýyty Qazaqstan áskerı teńiz kúshteri úshin Kaspıı teńizindegi shekara kúzetine arnalǵan manevrlik turaq pýnktin sýǵa túsirdi. Bıyl 175 jyldyǵy atalyp otyrǵan uly qazaq aqynynyń esimin ıelengen jyljymaly aılaq – elimizde bul baǵytta jasalǵan tuńǵysh tehnıka.

Sýretterdi túsirgen Rafhat HALELOV

Bul oraldyq «Zenıttiń» konveıerinde jasalǵan otyz birinshi teńiz nysany. Manevrlik turaq pýnkti – stasıonarlyq aılaqtardan, negizgi ortalyqtan alys jerde qyzmet etýshi shekara kemeleri men kúzet katerlerine óte qajetti kómekshi qural. Uzyndyǵy 50, eni 10 metrlik jyljymaly aılaqtyń qyzmetin bir mezgilde eki úlken keme, eki shaǵyn shekara kateri paıdalana alady. Iаǵnı, budan bylaı elimizdiń ońtústik teńiz shekarasynda júrgen kúzet kemeleri janarmaı, sý, tamaq qoryn toltyrý úshin negizgi bazaǵa uzaq jol shekpeıdi. Onyń bári «Abaı» esimin ıelengen manevrlik turaq pýnktiniń kómegimen atqarylady. Jyljymaly aılaq negizinen Mańǵystaý oblysyndaǵy Quryq eldi mekeniniń mańynda ornalaspaq. Arnaıy almaly-salmaly apparel kópir arqyly jaǵamen jalǵasyp, janarmaı jáne azyq-túlik qoryn tolyqtyryp otyrady. 10 kúnge deıin avtonomdy júre alady. Tabıǵattyń qolaıly kezeńinde ashyq teńizge de shyǵa alatyn jyljymaly aılaqtyń qyzmetin teńizshiler de óte joǵary baǵalap otyr.

123

- «Zenıt» zaýytynyń ónimderi bizdiń shekara qyzmetinde óte joǵary baǵalanady. Bul kemelerdiń sapasy joǵary, júrdek, óte yńǵaıly. Oralda jasalǵan kemeler men katerlerdiń kómegimen bıylǵy tórt aı ishinde elimizdiń teńiz shekarasyn buzǵan 41 quqyqbuzýshyny qolǵa túsirip, 1 mlrd teńgeden astam shyǵyndy óndirip aldyq. Búgingi manevrlik turaq pýnkti bizdiń kemelerdiń jumysyn odan ári jaqsartyp, avtonomdyǵyn kúsheıtetin boldy, – deıdi Qazaqstan Respýblıkasy Ulttyq Qaýipsizdik Komıteti Shekara qyzmeti dırektorynyń birinshi orynbasary Aıdar Aımurzın.

«Zenıt» zaýytynyń ár kemesin sýǵa túsirý saltanatyna buryn halyq kóp jınalyp, erekshe toı bolýshy edi. Karantın kesirinen qala halqy kele almasa da, zaýyt ujymy bul kúndi ataýsyz qaldyrmady. Birneshe jumysshy elimizdiń Shekara qyzmetiniń alǵys hatyna ıe boldy. Batys Qazaqstan oblysynyń ákimi Ǵalı Esqalıev te zaýytty sońǵy 30 jyldan beri úzdiksiz basqaryp kele jatqan Vıacheslav Ýálıevke, zaýyt ujymyna eseli eńbegi úshin alǵys aıtty.

123

- Sýdaǵy syıymdylyǵy 500 tonnadan astam manevrlik turaq pýnktin paıdalanýǵa berý – elimizdiń qorǵanys qabiletin nyǵaıtýǵa arnalǵan úlken jumys. «Zenıt» zaýyty jyldan jylǵa tájirıbesi molaıyp, kúrdeli tehnıkalardy jasap keledi. Elimizde tuńǵysh ret jasalyp otyrǵan jyljymaly aılaq qurylysy úshin zaýyt ujymyn quttyqtaımyn. Sondaı-aq zaýytty memlekettik tapsyryspen qamtamasyz etken Qazaqstan Respýblıkasy Úkimetiniń basshysyna, «QazaqstanInjınırıng» kompanııasy basshylaryna alǵys bildiremin. Bizdiń Oral qalasynda tek «Zenıt» emes, «Batys Qazaqstan mashına jasaý kompanııasy», «Gıdroprıbor» zaýyttary da memlekettik tapsyrys alyp, qorǵanys baǵytyndaǵy ónimderdi shyǵaryp otyr. О́ńir ekonomıkasy úshin bul úlken kómek. Búginde «Zenıt» zaýytynda 900-deı jumysshy qyzmet etedi. Men zaýyt jumysshylarynyń sany burynǵy kezdegideı 4,5 myń adamǵa jetip, ósip-órkendeýin tileımin, - dedi Ǵalı Nájimedenuly.

Jyljymaly aılaqty sýǵa túsirý saltanatynan keıin biz onyń jańa qojaıynyn áńgimege tarttyq.

- Qazaqstan áskerı teńiz kúshteriniń negizgi bazasy Atyraý, Baýtıno jáne Aqtaý qalalarynda ornalasqan. Al bizdiń teńiz shekaramyz óte úlken, ásirese ońtústik jaǵalaýda bizdiń kemelerge qyzmet kórsetetin aılaq joq. Sondyqtan olar janarmaı, azyq-túlik qoryn toltyrý úshin 200 mıll jol júrip, negizgi bazaǵa keletin edi. Mysaly bizdiń katerler Quryq pen Baýtıno arasyna 10 saǵat júrer edi. Endi ýaqyt únemdeledi, túrli oqıǵalarda jedel áreket etýge múmkindik týady. Bizdiń kemelerdiń derbes qyzmet etý múmkindigi molaıady. Qaýipsiz toqtap tura alady. Sondyqtan bul manevrlik turaq pýnkti bizdiń qyzmetimizge óte mańyzdy qural boldy, - deıdi Shekara qyzmetiniń Teńiz basqarmasynyń bastyǵy, 1 rangaly kapıtan Sabyr Hasanov.

123

Aıta keteıik, dál qazir oraldyq «Zenıt» zaýytynyń konveıerinde sýdaǵy syıymdylyǵy 70 tonnalyq «Aıbar» kemesi jáne 2 dana «Qaısar» júrdek kateri jasalyp jatyr. Zaýyt dırektorynyń óndiris jónindegi orynbasary Vıktor Podhvatılınniń aıtýynsha sýdaǵy syıymydylyǵy 750 tonnalyq alyp keme qurastyrý jobasy talqylanyp jatyr eken. Eger memleket tapsyrys berilse, ol 2021 jyly qolǵa alynbaq. 

12

...Al búgingi «Abaı» jyljymaly aılaǵy Shaǵan ózeninde birneshe kún synaqtan ótip, Jaıyq ózeni arqyly Atyraýǵa, odan ári Baýtıno aılaǵyna jetkiziledi. Sol jerde tolyq jabdyqtalyp, qorytyndy synaqtan ótken soń Qazaqstan Qarýly Kúshteriniń qaramaǵyna berilmek.

123

 

 

Batys Qazaqstan

Sońǵy jańalyqtar

ForteBank: Bir dollar – 388 teńge

Qazaqstan • Búgin, 15:35

Nurbank 20 mlrd teńgege kapıtaldandyryldy

Ekonomıka • Búgin, 15:29

Áke rýhynan qýat alǵan qaısar jan

Rýhanııat • Búgin, 11:54

Abylaıhannyń aq joly

Aımaqtar • Búgin, 10:05

Uqsas jańalyqtar