Prezıdent • 19 Mamyr, 2020

Qasym-Jomart Toqaev Joǵary Eýrazııalyq ekonomıkalyq keńestiń otyrysyna qatysty

432 retkórsetildi

Memleket basshysy Joǵary Eýrazııalyq ekonomıkalyq keńestiń beıne konferensııa formatynda ótken kezekti otyrysyna qatysty. Bul týraly Aqordanyń baspasóz qyzmeti habarlady.

Onlaın sammıtke Armenııa Respýblıkasynyń Premer-Mınıstri Nıkol Pashınıan, Belarýs Respýblıkasynyń Prezıdenti Aleksandr Lýkashenko, Qyrǵyz Respýblıkasynyń Prezıdenti Sooronbaı Jeenbekov, Reseı Federasııasynyń Prezıdenti Vladımır Pýtın jáne Eýrazııalyq ekonomıkalyq odaq janyndaǵy baqylaýshy memlekettiń basshysy retinde Moldova Respýblıkasynyń Prezıdenti  Igor Dodon, sondaı-aq, Eýrazııalyq ekonomıkalyq komıssııa alqasynyń tóraǵasy  Mıhaıl Mıasnıkovıch qatysty.

Jıynnyń kún tártibinde 2025 jylǵa deıingi eýrazııalyq ekonomıkalyq ıntegrasııanyń strategııalyq damýy týraly másele talqylandy. Otyrys barysynda Memleketter basshylary Eýrazııalyq ekonomıkalyq odaq aıasyndaǵy yntymaqtastyqtyń basym baǵyttaryn, sonyń ishinde, Kýbaǵa Eýrazııalyq ekonomıkalyq odaq janyndaǵy baqylaýshy memleket mártebesin berý máselesin qarastyrdy.

Qazaqstan Prezıdenti óz sózinde «2025 jylǵa deıingi eýrazııalyq ekonomıkalyq ıntegrasııanyń strategııalyq damý baǵyttary týraly» qujattyń jobasyna erekshe nazar aýdardy.

Qasym-Jomart Toqaev bul mańyzdy qujatty qabyldaý ıdeıasyn qoldaı otyryp, Strategııanyń keıbir bólimderin qaıta talqylap, áli de pysyqtaı túsý kerek ekenin aıtty.

– Aldaǵy birneshe jylǵa arnalǵan ıntegrasııanyń negizin qalaıtyn atalǵan qujattyń erekshe mańyzdy ekenin eskere otyryp, ony áli de talqylap, betpe-bet kezdesý barysynda qabyldaǵan jón. Erte me, kesh pe, biz bir-birimizben kezdesemiz, – dedi Memleket basshysy.

Sonymen qatar Prezıdent osy qujatqa qatysty birqatar túsindirme jasady. Qasym-Jomart Toqaev birinshi kezekte taýarlardyń kedergisiz ári shekteýsiz tasymalyn is-júzinde qamtamasyz etý, sektorlar boıynsha taraptarmen kelisilgen biryńǵaı qyzmet kórsetý naryǵyn kezeń-kezeńimen qurý, ortaq energetıkalyq jáne qarjy naryǵyna daıyndalý qajet dep sanaıdy.

Memleket basshysy Odaqqa múshe elder arasyndaǵy ekijaqty yntymaqtastyqtyń kópqyrly ekenin atap ótip, onyń ekonomıkalyq, áleýmettik, gýmanıtarlyq qatynastardy qamtıtynyn jetkizdi.

– Sondyqtan atalǵan máselelerdi besjaqty formatta Eýrazııalyq ekonomıkalyq komıssııany qatystyra otyryp qarastyrý, onyń naqty iske asýyn qıyndatady. Densaýlyq saqtaý, bilim jáne ǵylym salalaryn Eýrazııalyq ekonomıkalyq komıssııanyń quzyretine tolyq kólemde berý, onyń ekonomıkalyq baǵytyn aıtarlyqtaı ózgertip jiberýi múmkin. Iаǵnı, 2015 jylǵy Eýrazııalyq ekonomıkalyq odaq qurý týraly kelisimniń mánine qaıshy keledi, – dedi Qasym-Jomart Toqaev.

Qazaqstan Prezıdentiniń aıtýynsha, ıntegrasııalyq jumys ulttyq quqyqtyq júıeniń erekshelikterin eskerýge tıis ári ulttyq zańnamany úılestirý jáne birizdendirý máselelerin qarastyrý kezinde «jetkilikti qajettilik» qaǵıdatyn ustanýy kerek.   

– Strategııada  usynylǵan zańnamanyń «úılestirýge jáne birizdendirýge» qatysty quqyqtyq jaýapkershilik ornatý bólimindegi ákimshilik jáne qylmystyq, keden isi, tehnıkalyq retteý, tutynýshylardyń quqyǵyn qorǵaý sııaqty birqatar sala, bizdiń pikirimizshe, aqylǵa qonymdy jetkiliktilik qaǵıdatyna áli de tolyq jaýap bermeıdi. Al bul ulttyq qoǵamdyq oı-pikirdiń Strategııany qabyldamaýyna alyp keledi. О́ıtkeni Strategııa úkimetter men parlamentterdiń derbes quqyǵyn shekteıdi, – dedi Prezıdent.   

Sonymen qatar Qasym-Jomart Toqaev Eýrazııalyq ekonomıkalyq komıssııanyń ókilettigin keńeıtý máselelerine muqııat bolýǵa shaqyrdy.

– Eýrazııalyq ekonomıkalyq odaqqa múshe-memleketterdiń qyzmet kórsetý, ózara saýda máseleleri boıynsha úshinshi elmen ótkizetin ekijaqty kelissózderine Komıssııanyń qatysý quqyǵyn berý qosymsha zertteýdi qajet etedi, – dedi Prezıdent.

Memleket basshysy dál qazirgi jaǵdaıda Eýrazııalyq ekonomıkalyq odaqpen yntymaqtastyqtyń basym baǵyty ekonomıkany qaıta qalpyna keltirý máselesi boıynsha qurylýy kerek ekenin jetkizdi. Qasym-Jomart Toqaev О́zbekstan Parlamentiniń Eýrazııalyq ekonomıkalyq odaqqa baqylaýshy memleket retinde kirý týraly sheshimin quptady.

Memleket basshysy ózara saýda, bıznesti qoldaý, sıfrlandyrý jáne kóliktik logıstıka salalaryndaǵy yqpaldastyq máselelerin odan ári nyǵaıtý jónindegi naqty usynystaryn ortaǵa saldy.

Birinshiden, Qazaqstan Prezıdenti pandemııa kezinde paıda bolǵan barlyq shekteýler men kedergilerdi kezeń-kezeńimen alýdyń josparyn jasaý qajet dep sanaıdy.

– Bizdiń densaýlyq saqtaý, sanıtarlyq, veterınarlyq jáne ózge de baqylaýshy vedomstvolarymyz daǵdarystan sabaq alyp, sondaı-aq, bir jaǵynan azamattarymyzdyń densaýlyǵyn saqtaıtyn, ekinshi jaǵynan taýarlardyń kedergisiz qozǵalysyn qamtamasyz etetin yqpaldastyqtyń tıimdi mehanızmderin usynýy qajet. Pandemııaǵa qarsy kúres kezinde, odan keıingi shekteýler alynǵan kezeńde de kólik qurylymdarynyń, sanıtarlyq qyzmetterdiń, shekaralyq vedomstvolardyń jumysy júıeli bolýy mańyzdy, – dedi Qasym-Jomart Toqaev.

Memleket basshysy ekinshi másele retinde Eýrazııalyq ekonomıkalyq odaqtyń aqparattyq júıesin biriktirý jumystaryn qolǵa alýdyń mańyzdylyǵyn aıtty.

– Memlekettik organdarymyzdyń yqpaldastyq ornatqan negizgi aspektilerin sıfrlandyrý arqyly bizdiń elderimiz bıznes-prosesterdi jeńildetýge, ózara taýar aınalymyn arttyrýǵa, bızneske ákimshilik júktemeni azaıtýǵa qol jetkizedi, – dedi Qasym-Jomart Toqaev.

Úshinshiden, Qazaqstan Prezıdenti kólik-logıstıka qyzmetin damytý qajet dep sanaıdy.

– Atalǵan bastama aıasynda biz ulttyq taýar ótkizý júıesin qurýdy bastap kettik. Ol 2022 jylǵa qaraı 24 kóterme-taratý ortalyǵynan turatyn bolady. Bul 5 mıllıon tonna aýyl sharýashylyq ónimin saqtap, óńdep, taratýǵa múmkindik beredi. Odaqqa múshe múddeli elderdiń arasynda taýar taratýdyń ortaq júıesin qurý múmkindigin qarastyrýdy usynamyn, – dedi Memleket basshysy.

Qasym-Jomart Toqaev bıznesti qoldaý máselesine de erekshe nazar aýdardy. Prezıdent qazirgideı daǵdarys kezeńinde Eýrazııalyq ekonomıkalyq odaqqa múshe memleketterdiń barlyq resýrsy jumys oryndaryn turaqtandyrýǵa jáne saqtap qalýǵa baǵyttalǵanyn aıtty. Sonymen qatar Memleket basshysy Odaqtyń shyǵyny kóp jekelegen sheshimderin oryndaý, atap aıtqanda, qazirgi daǵdarys jaǵdaıynda keıbir taýar túrlerin mindetti túrde tańbalaý asa qajet emes dep esepteıdi.

Qazaqstan Prezıdenti Eýrazııalyq ekonomıkalyq odaqqa múshe elderdiń qarjy-ekonomıka mınıstrlikteri basshylarynyń, jalpy úkimetterdiń daǵdarystan keıingi kezeńdegi syrtqy syn-qaterler men ekonomıkany damytýǵa qatysty sharalardy talqylaý úshin arnaıy alań ashyp, ony belsendi qoldanýdyń mańyzdylyǵyn málim etti.

Sammıt qorytyndysy boıynsha Qasym-Jomart Toqaevtyń usynysymen «2025 jylǵa deıingi eýrazııalyq ekonomıkalyq ıntegrasııanyń strategııalyq damý baǵyttary týraly» qujat negizinen maquldanǵanymen, qabyldanǵan joq. Odaqqa múshe memleketterdiń úkimetteri men Komıssııaǵa Strategııany pysyqtaý tapsyryldy.

«Eýrazııalyq bestiktiń» kóshbasshylary Joǵary Eýrazııalyq ekonomıkalyq keńestiń kelesi otyrysyn 2020 jyldyń kúzinde Mınsk qalasynda ótkizýge ýaǵdalasty.

Sońǵy jańalyqtar

Abaı murasy Bishkekte talqylandy

Rýhanııat • Búgin, 20:36

«Adal bilim» jobalyq keńsesi quryldy

Qazaqstan • Búgin, 19:47

Baspanaly bolý múmkindikteri aıtyldy

Aımaqtar • Búgin, 18:15

Alakól jaǵalaýy abattandyrylyp jatyr 

Aımaqtar • Búgin, 17:44

ForteBank: Bir dollar – 388 teńge

Qazaqstan • Búgin, 15:35

Uqsas jańalyqtar