Aımaqtar • 23 Mamyr, 2020

Maıdan dalasynan tabylǵan báki

1427 ret kórsetildi

Uly Otan soǵysynda Lenıngrad mańynda urystarǵa qatysqan qazaq jaýyngeriniń joǵalǵan bákisi 80 jyldan keıin maıdan dalasynan tabyldy.

Ekinshi dúnıejúzilik soǵys alańdary ótken jerden jyl saıyn izshiler jerlenbeı qalǵan jaýynger súıekterin, jeke buıymdaryn taýyp, olardyń kim ekenin, ıesin izdestirip jatady. Reseı Federasııasy Lenıngrad oblysyndaǵy osyndaı izshiniń biri Nıkolaı Lebedev sabynda «Jaqsylyqov R.» jáne «G.r. 1924» degen jazýy bar tot basqan báki taýyp alǵan eken. Maıdan saıttarynan qarap, 1924 jyly týǵan Rahym Jaqsylyqovtyń Batys Qazaqstan oblysynyń týmasy ekenin, soǵystan eline aman oralǵanyn anyqtapty. Sóıtip, batysqazaqstandyq ólketanýshy, tarıh magıstri Aıbolat Qurymbaevtan kómek suraǵan.

- О́zin Nıkolaı Lebedov dep tanystyrǵan beıtanys izshi habarlasyp, máseleniń mán-jaıyn aıtty. Taýyp alǵan pyshaǵynyń sýretin jiberdi. «Qazaqstanda adamdar óte baýyrmal, ásirese týystyq qarym-qatynasty óte jaqsy saqtaıdy dep estýshi edim. Myna pyshaqtyń ıesiniń týystaryn tabýǵa bolmas pa eken? Bul jádigerdi maıdangerdiń týystaryna nemese jergilikti mýzeıge tabystar edim» dedi. Men bul habardy áleýmettik jelige, Batys Qazaqstannyń Uly Otan soǵysy jyldaryndaǵy tarıhyna arnalǵan paraqshaǵa jarııaladym. Arada birer saǵat ótpeı jatyp maıdangerdiń nemeresi habarlasty! – deıdi Aıbolat Shamuratuly.

Batys Qazaqstan oblysynyń Chapaev aýdanynan 1942 jyly tamyz aıynda maıdanǵa attanǵan Rahym atamyz soǵysta erekshe erligimen talaı kózge túsken naǵyz batyr eken. Kýrsk, Brıansk, Smolensk, Latvııa, Lıtva jerlerin jaýdan azat etýge qatysqan jaýynger urystaǵy erlikteri úshin III jáne II dárejeli Dańq ordenimen, «Erligi úshin» medalimen nagradtalǵan.

- Ákemiz birneshe ret jaralansa da qaıta sapqa qosylyp, soǵys bitken soń da qalpyna keltirý jumystaryna qatysyp, 1947 jyldyń kúzinde elge kelipti. Soǵysta áýeli baılanysshy bolǵan, keıin 76 mıllımetrlik zeńbirektiń atqyshy bolǵan. Maıdannan kelgende keýdesinde 13 orden-medal jarqyrap turypty. Elge kelgen soń Oral oblysy Chapaev aýdanyndaǵy «Pervomaı» keńsharynyń Bulan bólimshesinde qarapaıym júrgizýshi boldy. Ákemiz 1996 jyly dúnıeden ótti, ol kisiden bir ul, eki qyz barmyz,- deıdi maıdangerdiń uly Isataı Jaqsylyqov.

Búginde burynǵy «Pervomaı», qazirgi Qabyrshaqty aýylynyń bir kóshesi maıdanger Rahym Jaqsylyqovtyń esimin ıelengen. Dál osy kóshede batyrdyń qyzy Sábıla, týystary turady. Sonaý soǵys jyldarynyń jańǵyryǵy, ákesiniń kózindeı bolǵan jádigerdiń tabylǵanyna bári de qýanyshty.

Sońǵy jańalyqtar

Rýbl baǵamy quldyrady

Ekonomıka • Keshe

Uqsas jańalyqtar