Qazaqstan • 25 Mamyr, 2020

Qashyqtan oqytýdy sapaly júrgizýdegi 10 qadam

117 ret kórsetildi

Búkilálemdik pandemııaǵa baılanysty qazirgi tańda álem boıynsha 167 memleket qashyqtan oqytýǵa kóshti. 1 mıllıardtan astam oqýshy qashyqtan bilim alyp jatyr. Qazaqstannyń bilim berý júıesi de 2020 jyldyń 6 sáýirinen bastap qashyqtan oqytý formasyna aýysqany belgili. Bul – úlken synaq. Osy synaqty abyroımen eńserý maqsatynda Bilim jáne ǵylym mınıstrligi tarapynan qajetti jaǵdaılar jasalyp, halyqty der kezinde aqparatpen qamtamasyz etýde. Abaı atyndaǵy respýblıkalyq mamandandyrylǵan daryndy balalarǵa arnalǵan qazaq tili men ádebıetin tereńdete oqytatyn orta mektep-ınternaty qashyqtan oqytý úderisin sapaly júrgizýde tómendegi qadamdardy júzege asyrýda:

Mektep-ınternattyń Jarlyǵyna sáıkes 1 qyrkúıek pen 27 jeltoqsan aralyǵynda demalyssyz oqyǵan oqýshylar 29 jeltoqsan - 27 qańtar aralyǵynda qysqy demalysta boldy. Osyǵan baılanysty 2020 jyldyń 16 naýryzynan bastap mektep-ınternat qashyqtan oqytý júıesine kóshti. Bilim jáne ǵylym mınıstri A. Aımaǵambetov tótenshe jaǵdaıda oqytý úderisin uıymdastyrýǵa baılanysty brıfınginde aıtqan qashyqtan oqytýdyń formalary boıynsha Abaı atyndaǵy mektep-ınternaty onlaın platformalar men áleýmettik jeliler, telearna arqyly oqytýdy qolǵa aldy. Pán muǵalimi dáris sabaǵyn, tapsyrmasyn kúndelikke júkteıdi. Oqýshy kóredi, júkteıdi, túsinedi. Qosymsha bilimin arttyrý maqsatynda «Balapan» telearnasy arqyly oqytylatyn beınesabaqtardy kórip, tapsyrmalaryn oryndaıdy.

Karantın rejıminde ata-analar men oqýshylardyń mekteppen birlikte, úılesimde jumys isteýi úshin túrli onlaın psıhologııalyq trenıngter ótkizildi. Oqýshylar men ata-analarǵa keńes berilip, qashyqtan oqýdy sapaly júrgizýge baǵyt-baǵdar kórsetildi. Ár synypta onlaın ata-analar jınalysy ótkizilip, jańa oqý júıesi týraly suraqtarǵa jaýap berilip, túsindirý jumystary júrgizildi. О́z kezeginde ata-analar da beınerolıkter arqyly mektep ujymyna, ustazdarǵa degen alǵystaryn aıtyp jatty.

Qysyltaıań shaqta elge qoldaý kórsetý maqsatynda «Bádik aıtys» dep atalatyn erekshe estafetany bastaýdy jón kórdim. Bádik – turmys-salt jyrlarynyń bir túri. Alǵashqyda aýrý adamdy nemese maldy emdeý maqsatynda aıtylǵan. Birte-birte bádikti qyzdar men jigitter toby bolyp bólinip aıtý salty shyqqan. Halyq aýyz ádebıetiniń jádigeri bolǵan osy aıtysty 10-synyp oqýshysy, aıtysker aqyn Abıtılda Nurıslam estafeta túrinde bastap, ustazy, aıtysker aqyn, mektep-ınternat túlegi Serik Qalıevke joldady. Álemdi jaýlaǵan indetti baıyrǵy dástúr boıynsha «kósh, kósh» dep bádik aıtyspen alastap, betin qaıtarýǵa baǵyttalǵan Abaı mektep-ınternaty shákirtteriniń estafetasy keler kúnnen jaqsylyqty ǵana úmit etip, 11 mamyr kúni aıaqtaldy.

Mektep-ınternatta «Taǵylym» jobasynyń aıasynda aıtysker aqyn, tanymal jýrnalıst, zertteýshi ǵalym, tilshi, professorlarmen jáne ózge de ár salanyń maıtalman mamandarymen tanymdyq sabaqtar ótkizilip otyrady. Qashyqtan oqý júıesinde de osy úrdis toqtamaı, mektep-ınternattyń resmı instagram paraqshasynda tikeleı efır arqyly jalǵasyn tapty. Atap aıtar bolsaq, sáýir aıynda S.Demırel atyndaǵy ýnıversıtet professory, pedagogıka ǵylymdarynyń kandıdaty B.A.Jumaqaeva «Abaı taǵylymy» taqyrybynda, mamyr aıynda M.Áýezov atyndaǵy Ádebıet jáne óner ınstıtýtynyń Ejelgi dáýir ádebıeti jáne túrkologııa bóliminiń meńgerýshisi, dosent, fılologııa ǵylymdarynyń kandıdaty Qydyr T. E. «Ál-Farabı – órkenıet oıshyly» taqyrybynda onlaın tanymdyq sabaqtar ótkizdi.

Tótenshe jaǵdaı kezeńinde mektep-ınternat el tanyǵan túlekterdiń taǵylymdy taǵdyrynan syr shertetin «Balalyq shaqqa saıahat» jobasyn qolǵa aldy. Joba mektep-ınternattyń resmı instagram paraqshasynda tikeleı efır arqyly júrgizilýde. Osy joba aıasynda sáýir-mamyr aılarynda memleket jáne qoǵam qaıratkeri, general-leıtenant Ádil Shaıahmetov, ardager ustaz, QR Eńbek sińirgen qaıratkeri Orynsha Qarabalına, keden isiniń polkovnıgi Beken Nurahmetov, «TAS GROUP» kompanııalar tobynyń negizin qalaýshy kásipker Dýlat Tastekeev, aıtysker aqyn, QR Mádenıet qaıratkeri Serik Qalıev, QR Bilim jáne ǵylym mınıstriniń qoǵam jáne BAQ-pen baılanys máseleleri boıynsha keńesshisi Erbolat Muhamedjanmen onlaın kezdesýler ótkizilip, oqýshylarǵa mektep-ınternat túlekteriniń ónegeli ómir joly dáripteldi.

Hakim Abaıdyń 175 jyldyǵyna oraı 2019-2020 oqý jylynyń basynda qolǵa alynǵan mektep-ınternat janynan «Abaı úni» jýrnalyn shyǵarý isi de tótenshe jaǵdaıǵa qaramastan jalǵasyn tapty. Uly aqynnyń teńizdeı tereń murasynan sýsyndatar tanymdyq materıaldar, muǵalimderge arnalǵan ádistemelik kómek, mektep-ınternattyń tynys-tirshiliginen habar beretin, búgingi sarynǵa saı, zamanaýı tásildegi sapaly sýretter men áserli dızaınymen erekshelenetin atalmysh jýrnaldyń №3 sany jaryq kórip, oqyrmanǵa elektrondy formatta jol tartty, kezekti sany kitaphana qoryna tapsyryldy. Jýrnaldyń kezekti №4 sany oqý jylynyń sońynda jaryq kórmek.

Syn saǵatta oqýshylardyń ultjandylyq, patrıottyq sezimderiniń qalyptasýyna áser etetin tárbıe jumystary da qalys qalmady. Uly jeńistiń 75 jyldyǵy, Otan qorǵaýshylar merekesi, Qazaqstan halyqtarynyń birligi kúni syndy merekeler men abaıtanýshy Mekemtas Myrzahmetulynyń 90 jyldyǵy, jazýshy Ánýar Álimjanovtyń 90 jyldyǵy, aqyn Jumeken Nájimedenovtyń 85 jyldyǵy syndy aıtýly datalarda onlaın tárbıe saǵattary ótkizilip, eń úzdik dep tanylǵan beınerolıkter áleýmettik jelilerde jarııalandy. Sonymen qatar, Atyraý telearnasy jarııalaǵan #Jumeken85 óleń estafetasyn Nur-Sultan qalasyndaǵy №82 «Daryn» mamandandyrylǵan lıseıinen qabyl alyp, N.Nurmaqov atyndaǵy Qaraǵandy oblystyq mamandandyrylǵan mektep-ınternatyna joldadyq. Mamyr aıynda ál-Farabıdiń 1150 jyldyǵy, uly Abaıdyń 175 jyldyǵy aıasynda 17 aımaqty qamtıtyn #Ulylarúndestigi estafetasy bastaldy.

Mektep-ınternatta oqýshylardyń kitap oqýǵa degen qyzyǵýshylyǵyn arttyrý maqsatynda «100 kitap oqý» aksııasy júrgiziledi. Tótenshe jaǵdaıǵa baılanysty bul úrdis toqtap qalmaý úshin google classroom oqý platformasynda mekteptiń arnaıy elektrondy kitaphanasy ashylyp, kórkem ádebıettermen tolyqtyryldy. Sonymen qatar, bul kitaphanaǵa pán oqýlyqtarynyń elektrondy nusqalary men siltemeleri salyndy. Oqýshylar sabaqtan tys ýaqyttarynda kitaphanaǵa kirip, kitap oqýmen aınalysýda.

Qazirgi ýaqytta ata-analar men bitirýshi túlekterdiń ótinishi boıynsha mektep-ınternatta Ulttyq biryńǵaı testileýge qosymsha daıyndyq júrgizý kestesi qurylyp, pán muǵalimderi daıyndyq sabaqtaryn júrgizýde. Qashyqtan oqytý rejıminde 11-synyp oqýshylary BǴM tarapynan usynylǵan 70 nusqa synaq testterin onlaın túrde tapsyryp, bilimderin jetildirip otyrdy. L.Gýmılev atyndaǵy Eýrazııa ulttyq ýnıversıtetiniń Jýrnalıstıka jáne saıasattaný dekany, professor, alashtanýshy ǵalym, Qaırat Saq, Teleradıo jáne baılanys kafedrasynyń meńgerýshisi, dosent, belgili aıtysker aqyn Serikzat Dúısenǵazy bastaǵan ǵalymdarmen Zoom platformasy arqyly 11-synyptarǵa kásibı baǵdar júrgizildi.

Hakim Abaıdyń 175 jyldyǵy aıasynda atqarylǵan is-sharalar az emes, áli de jalǵasyn tabýda. Oqýshylar aqynǵa arnaýlaryn, Abaı shyǵarmashylyǵyn taldap jazǵan esse jumystaryn tolassyz jiberýde. Osyǵan baılanysty oqý jylynyń sońynda Abaıdyń 175 jyldyǵy aıasynda atqarylǵan is-sharalar esebi retinde «Abaı jaqqan bir sáýle sónbeý úshin...» atty jınaq kitaby jaryq kórmek. Uly aqyn shyǵarmashylyǵyn respýblıka kóleminde keńinen nasıhattaý maqsatynda 2020 jyldyń jeltoqsan aıynda «Abaı álemi» atty qashyqtan shyǵarmashylyq baıqaý (esse jazý, aqyndar músháırasy) ótkizý josparlanýda.

Álem kún saıyn jańarýda. Kún saıyn túrli jańalyqtar ashylýda. Kún saıyn jańa jobalar iske asyrylýda. Sondyqtan ár kúnge jańasha kózqaraspen qaraýǵa daıyn bolý kerek. О́ıtkeni, bul – zaman talaby. Aqparattandyrylǵan ǵasyrda ozyq tehnologııanyń úzdik jemisterin paıdalaný – damyǵan elderdiń sheshimi. Sondyqtan elimiz úshin bul da bir jańa beles, jańa shyń! Osy belesti baǵyndyrýǵa bar áreketti jasap jatqan QR Bilim jáne ǵylym mınıstrligine, Abaı mektebiniń ujymyna tek qana tabys, sáttilik tileımin!

 

Roza Seksenova

Abaı atyndaǵy respýblıkalyq mamandandyrylǵan

daryndy balalarǵa arnalǵan qazaq tili men ádebıetin

tereńdete oqytatyn orta mektep-ınternat dırektory

Sońǵy jańalyqtar

Ult mádenıetiniń uly janashyry

Elbasy • Búgin, 15:30

Rýlge ıe bola almaı qaldy

Aımaqtar • Búgin, 09:52

Eńsesi bıik elorda

Búgin, 06:51

Egemen eldiń ordasy

Elbasy • Búgin, 06:31

Kóshpeli mobıldi brıgada

Koronavırýs • Búgin, 06:28

6 myń adam qarjylaı kómek alady

Qoǵam • Búgin, 06:23

«Dombyra» oqý quraly jaryqqa shyqty

Rýhanııat • Búgin, 06:18

El birliginiń kepili

Elbasy • Búgin, 06:08

Negizsiz qymbattaýy retteledi

Prezıdent • Búgin, 06:05

Ýaqyttan ozǵan kóshbasshy

Elbasy • Búgin, 06:02

Uqsas jańalyqtar