Qazaqstan • 25 Mamyr, 2020

Áskerı qyzmetkerler Saǵadat Nurmaǵambetovty eske aldy

26 ret kórsetildi

Eske alý rásimi búgin Nur-Sultan qalasyndaǵy «Jas ulan» respýblıkalyq áskerı mektebinde ótti. Áskerı qyzmetshiler Keńes Odaǵynyń Batyry, Halyq Qaharmany, Qazaqstannyń birinshi Qorǵanys mınıstri, atalmysh mektepke esimi berilgen armııa generaly Saǵadat Nurmaaǵambetovtyń músinine gúl shoqtaryn qoıdy. Bul týraly mınıstrliktiń baspasóz qyzmeti habarlady.

«Búgingi kúni Qarýly Kúshterdiń áskerı qyzmetshileri men respýblıkalyq áskerı mektep tárbıelenýshileri – bolashaq Otan qorǵaýshylar úshin Saǵadat Qojahmetuly Nurmaǵambetovtyń ómir joly Otanǵa degen batyldyq pen tózimdiliktiń úlgisi bolyp tabylady. Biz uly batyrlardyń muragerleri olardyń dańqty dástúrlerin saqtap, ári qaraı jalǵastyramyz degen senimdemin», – dedi Qorǵanys mınıstriniń orynbasary general-leıtenant Tımýr Dándibaev.

Saǵadat Nurmaǵambetov – ol ańyz adam. Onyń ómirbaıany-aty ańyzǵa aınalǵan jáne qaıtalanbas adam ómiriniń biregeı tarıhy. Áskerı batyrlyq pen qaırattylyq, ofıserlik erlik pen abyroıdyń úlgisi.

1941-1945 jj, Uly Otan soǵysynyń qatysýshy, Keńes Odaǵynyń Batyry, Halyq qaharmany, táýelsiz Qazaqstannyń birinshi Qorǵanys mınıstri Saǵadat Nurmaǵambetov 1924 jyly 25 mamyrda Aqmola oblysy Alekseevka aýdany Eńbek aýylynda dúnıege kelgen. Ol alǵashqy Túrkistan pýlemet áskerı ýchılıshesin, M. Frýnze atyndaǵy Áskerı akademııany, KSRO Qarýly Kúshteri Bas shtabynyń Áskerı akademııasy janyndaǵy Joǵary akademııalyq kýrstardy bitirgen.

1942 jyly ásker qataryna shaqyryldy, 1945 jyldyń mamyr aıyna deıin ol soǵys dalasynda pýlemet vzvody komandıri retinde, sodan keıin pýlemet rotasyn, atqyshtar batalonyn  basqardy. Krasnodar ólkesin, Ýkraına, Moldavııany, Batys Belorýssııany, Polshany azat etýge qatysqan.

1945-1946 jyldary Stepnoı áskerı okrýginiń joǵary oqý oryndary bóliminiń ınspektory boldy. Sodan keıin áskerı akademııada oqydy. 1950 jyldan 1984 jylǵa deıin Túrkistan áskerı okrýgi jedel bóliminiń aǵa ofıseri, motoatqyshtar polkiniń komandıri, 201-shi motoatqyshtar dıvızııasy shtabynyń bastyǵy, Qazaq KSR Azamattyq qorǵanys shtabynyń bastyǵy, Orta Azııa áskerı okrýgi áskerleri qolbasshysynyń orynbasary, Ońtústik ásker toby (Vengrııa) qolbasshysynyń birinshi orynbasary boldy.

1990-1992 jyldary soǵys, eńbek jáne Qarýly Kúshter ardagerleri Qazaq respýblıkalyq keńesiniń tóraǵasy, ardagerler, múgedekter jáne áskerı qyzmetshiler isteri jónindegi QR Joǵarǵy Keńesi komıtetiniń tóraǵasy, QR Memlekettik qorǵanys komıtetiniń tóraǵasy boldy.

Táýelsiz Qazaqstannyń Qarýly kúshteri quryla bastaǵan jyldary, 1992-1995 jyldar aralyǵynda Saǵadat Nurmaǵambetov Qazaqstan Qorǵanys mınıstri boldy. Dál osy ýaqytta Qazaqstan armııasynda mańyzdy reformalar qabyldanǵan, mańyzdy kez boldy. 1993 jyldyń mamyr aıynda oǵan «armııa generaly» áskerı ataǵy berildi. Bir jyldan keıin el Prezıdentiniń Jarlyǵymen Nurmaǵambetovke «Altyn juldyz» syılyǵymen Halyq Qaharmany ataǵy berildi.

1995 jyldyń qarashasynda general otstavkaǵa shyqty, sodan keıin Prezıdenttiń keńesshisi bolyp, birneshe ret Joǵarǵy Keńestiń depýtaty bolyp saılandy.

Ofıser Lenın, Oktıabr Revolıýsııasy, Qyzyl Tý, Qyzyl Juldyz, I, II dárejeli Otan soǵysy ordenderimen, «KSRO QK-degi Otan qyzmeti úshin» jáne basqa da kóptegen nagradalarmen marapattaldy. «Lısom k ognıý», «Nadejnyı straj sosıalıstıcheskıh zavoevanıı», «Moı perednıı kraı», «A v pamıatı net tıshıny» kitaptarynyń avtory. 

Armııa generaly Saǵadat Nurmaǵambetov 2013 jyly 89 jasynda ómirden ozdy. Alaıda, ol týraly estelikter máńgi jadymyzda qalady. Generaldyń erligi jáne batyrlyǵymen qazaqstandyq áskerı qyzmetshilerdiń myńdaǵan urpaǵy tárbıelenýde.

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar