Aımaqtar • 03 Maýsym, 2020

Qaraǵandynyń barlyq mektepteri men balabaqshalaryna jóndeý júrgiziledi

63 ret kórsetildi

Qaraǵandy oblysynda mektep bitirgen túlekter attestat alyp jatqanda, óńir basshysy kenshiler astanasyndaǵy jóndeý júrgizilip jatqan bilim oshaqtary men balabaqshalardy aralap shyqty.

Jeńis Qasymbek «Jumyspen qamtýdyń jol kartasy» baǵdarlamasy aıasynda istelinip jatqan jumystardyń barysymen tanysyp, merdiger kompanııalardyń mindetterin qalaı atqaryp jatqanyn tekserdi.

Eń birinshi aıaldaǵan nysan qaladaǵy №2 mýzyka mektebi boldy. Qabyrǵasy 1948 jyly qalanǵan bilim ordasynda kúrdeli jóndeý degen ómiri júrgizilmegen eken. Bul týrasynda atalǵan mekteptiń dırektory Marat Májıtov aıtyp berdi.

1

– Mektepte sońǵy ret aǵymdaǵy jóndeý 29 jyl buryn bolǵan. Jylda bólinetin qarjy tek maıda-shúıde jumystarǵa ǵana jetýshi edi. Qazir kúrdeli jóndeý bastaldy. Bárin de jańasyna aýystyramyz. Endi bizde jańa jylý jáne elektr júıesi, santehnıka bolady. Biz úshin bul úlken qýanysh. Jazǵy demalystan soń balalardy jańartylǵan mektep kútip alatyn bolady, – deıdi mektep basshysy qýanyshyn jasyra almaı.

Oqýshylarynyń sany 650 bala bolatyn bul mekteptiń jóndeýine bıýdjetten 78 mıllıon teńge bólingen.

2

Budan keıin oblys basshysy Maıqudyq eldi mekenindegi №13 mektepke at basyn tiredi. Osydan 34 jyl buryn salynǵan mektepte kúrdeli jóndeý birinshi ret júrgizilip jatyr eken. Ǵımarattyń shatyry aýystyrylyp, qasbeti jańartylady. Jańa terezeler, jylý júıesi ornatylyp, elektr montajdaý jumystary júrgiziledi. Sondaı-aq, mektep aýmaǵy kórkeıtilip jáne jańa sharbaqpen qorshalmaqshy.

– Mektep qaladaǵy belgili nysandardyń biri. Jóndeý jumysyna qomaqty qarjy bólindi. Bárin de balalar úshin jasap jatyrsyzdar, sondyqtan jumystyń sapasyn muqııat qadaǵalańyzdar. Sizderge úlken jaýapkershilik artylyp otyr. Jumys bitken soń, ózim kelip tekseretin bolamyn, – dedi  Jeńis Qasymbek jóndeý jumystarymen aınalysyp jatqan qurylys kompanııasynyń basshysyna qarata.

Jalpy, Qaraǵandy qalasynda barlyǵy 133 bilim berý nysany bar. Bıyl bulardyń bárine de jóndeý júrgiziledi. Munyń ishinde 29 mektepte kúrdeli jóndeý, al  41 bilim oshaǵynda aǵymdaǵy jóndeý jumystary qolǵa alynady. Sonymen qatar,  95 mekteptiń aýlalary abattandyrylady.

7

Qaraǵandy qalalyq bilim bóliminiń basshysy Gúlsim Qojahmetova buryn  mektep aýlalaryn abattandyrýǵa aqsha eshqashan bólinbegenin jáne bilim mekemeleriniń aýmaqtaryn dırektorlar kúni keshegige deıin óz kúshterimen rettep kelgenderin aıtty. Al kúrdeli jóndeýden jyl saıyn tek eki mektepti ótkizýge ǵana múmkindik bolǵan.

– Bıyl jóndeý jumystaryna mol qarajat bólingenine óte qýanyshtymyz.  Endi barlyq nysandardy tolyqtaı retke keltirýge múmkindik týdy, – deıdi ol.

Oblys basshysy mektepter men balabaqshalardan basqa Maıqudyqtaǵy mádenıet úıinde, «Nurbı» aýla klýbynda jáne «Lıteıshık» stadıonynda bolyp, ondaǵy jóndeý jumystardyń qalaı atqarylyp jatqanyn tekserdi. Qazirgi tańda jurttyń salmatty ómir saltyna degen kózqarasy jaqsy jaǵyna qaraı ózgergen. Sol sebepti de atalǵan sport nysany jergilikti turǵyndardyń jiti nazarynda. Jergilikti halyqtyń ótinishin jerge tastamaǵan oblys ákiminiń tapsyrmasynan keıin, qarjylandyrý kózi tabylyp, qazirgi ýaqytta atalǵan  stadıonda jóndeý jumystary júrip jatyr.

Jóndeý júrgizip jatqan «Dorstroıtrest» JShS dırektorynyń qurylys jónindegi orynbasary Maksım Vorobev jumystyń tamyz aıynda aıaqtalatynyn málimdedi. Stadıonda jasandy kógal alańy, tartan tóselgen júgirý joldary, qorshaý, jaryqtandyrý tirekteri, kıim sheshetin oryndar, dárethana, ákimshilik jáne kúzet bloktary bolady.

Jeńis Qasymbek Maıqudyqtaǵy aýlalardy abattandyrýǵa, ol jerlerde sporttyq nysandardyń bolǵanyna aırqysha nazar aýdarylatynyn atap ótti. О́ńir basshysy sol jerde Oktıabr aýdanynyń ákimi  Meıram Kojýhovqa 150 myńǵa jýyq halyq turatyn Maıqudyq eldi mekeninde taǵy da on jańa fýtbol alańyn salýdy tapsyrdy.

Sondaı-aq, ol merdiger kompanııa ókiline stadıondaǵy jóndeý jumystaryn ýaqytynda jáne sapaly etip bitirý kerektigin eskertti.

Jumys saparynyń sońynda oblys ákimi  «Jumyspen qamtýdyń jol kartasy» baǵdarlamasyn júzege asyrýdyń mańyzy men jaýapkershiligin taǵy bir márte eske saldy. «Barlyq jumys kestedegi merzimnen aýytqymaýy kerek.  Jergilikti ákimder jumys sapasyn udaıy baqylap otyrýy tıis», dep qorytty Jeńis Qasymbek. 

 

Qaraǵandy oblysy

Sońǵy jańalyqtar

Jetinshi maýsymnyń jetistigi

Rýhanııat • Keshe

Uqsas jańalyqtar