Rýhanııat • 08 Shilde, 2020

Elordada ıtalııalyq sýretshiniń óner ınstallıasııasy tanystyryldy

21 ret kórsetildi

Búgin Nur-Sultanda Birikken Ulttar Uıymynyń 75 jyldyǵyna oraı jáne COVID-19 indetine qarsy jahandyq kúresti qoldaý maqsatynda álemge áıgili sýretshi Mıkelandjelo Pıstolettonyń "Úshinshi jumaq" óner ınstallıasııasynyń onlaın tusaýkeseri ótti.

Joba Qazaqstandaǵy BUU, "Artios" kreatıvti agenttigi jáne Nur-Sultan qalasynyń ákimdiginiń qoldaýymen uıymdastyryldy. Bul ýaqytqa deıin álemniń jetekshi óner alańdarynda qoıylǵan belgili sýretshi Mıkelandjelo Pıstolettonyń avtorlyq týyndysy Qazaqstanda tuńǵysh ret tanystyryldy.

«Úshinshi jumaq» – adamzattyń turaqty damý maqsattaryna qol jetkizýge umtylysyn kórsetetin tehnologııa men tabıǵat arasyndaǵy teńgerimdi baılanys retinde iske asyrylǵan adamzat damýynyń úshinshi kezeńi.

Qazaqstandaǵy BUU Turaqty úılestirýshisi Norımasa Shımomýra myrza: «Inklıýzıvti ósý, gúldený jáne qaýipsiz ómirdi ornatý beıbitshilik pen qoǵam belsendiligine táýeldi, beıbit qoǵamda adamdar ózderiniń ishki qarama-qaıshylyqtaryn eńserý úshin birge jumys isteıdi. «Úshinshi jumaq» 2015 jyly barlyq memleketter qabyldaǵan, sonyń ishinde Qazaqstan da atsalysqan 17 Turaqty damý maqsattarynyń jáne barlyǵymyz qol jetkizýge umtylatyn birliktiń kórkem kórinisi bolyp sanalady».

«Úshinshi jumaq» - bul zamanaýı óner men Uly dala kóshpeli mádenıetiniń dástúrli materıaldarynyń úılesimi.  40 metrlik ınstallıasııany qurý kezinde tek jergilikti materıaldar, atap aıtqanda, BUU-ǵa múshe memleketterdiń sanyn beıneleıtin 193 sharshy metr aq kıiz ben arnaıy kestelengen basqurlar paıdalanyldy jáne olardyń árqaısysynda sheksizdikti beıneleıtin oıýlar maǵynasyn asha túsedi.

v

Matematıkalyq sheksizdik belgisinen shabyttana otyryp jasalǵan óner týyndysy qarama-qaıshylyqtardy jeńý, turaqty damý joldaryn tabý, beıbitshilik qurýǵa atsalysýdy bildiretin tabıǵat, tehnologııa jáne jańa kezeń álemderin beıneleıtin úsh sheńberden turady.

Installıasııanyń ashylý saltanatynda bı men mýzykalyq qoıylymdar kórsetildi. Qazaqstannyń kórnekti etnosazgeri Edil Qusaıynov mıstıkalyq jáne baqsylyq terbelisterimen tań qaldyratyn kómeımen án aıtý sheberligimen birqatar shyǵarmalar oryndady.

Kórkemóner ınstallıasııasy ashyq alańda Nurjol býlvary, Qazaqstan Respýblıkasy Prezıdentiniń rezıdensııasy – Aqorda aldyndaǵy amfıteatrda ornalasqan. Ony aldaǵy eki aı boıy tamashalýǵa bolady. Joba aıasynda onlaın rejıminde birneshe tanymdyq semınarlar, master klasstar jáne UN75 dıalogtaryn ótkizý josparlanýda.

«Úshinshi jumaq» osyǵan deıin Lývrda (Parıj), BUU-nyń Jenevadaǵy shtab-páterinde, Brıýsseldegi Eýropalyq Odaq Keńesinde, Mılanda, Tokıoda jáne álemniń basqa da qalalarynda kórsetilgen.

Sońǵy jańalyqtar

Uqsas jańalyqtar