Pikir • 08 Qyrkúıek, 2020

Agroónerkásipti qoldaý bıýrokratııadan arylsa eken...

13 ret kórsetildi

Memleket basshysy Qasym-Jomart Toqaevtyń bıylǵy Joldaýymen tanysyp shyqtym. О́zime shaǵyn jáne orta bıznes salasyn saýyqtyrýǵa qatysty aıtylǵan paıymy, onyń ishinde kásipkerlerdi qoldaý tetikterin jetildirý jaıyndaǵy oıy unady. Biz muny qoldaımyz. Endi agroónerkásip keshenin damytýǵa qatysty berilgen Prezıdent tapsyrmasy aıaqsyz qalmaı, óńirlerde oryndalsa quba-qup.

Ásirese aýyl sharýashylyǵy sektoryna qyzmet kórsetetin kvazımemlekettik kompanııalardyń jumysyn ońtaılandyrý bastamasynan biz sııaqty sharýalar úlken úmit kútedi. Prezıdenttiń óz kásibime qatysty aıtylǵan syndarly sózine rızashylyq bildirip, pikirimdi aıtýdy uıǵardym. Men elimizdiń agroónerkásibin damtýǵa óz úlesin qosyp otyrǵan sharýa qojalyǵynyń ıesimin. Almaty oblysynyń Panfılov aýdanynda «Shúkeıt ata» sharýa qojalyǵyn ashyp, mal ósirýdi kásip etkenime on shaqty jyldan asty. Osy ýaqyt ishinde qıyndyqty eńserip, eńsemizdi tiktep úlgerdik. Memleket tarapynan mal tuqymyn asyldandyrý bastamasy kóterilgende qýana qoldadyq. Bul baǵytta Úkimet asyl tuqymdy mal basyn kóbeıtý úshin sharýalardy yntalandyryp, mal basyna sýbsıdııa beredi. Árıne, óte durys ári qajetti qoldaý. Alaıda osy jerde isti júzege asyratyn tetikterdiń durys jumys istemeýinen sharýalar zardap shegip otyr. О́z basymnan ótken jaǵdaı bolǵasyn muny jaqsy bilemin. Mal sharýashylyǵyn damytýǵa bólingen memleket qarjysy jergilikti ákimdik pen «QazAgro» holdıngi arasyndaǵy júıeli baılanys bolmaýynyń kesirinen maqsatty túrde jumsalmaı otyr. Sharýalardy sýbsıdııalaý da der kezinde júrgizilmeı, bizdiń ulttyq kompanııa men aýyl sharýashylyǵy basqarmasynyń arasynda sendelip júrgenimiz jasyryn emes. О́z basymdaǵy jaǵdaıǵa toqtalaıyn. 2015 jyly «Altyn asyq» baǵdarlamasy boıynsha 6 mln teńge nesıe aldym. Baǵdarlama sharty boıynsha tólenetin 14 paıyzdyń 10 paıyzyn memleket sýbsıdııalaýy kerek. Bul 6 mln teńgege Ońtústik Qazaqstan oblysynan 230 bas «Ordabasy» atty asyl tuqymdy qoı satyp aldym. 2016 jyly qazan aıynda alǵan nesıemniń syıaqysymen negizgi borysh bereshegi, ıaǵnı 1 mln 200 myń teńgeni bankke quıdym. Oblystyq aýyl sharýashylyǵy basqarmasy nesıeni baǵdarlama boıynsha sýbsıdııalaýy tıis bolatyn. О́kinishtisi, «QazAgro» kompanııasy mamandarynyń biliksizdigi men bıýrokratııanyń kesirinen ótemaqy ala almaı júrmin. Birneshe ret sottastym, jaqynda is meniń paıdama sheshilip, oblystyq aýyl sharýashylyǵy basqarmasy 2016 jyldyń qarjysyn tóleýdi mindetine aldy. Bul jerdegi kiná ulttyq kompanııanyń sharýalarǵa nesıe berý kezindegi erekshelikterdi eskermeýinen bolyp otyr. Iаǵnı «QazAgro» keńselerinde mal sharýashylyǵynyń jaǵdaıynan beıhabar mamandar otyr degen sóz. Al kompanııanyń qyzmeti memleket qarjysyn taratyp, ony ósimmen jınap alý emes qoı? Ári bul jerde sharýa qojalyǵy, jergilikti ákimdik jáne ulttyq kompanııa arasynda júıeli baılanys joq. Ortaq derekqor da jasalmaǵan. Sonyń kesirinen bir ǵana Almaty oblysynda qanshama sharýa zardap shegip júrgenin bilemin. Onyń ústine «QazAgro» kompanııasynyń nesıe berýi ekinshi deńgeıli bankterdiń jumysyn qaıtalaıdy. Men ózim otyzǵa jýyq anyqtama jınap, ótkizgenimdi bilemin.

Muny nege aıtyp otyrmyn? Joldaýda Qasym-Jomart Toqaev «Kvazımemlekettik sektorda ákimshilik-basqarý jumysymen aınalysatyn qyzmetkerlerdiń sanyn, paıdasyz shyǵyndardy jáne basy artyq enshiles kompanııalardy qysqartý jumystary jalǵasyn tabýǵa tıis...» dep aıtyp ótti. О́te oryndy paıym. Endi agroónerkásipti memlekettik qoldaý serpin alatynyna sengimiz keledi. Eńbegimiz aqtalsa, eldiń qazynasyna qosar úlesimiz de eselep artatyn bolady.

 

Muhtar AHANOV,

«Shúkeıit Ata» sharýa qojalyǵynyń basshysy

 

Almaty oblysy,

Panfılov aýdany

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar