Aımaqtar • 30 Qyrkúıek, 2020

Jańa mektepter jan súısindiredi

36 ret kórsetildi

Soltústik Qazaqstan oblysyndaǵy Qyzyljar aýdanynyń ortalyǵy Beskól selosy óńir ortalyǵynan 10 shaqyrym jerde ǵana ornalasqan, dep habarlaıdy Egemen.kz.

Bıik úıleri joq, esesine ınfraqurylymdary jaqsy, tabıǵatpen etene bolyp, jer úılerde otyrýǵa jáne oblys ortalyǵyndaǵy barlyq qyzmetterdi alýǵa, sonyń ishinde aýrýhanalarǵa qoljetimdi bolǵandyqtan qoly jetken kóp adam osynda kottedjder turǵyzǵan.  Alaıda, bir kezde ondaǵy qazaqtar 40-50 tútinnen aspaıtyn, sondyqtan qazaq mektebi kerek degen sóz aýyzǵa da alynǵan emes.

Qazir ondaǵy turǵyndar sapasy ózgergen. Kóptegen jaqyn aýyldardan halyq kóship kelgen. Oralmandar men ońtústikten qonys aýdarǵandar da az emes. Táýelsizdiktiń arqasynda osy halyqtyń bári balalaryn ana tilinde oqytýǵa qol jetkizip jatyr.

Kezinde bul aýyl bir ǵana Beskól aýdanynyń ortalyǵy edi, keıin oǵan qysqarǵan Sokolov aýdanynyń aýmaǵy da qosylyp, irilene túsken. Ásirese sońǵy jyldary bul aýyldyń halqy kóship kelýshilerdiń esebinen kúrt artyp ketti. Alaıdabalalaryn ana tilinde oqytqysy keletin kóptegen turǵyndardyń balalary kólik aǵylyp jatatyn «Petropavl-Nur-Sultan» trassasyn kesip ótýge májbúr bolyp keldi. О́ıtkeni, jańa qurylystyń kóbi osy aýdanǵa salynǵan. Bul oqýshylardyń qaýipsizdigine nuqsan keltirip, balalaryn mektepke jiberetin ata-analar únemi alańdaýshylyq bildirip júretin. Osydan eki jyl buryn turǵyndar oblys ákiminiń esepti kezdesýine kelgende de osy máseleni kóterip, Beskóldiń ońtústik-shyǵysyna memlekettik tilde oqytatyn mektep salyp berýdi ótingen edi.Oblys ákimi Qumar Aqsaqalov bul ótinishti oryndaýǵa ýáde bergen.

Bıyl 300 oryndyq sol mektep qurylysy aıaqtalyp, turǵyndardyń kózaıymyna aınalyp otyr. Sońǵy talaptardy eskerip, oqýshylarǵa barlyq jaǵdaıdy jasaıtyn jutynǵan jańa mektep kimniń bolsa da kózin qyzyqtyrady. Eń bastysy balalar endi qaýipti jolmen alysqa sabylmaı, úıleriniń janyndaǵy mektepke kire qoıady.

Keshe oblys ákimi Qumar Aqsaqalov ózi saldyrǵan osy mektepti aralap kórdi. Jaman indettiń kesirinen karantın bolyp, oqýshylar qashyqtan oqymasa bul kúnderi mekteptiń ashylý saltanaty dúrildep jatar edi. Jýrnalısterge arnaǵan óziniń sózinde oblys bysshysy bylaı dedi: "Aýyldyń ońtústik-shyǵys bóliginde 3,5 myń adam turady. Mektep bolmaǵan soń balalar aýdan ortalyǵyndaǵy 3 bilim ordasynda oqyp júrdi. Olar respýblıkalyq joldyń basqa jaǵynda ornalasqan. Bul jerde balalardyń qaýipsizdigi máselesi turdy. Bastaýysh synyptardyń balalary avtobýspen tasymaldandy. Endi máseleni oń sheship, jańa mektep esigin ashyp otyrmyz", dedi ol.

Bıyl Qyzyljar qalasynda da 600 oryndyq mektep ǵımaraty ashylǵan edi. Oǵan 1935 jyly qalanǵan eski ǵımaratta otyrǵan qaladaǵy Qojabergen jyraý atyndaǵy №6 qazaq orta mektebi kóshti. Memlekettik tilde oqytatyn mektepter sanynyń kóbeıgeni halyqtyń kóńil hoshyn arttyrýda.


Soltústik Qazaqstan oblysy

Sońǵy jańalyqtar

Namysyn tý etken

Rýhanııat • Keshe

Uqsas jańalyqtar