Sýretti túsirgen – Erlan OMAR, «EQ»
Alpysyna abyroı-bedelimen jetken Ǵabıt Iskenderulynyń esimi el basshylyǵy tarapynan erekshe elendi. Buǵan osy basqosýda jarııa bolǵan mártebesi bıik quttyqtaý hattary dálel bola alady. Aldymen akademık Baýyrjan Omarov Memleket basshysy Qasym-Jomart Toqaevtyń quttyqtaýyn oqyp berip, saltanatty túrde tabystady. Prezıdent hatynda mereıtoı ıesiniń otandyq medıa salasyn zaman talabyna saı damytýdaǵy orny aıryqsha atalyp ótken.
«Belgili jýrnalıst, bilikti basshy, ultjandy azamat retinde kóp jyl boıy respýblıkalyq basylymda jemisti jumys istep, otandyq medıa salasynyń zaman talabyna saı damýyna mol úles qosyp kelesiz. Búginde «Egemen Qazaqstan» gazetiniń bedelin arttyrý jolynda qajyrly eńbek etip júrsiz. Memlekettik saıasat, zań men ekonomıka, bilim jáne ǵylym taqyryptaryn arqaý etken salmaqty saraptamalaryńyz ben maǵynaly maqalalaryńyzdy qalyń oqyrman qaýymy zor qyzyǵýshylyqpen oqıdy. Aldaǵy ýaqytta da elimizdiń rýhanı-mádenı damýyna atsalysyp, el-jurttyń qurmetine bólene berýińizge tilektestigimdi bildiremin» delingen Memleket basshysynyń quttyqtaýynda.
Buǵan qosa Baýyrjan Omarov Memlekettik keńesshi Erlan Qarınniń de quttyqtaýyn jetkizdi. Ol óz sózinde Ǵabıt Iskenderulyna júırik jýrnalıst, parasatty pýblısıst retinde erekshe yqylas bildirdi.
«Qazirgi qazaq jýrnalıstıkasynyń beldi de bedeldi ókili ekenińizdi jurtshylyq jaqsy biledi. Kósemsózde kesek týyndylarmen kózge túsip, ult rýhanııatyna úlken úles qosyp kelesiz. Qalamyńyzdan týǵan «Rýhyńdy túsirme, ulym», «Tarıhty tulǵalar jasaıdy», «Toǵyzynshy terrıtorııa» sekildi kitaptar memlekettilik, ultjandylyq máselelerin arqaý etýimen qundy. Jýrnalıstıkadaǵy qaıtalanbas dara jolyńyz keıingi býynǵa úlgi-ónege dep bilemin. Aldaǵy ýaqytta da oqyrman qaýymdy júrdek qalamyńyzdan, sergek sanańyzdan týǵan kemel dúnıelermen qýanta berińiz. Denińizge saýlyq, otbasyńyzǵa amandyq tileımin!» delingen Memlekettik keńesshi hatynda.
Osy oraıda seriktestik basshysy, akademık Dıhan Qamzabekuly redaksııaǵa kelip túsken birqatar quttyqtaý hatyn oqyp berdi. Sonyń biri – Senat tóraǵasy Máýlen Áshimbaevtyń tilegi.
«Siz sanaly ǵumyryńyzdy ulttyq jýrnalıstıkany damytýǵa arnap, bul jolda eseli eńbek etip kelesiz. Osy baǵyttaǵy tabandylyǵyńyz qashanda joǵary baǵaǵa laıyq. Qalamgerlerdiń ómiri men ónegesin jańa qyrynan tanıtyn portrettik ocherkterińiz de ulttyq tulǵataný ınstıtýtyn ilgeriletýge qosylǵan qundy úles ekeni sózsiz. Siz shákirt tárbıeleýdiń de ozyq úlgisin kórsettińiz. Búginde tálimińizdi alǵan izbasarlaryńyz elimizdegi beldi basylymdarda jaýapty qyzmetter atqaryp júr. Búginde qazaq baspasóziniń qara shańyraǵy – «Egemen Qazaqstan» gazetiniń bas redaktory retinde parasat bıiginen kórinip kelesiz. Árdaıym osylaı mártebeńiz joǵary, abyroıyńyz asqaq bolsyn. Oıǵa alǵan arman-murattaryńyz oryndala bersin!» dep Senat spıkeri izgi nıetin bildirgen.
Sondaı-aq Prezıdent Ákimshiliginiń Basshysy Roman Sklıar da Ǵabıt Iskenderulynyń ult jýrnalıstıkasyn órkendetý jolyndaǵy qajyrly eńbegin atap kórsetip, ózi abyroımen basqaryp otyrǵan bas basylymnyń el rýhanııaty men qoǵamdyq oı-pikirdi damytýdaǵy orny zor ekenine toqtalǵan. Buǵan qosa mereıtoı ıesiniń uıymdastyrýshylyq qabileti men azamattyq ustanymy zamandastarynyń, oqyrman qaýymnyń izetine ıe ekeni aıtylǵan.
Budan soń Dıhan Qamzabekuly Premer-mınıstrdiń orynbasary – Mádenıet jáne aqparat mınıstri Aıda Balaevanyń quttyqtaýyn jarııa etti.
«О́zińizdi otandyq jýrnalıstıkanyń damýyna súbeli úles qosyp kele jatqan qarymdy qalamger, ult rýhanııatyna adal qyzmet etip júrgen qaıratker azamat retinde bilemiz. Ǵumyr jolyńyzdy qazaq baspasóziniń órkendeýine arnap, jýrnalıstıkanyń bıik talaptaryna saı eńbek etip kelesiz. Uzaq jyldar respýblıkalyq basylymdarda jemisti qyzmet atqaryp, kásibı sheberligińizben, ult múddesine degen janashyrlyǵyńyzben kópshilik qurmetine bólendińiz. Qalamyńyzdan týǵan tushymdy dúnıeler oqyrmannyń rýhanı dúnıesin baıytyp, qoǵamdaǵy ózekti máselelerdi kóterýdegi azamattyq ustanymyńyzdy aıqyn tanytyp keledi. Aldaǵy ýaqytta da eńbegińizdiń jemisin kórip, abyroıyńyz arta bersin» dep Aıda Balaeva tilektestik tanytypty.
Lebizder leginen Syrtqy ister mınıstri Ermek Kósherbaev ta tys qalmapty. Onyń quttyqtaýyn basqosýǵa qatysqan qurmetti qonaq Qýat Borash jetkizdi. Mınıstr hatynda Ǵabıt Iskenderulyn mass-medıa salasynyń bilikti menedjeri retinde baǵalaıtynyn, ult baspasózin órkendetýge sińirgen eńbegi eseli ekenin aıta kele, izgi muratyna jetip, abyroı bıiginen kórine berýine tilektes ekenin bildiripti.
Sonymen qatar alqaly jıynda bas redaktorǵa Memlekettik qyzmet isteri agenttiginiń tóraǵasy Darhan Jazyqbaı, Mádenıet jáne aqparat vıse-mınıstri Qanat Ysqaqov jáne Ál-Farabı atyndaǵy QazUÝ basqarma tóraǵasy-rektor Janseıit Túımebaevtyń quttyqtaý hattary tabystaldy.
Basqosý barysynda sóz alǵan zamandas áriptesteri men izbasar shákirtteri Ǵabıt Iskenderulynyń qalamgerlik sheberligimen qatar, ǵıbratty ustazdyq jolyna keńinen toqtaldy. Jınalǵan qaýym mereıtoı ıesiniń adamı bolmysyndaǵy zııalylyqty, onyń úlkenge de, kishige de birdeı tanytatyn qamqorlyǵy men shynaıy kisiligin erekshe ataı kele, bul qasıetterdiń búgingi jas býyn úshin taptyrmas úlgi ekenin jetkizdi.
