Álem kýboginiń jeńimpazdaryn marapattady

Sportshylardy dúbirli dodanyń aıaqtalýymen quttyqtaǵan Máýlen Áshimbaev Memleket basshysy Qasym-Jomart Toqaevtyń ınklıýzıvti qoǵam qalyptastyrýǵa arnalǵan bastamasynyń arqasynda elimizde parasport qarqyn­dy damyp kele jatqanyn atap ótti. Son­daı-aq ol bochchadan álem kýboginiń Qazaqstanda ótýi osy baǵyttaǵy júıeli jumystyń naqty nátıjesi ekenin aıtty.

«Keıingi jyldary Prezıdent Qasym-Jomart Toqaevtyń bastamasymen Qazaqstanda ınklıýzıvti qoǵam qalyptastyrý jolynda mańyzdy jobalar júzege asyrylyp keledi. Sonyń nátıjesinde elimizde parasport qarqyndy damyp, qazaqstandyq paraatletter halyqaralyq arenada joǵary nátıjelerge qol jetkizýde. Sonymen qatar Qazaqstanda bochchadan álem kýbogi sııaqty halyqaralyq deńgeıdegi jarys­tar da uıymdastyrylyp jatyr. Osy saıysta barlyq sportshy chempıonǵa tán joǵary sheberlik pen kásibıliktiń bıiginen kórine bildi», dedi Máýlen Áshimbaev.

Sonymen qatar Qazaqstan bochcha federasııasynyń prezıdenti álem kýboginiń basty jetistigi júlde ǵana emes, jańa dostar tabý jáne ınklıýzııa mádenıeti men sporttyń adamdardy biriktiretin qasıetin dáripteý ekenin atap ótti. Ol Federasııa atynan týrnırdiń joǵary deńgeıde ótýine úles qosqan uıymdastyrýshylarǵa, eriktilerge, tóreshilerge jáne World Boccia komandasyna alǵys bildirdi.

«Bochchadan álem kýboginiń ne­giz­gi qun­dylyǵy júldeler men nátıjeler­den áldeqaıda aýqymdy. Bul ja­rys dostyqtyń, ózara qurmettiń jáne sport­tyń ártúrli elder men máde­nıet­ter ókilderin biriktiretin kúshiniń jar­qyn sımvolyna aınaldy. Týrnır boch­chanyń jaı ǵana sport emes ekenin taǵy bir márte dáleldedi. Bul – asqaq rýh­tyń, teń múmkindikterdiń jáne jeńis jo­lyndaǵy erik-jigerdiń ozyq úlgisi. Koman­dalar, sportshylar men jattyq­tyrýshylar arasynda ornaǵan dostyq uzaq jyldarǵa jalǵasyp, jarysqa qatysýshylardyń júreginde Qazaqstan týraly eń jyly estelikter saqtalady dep senemin», dedi Máýlen Áshimbaev.

Jarys qorytyndysy boıynsha komandalyq saıysta VS1 sanatynda Indonezııa quramasy jeńimpaz atandy. Ekinshi jáne úshinshi oryndardy tıisinshe Portýgalııa men Koreıa quramalary ózara bólisti. VS3 sanatynda Fransııa quramasy altyn medal jeńip aldy. Kúmis júldege Italııa sportshylary ıe bolsa, Sıngapýr quramasy úzdik úshtikti túıindedi. Al VS4 sanatynda Ulybrıtanııa quramasy bochchadan álem kýboginiń jeńimpazy atandy. Ekinshi oryndy Qytaı Halyq Respýblıkasynyń Gonkong arnaıy ákimshilik aýdany ıelense, úshinshi oryn Qytaı Halyq Respýblıkasynyń quramasyna buıyrdy.

Aıta keteıik, Astana 2026 World Boccia Cup saıysy 1 maýsymda bas­taldy. Bul halyqaralyq týrnır resmı reıtıngtik jarystar júıesiniń qatarynda jáne aldaǵy Paralımpıada oıyndaryna joldama beretin mańyzdy irikteý kezeńderiniń biri sanalady. Dúbirli dodaǵa Brazılııa, Kanada, Qytaı, Ulybrıtanııa, Ońtústik Koreıa, Fransııa jáne Portýgalııa bastaǵan kóptegen eldiń sportshylary qatysty. Búginde bochchadan Qazaqstan ulttyq quramasynyń sapynda 50-ge jýyq parasportshy bar ekenin de atap ótken jón.