Azyq-túlik beldeýi qalaı júzege asýda?

Siz ne deısiz?

Memleket basshysynyń tap­syrmasymen Aqmola ob­ly­synyń  taýar óndirýshileri 2008 jyldan bastap Astana qalasynyń azyq-túlik bel­deý­in qamtamasyz etý baǵdar­la­masyn júzege asyrýda. Onyń maqsaty, atqarylǵan ister men júzege asyrylar mindetter kólemi aýqymdala túsýde. Bul mańyzdy joba ólke ty­nysyn keńitýde, ekono­mı­ka­lyq órleýdiń jańa qadam­da­ryn qalyptas­ty­rý­da qandaı oryn almaq, jalpy atqa­ryl­ǵan jumystarǵa kóńil tola ma? «Egemen Qazaqstannyń» menshikti tilshisi Baqbergen AMALBEK oblystyq aýyl sharýashylyǵy basqarmasynyń bastyǵy Serik JAMBETALINGE: – Siz buǵan ne deısiz? – Kóńildegi kóp oıdy qa­nat­tandyrý kerek. Oǵan negiz de, múmkindik te bar. Baǵdarlama qolǵa alynǵaly beri jalpy qu­ny 23 mıllıard teńgeniń 41 jo­basy júzege asyryldy. Nátı­je­sinde, mal sharýa­shylyǵy ónim­deriniń barlyq túri boıynsha eleýli ósim qamtamasyz etildi. Má­selen, Astana turǵyn­da­ry­nyń sút ónimderi men etke su­rany­sy sáıkesinshe 92 jáne 40 paı­yzǵa ótelip otyr. Mundaǵy kórset­kish, 2008 jylmen sa­lys­tyrǵanda 37  jáne 14 paıyzǵa arta tústi. Al, jumyrtqa, kartop, un óndirisinde ishki jáne Astana suranysynan tysqary, ekporttyq áleýetimiz de qýat­tanyp otyr. Baǵdarlama qolǵa alynǵan jyldar ishinde Astana saýda núktelerine 440,6 myń tonna sút, 120 myń tonna et ónim­deri men 633 mıllıon dana jumyrtqa jetkizildi. Osy oraı­da, Baǵdarlama sheńberin­de, óńirimiz úshin dástúrli emes ósim­dik maıyn ónerkásiptik negizde shy­ǵara bastaǵanymyzdy, onyń sapasy shetten tasymal­danatyn ónimderden qalyspaı­tyn­dyǵyn aıtqym keledi. Ob­lys bul baǵytta 23,3 mıllıard teńgeniń 19 jobasyn iske qo­satyn bolady. Taldamalar kórsetkenindeı, jyl saıyn Astana dastarqany­na 252,2 myń tonna sút, 40,2 myń tonna et ónimderi men 101,1 mıllıon dana jumyrtqa jet­kizýimiz qajet. Jospar­lan­ǵan nysandardyń qa­tarǵa qo­sy­lýy jáne qoldanystaǵy óndiris oryndarynyń jobalyq qýaty­na enýi 2014 jylǵa qaraı mindetti tapsyrmalardyń asyra oryndala­tyn­dyǵyna senimimizdi bekite tústi. Buǵan qosymsha, oblysta et baǵytyndaǵy mal sharýashyly­ǵyn damytýdyń 2011-2015 jyl­dar­ǵa ar­nal­ǵan óńirlik baǵdar­la­masy jumys isteýde. Onyń aıasynda 6 jańa bor­daqylaý ala­ńy men 6 asyl tuqymdy kásip­oryn qurý josparlanǵan. Iаǵnı, oblys 2015 jyly Astana beldeýimen qatar, iri qara etin syrtqa shyǵara alady degen sóz. О́nimderimiz taýar óndirýshi­ler­diń Astana qalasyndaǵy jeke  saýda núktelerinde, sondaı-aq 22 fırma­lyq dúkender men dúńgirshikterde, «Shapaǵat» kom­mýnaldyq bazarynda saty­lady. Turaqty tutynýshylar­y­myz Aq­mola ónimderiniń sapasyna joǵary baǵa berýde. Bas qalamyzdyń azyq-túlik beldeýin turaqty ári jyl boıy úzdiksiz qamtamasyz etý maqsatynda jalpy syıymdylyǵy 15,3 myń tonnaǵa teń 23 qoıma jumysqa qosylǵan. Baǵdarlama sheńberinde taǵy da bir jylyjaı salynatyn bolady. Kórip otyrǵanyńyzdaı, bul baǵdarlama oblys tirshiligin agroónerkásiptik ba­ǵytta damytýǵa, myńdaǵan adam­dardy jańa jumys oryndarymen qamtamasyz etýge múmkindik berdi. Aqmola oblysy.