«Azamattarǵa arnalǵan úkimet» memlekettik korporasııasynyń qyzmetindegi basym baǵyttardyń biri – «Sıfrlyq Qazaqstan» memlekettik baǵdarlamasy aıasynda halyq arasynda elektrondyq portal arqyly kórsetiletin memlekettik qyzmetterdi ózdigimen paıdalana bilýge úıretý jáne keńinen nasıhattaý.
Baǵdarlamany júzege asyrý baǵytynda «Elektrondyq úkimet jáne elektrondyq qyzmetter» kýrsy boıynsha oqý baǵdarlamasy ázirlengen bolatyn. Jalpy osy joba aıasynda «Azamattarǵa arnalǵan úkimet» 8 mln adamnyń sıfrlyq saýattylyǵyn arttyrmaq. Bul týraly OKQ-da ótken memkorporasııanyń 2 jyldyq qyzmetin qorytyndylaýǵa arnalǵan jıynda memlekettik korporasııanyń basqarma tóraǵasy Abylaıhan Ospanov habarlady.
A.Ospanov atap ótkendeı, ústimizdegi jyldyń maýsym-tamyz aılarynda «UAT» AQ, «Qazposhta», «Zerde» jáne jergilikti atqarýshy organdardarmen birlese otyryp shamamen jarty mıllıon adamnyń sıfrlyq saýattylyǵyn arttyrý josparlanýda. Osy maqsatta Qazaqstan boıynsha 880 jattyqtyrýshyny arnaıy daıyndyqtan ótkizip, sertıfıkattar tabystaldy. Atalmysh oqytý kýrstary qala, aýdan, aýyl halqyna birdeı qoljetimdi bolady.
Qazirgi tańda memlekettik korporasııanyń árbir front-ofısi ózine-ózi qyzmet kórsetý «Connection Point» sektorymen jabdyqtalǵan, ol jerde «elektrondyq úkimet» portaly jáne basqa da memlekettik resýrstarǵa shyǵý múmkindigimen qamtamasyz etilgen 2 628 jumys oryndary uıymdastyryldy. О́zine-ózi qyzmet kórsetý sektorynda azamattar óz betinshe ESQ alýǵa ótinim berýge, sondaı-aq 700-den astam elektrondyq qyzmet pen servıster alýǵa múmkindigi bar. Jyl basynan beri «Connection Point» arqyly 4,5 mln.-nan asa keńes berilip, 4 mln. qazaqstandyq ózdigimen qyzmet alǵan.
«Sonymen qatar bıyl elimizdiń barlyq oblys ortalyqtarynda Sıfrlyq halyqqa qyzmet kórsetý ortalyqtaryn iske qosýdy josparlap otyrmyz. Qazir joba pılotty negizde Astana, Almaty, Shymkent qalalarynda tıimdi jumys jasaýda. Mundaı ortalyqtardyń ereksheligi – belgilengen kestege sáıkes sıfrlyq saýattylyq daǵdylaryn arttyrý boıynsha taqyryptyq dárister ótkizetin synyptarynyń bolýy. 2018 jyldyń 4 aıynda atalmysh synyptarda 3,6 myń adam bilimin jetildirdi», - dedi A.Ospanov.
Sonymen qatar adam kóp shoǵyrlanatyn oryndarda (saýda oryndarynda, vokzaldarda, áýejaılarda, sottarda jáne t.b.) múddeli memlekettik organdarmen birge turaqty negizde «Sıfrlyq Qazaqstan» memlekettik baǵdarlamasy boıynsha keń aýqymdy aksııalar men aqparattyq-túsindirý jumystary júrgiziledi.
Aıta keteıik, jyl basynan beri memlekettik jáne jeke oqý oryndarynda 10 myńnan asa stýdent sıfrlyq qyzmettter alý boıynsha daǵdylaryn mashyqtandyrdy.