Tamyljyǵan tabıǵatymen álemge áıgili Shýchınsk-Býrabaı kýrorttyq aımaǵy alys-jaqyn shetelderden keletin talǵampaz týrısterdi qushaq jaıa qarsy alýǵa qapysyz qamdanýda.
Taıaýda oblys ákimi Marat Ahmetjanov taza aýada tynyǵyp, jumaq jerdiń ǵajaıyp kórkimen tereńirek tanysyp, saf aýasyn jutyp, quratqa mingendeı aýnap-qýnap qaıtqysy keletin jalpaq jurtqa qyzmet kórsetý barysymen tanysty. Aldymen, bıshi qaıyńdar saıabaǵynda boldy. Býrabaı baýraıyndaǵy shyn sheber, zergerdiń epsekti qolynan shyqqandaı ǵajaıyp bir qubylys týǵan jerdiń tósinde samal jel lúp ete qalsa, tóńirek bıshi qaıyńdardyń myń buralǵan bıimen árlenip, jalaýly jasyl dúnıe túgel bılep, kóńilińdi kókke kóterer edi. Dál osy jerde taban tiregen adam Býrabaıdyń sulýlar taqqan syrǵadaı kózdiń jaýyn alatyn bar qıyryn kóre alar edi. Keıingi jyldary týrıstik qyzmet kórsetý aıryqsha qarqyn alýda. Kýrortty óńirdiń ınfraqurylymy kóp-kórim jaqsaryp keledi.
Keleshektiń kemel bolýyn kóksegen kórikti oıdan týyndaıtyn týrızm salasyndaǵy bolashaǵy zor ınvestısııalyq jobalar tanystyryldy. Álemdik brendterdiń sanatyndaǵy birneshe qonaqúı keshenderi, Saq mádenıeti murajaıynyń jobasy jáne Aqylbaı aýylyndaǵy forel sharýashylyǵyn keńeıtý josparlary bar. Osy umtylys sátimen sabaqtalyp ketse, tabıǵı saltanatqa janashyr jandardyń izgi nıetimen, qurysh qoldarymen boı kótergen zamanaýı ǵımarattar da sán ústep, ajaryn asha túskendeı.
Býrabaı kenti mańynda myń oryndyq atshapyrym zalymen árqıly kórermender ótkizýge laıyqtalǵan orny bar kongress ortalyqtyń qurylysy óńirdiń óńin keltire túseri daýsyz.
«Memleket basshysy Qasym-Jomart Toqaevtyń tapsyrmasymen Shýchınsk-Býrabaı kýrorttyq aımaǵynyń týrıstik áleýetin júıeli túrde damytyp kelemiz. Mindetimiz týrıster sanyn kóbeıtip qana qoımaı, jyl boıy sapaly jáne jaıly demalysqa meılinshe jaǵdaı jasaý. О́ńir úshin ekotýrızm, tarıhı taǵylymy bar týrızm jáne otbasylyq týrızm basty baǵytqa aınalýda. Jyl boıy jumys isteý ınvestısııalyq tartymdylyqty arttyrady», deıdi oblys basshysy.
Sóz arasynda 2025 jyly Býrabaı baýraıynda 1,7 mıllıon adam dem alsa, onyń 24,7 myńy sheteldik týrıster eken. Bıyl da az bolmasy belgili. Sebep, kórkem tabıǵattyń aıasynda olarǵa usynatyn zamanaýı keshender sany jyl sanap kóbeıip keledi. Sonyń biri – Shýchınsk qalasynda salynǵan «Umaı ana» ekoparki. Bul nysan óńirdegi mańyzdy demalys oryndarynyń birine aınalmaq.
«Ekopark Memleket basshysynyń tapsyrmasy boıynsha ashylyp otyr. Osyndaı jobalardy júzege asyrý qolaıly qalalyq ortany qalyptastyrýǵa, ekologııalyq mádenıetti damytýǵa jáne turǵyndardyń demalýyna yqpal etedi», dedi oblys ákimi Marat Ahmetjanov.
Jańa ekopark tóńiregi abattandyrylǵan serýendeý alleıalary, demalys aımaqtary sport jáne balalar alańdary ornalasqan. Saıabaqtyń ataýyna engizýge bolǵan basty nysan sábıin emirenip, qushaǵyna alǵan ananyń ajarly músindik kompozısııasy ornalasqan.
Jańalyqqa halyq dán razy. Býrabaı aýdandyq ardagerler keńesiniń tóraǵasy О́telbaı Beısenovtiń pikirinshe, «Umaı ana» saıabaǵy tek jastardyń ǵana emes, barsha adamdardyń súıikti demalys ornyna aınalmaq.
Bul kúni taǵy da aq túıeniń qarny jarylǵan ádemi oqıǵa boldy. Áleýmettik osal toptar sanatyndaǵy kezekte turǵan azamattarǵa páter kilti tabystalyp, sport salasynda joǵary jetistikterge jetken sportshylar marapattaldy. Is-shara sońy mándi de maǵynaly konserttik baǵdarlamaǵa ulasty.
Aqmola oblysy