Sabaǵyn úzdik oqýymen birge ǵylymǵa bet burǵan oqýshylar az emes. Sondaı talapty oqýshynyń qatarynda atyraýlyq Inabat Shabahova da bar.
Ol bıyl Atyraý qalasyndaǵy Nazarbaev zııatkerlik mektebiniń 12-synybyn bitirgeli otyr. Byltyrdan beri tabıǵatqa zııansyz bıoplastıkti zertteýdi qolǵa aldy. О́nertapqysh oqýshynyń pikirinshe, jańa ónim qorshaǵan ortaǵa qaýip tóndirmeıtin tabıǵı qospalardan daıyndalady.
«Bul bıoplastıktiń qoldanystaǵy túrinen aıyrmashylyǵy kóp. Birinshiden, sýǵa tózimdiligimen erekshelenedi. Ekinshiden, topyraqta bir aıdyń ishinde 80 paıyzǵa deıin ydyraıdy. Jetekshimmen birge jobany synaqtan ótkizý úshin birneshe tájirıbelik úlgi ázirledik. Aldaǵy ýaqytta zertteýimdi odan ári jalǵastyryp, paket jasaýǵa nıettenip júrmin. Ásirese tamaq jetkizý qyzmeti men dúkenderge arnalǵan qaptama retinde qoldanýǵa bolady», deıdi Inabat.
Atalǵan oqý ornynyń bıologııa pániniń muǵalimi Lazıfa Qaırathannyń aıtýynsha, qazir qoldanylyp júrgen plastıkten órtengen kezde ýly zattar bólinedi. Topyraqtaǵy plastık júzdegen jyl boıy joıylmaýy múmkin. Plastıktiń zardaby adam densaýlyǵyna keri áser etip, túrli aýrýlardyń týyndaýyna sebep bolatyny dáleldengen.
«Bizdiń mektebimizde oqýshylar jetekshi ustazymen birge óz jobalaryn júzege asyrady. Máselen, plastıkalyq ydystar men paketter jınalyp, ekinshi ret óńdeýge jiberiledi. Ekinshi ret óńdeý kezinde kúıdiredi, jaǵady. Bul kezde hımııalyq qospalar bólinedi. Sondyqtan biz tabıǵı jolyn izdeýge tyrystyq», deıdi Inabattyń ustazy.
Atyraý oblysy