Elorda óńirlerge úlgi bolýǵa tıis

Astana qalasynyń ákimi Jeńis Qasymbek qala ekonomıkalyq damýdyń joǵary qarqynyn saqtap, elimizdiń jetekshi iskerlik ortalyqtarynyń biri retindegi rólin nyǵaıtyp otyrǵanyn baıandady. Byltyr jalpy óńirlik ónim kólemi 18,9 trln teńgege jetti. Elorda negizgi kapıtalǵa tartylǵan ınvestısııa kólemi jaǵynan respýblıkada birinshi orynda tur. Bıylǵy tórt aıda 587 mlrd teńge ınvestısııa tartyldy, onyń shamamen 80%-yn jeke ınvestısııalar qurady. Qazir Astanada 246 myń shaǵyn jáne orta bıznes sýbektisi jumys isteıdi. Bul sektorda shamamen 560 myń adam jumyspen qamtylǵan. ShOB-tyń qala ekonomıkasyna qosqan úlesi rekordtyq deńgeıge – 66%-ǵa jetti. Bıyl 26 ónerkásiptik jobany iske qosý josparlanǵan. Qazirdiń ózinde quny 32 mlrd teńge bolatyn 8 joba paıdalanýǵa berilip, 500-ge jýyq jumys orny ashyldy. Sondaı-aq jyl sońyna deıin quny 36 mlrd teńge bolatyn 18 jobany iske qosyp, myńǵa jýyq jumys ornyn ashý kózdelip otyr.

Premer-mınıstrge «Technodom» kóterme-bólshek saýda kásiporny» AQ zamanaýı logıstıkalyq ortalyǵynda keshenniń jumysy men elordanyń kólik jáne qoıma ınfraqurylymyn odan ári damytý jobasy tanystyryldy.

Aýdany 22 myń sharshy metrden asatyn logıstıkalyq ortalyq 11 myń pallettik orynǵa eseptelgen. Munda jalpy aýmaǵy 3,5 myń sharshy metrdi quraıtyn temperatýralyq rejimi bar úı-jaılar qarastyrylǵan. Kásiporyn táýlik boıy jumys isteıdi ári taýarlardy qabyldaý men saqtaýdan bastap, olardy jınaqtaý men jóneltýge deıingi qyzmetterdiń tolyq sıklin qamtamasyz etedi. Ortalyq qoıma­ny basqarýdyń avtomattandyrylǵan júıeleri­men jáne tıimdilikti baqylaý quraldary­men jabdyqtalǵan. Búginde logıstıkalyq keshen jumys aýqymymen 100% qamtylǵan. Ortalyqtyń qyzmetin «Wildberries», «Ascona», «Gold Service Logistic» jáne basqa da kompanııalar paıdalanady. Nysanda 200-den astam jumys orny ashylǵan.

Sonymen qatar Premer-mınıstrge jeke ınvestısııa kólemi 300 mlnnan asatyn 223,1 gektar logıstıkalyq park jobasy tanystyryldy. Áleýetti qatysýshylar arasynda «YXE Trading Service Group», «S Sistem Lojistik Hizmetler», «Qazposhta» jáne «Rhino Logistic» kompanııalary bar.

Budan bólek Oljas Bektenov «Wildberries Kazakhstan» kompanııasynyń iri logıstıkalyq hab qurylysynyń barysymen tanysty. Jalpy aýmaǵy 160 myń sharshy metrdi quraıtyn joba aıasynda 6 myń jumys ornyn ashý kózdelgen. Nysandy paıdalanýǵa berý 2027 jyldyń I toqsanyna josparlanǵan. Jobanyń ınvestısııa kólemi – 47,7 mlrd teńge.

Úkimet basshysy logıstıkalyq ınfra­qury­lymdy damytý ekonomıkanyń báseke­ge qabilettiligin arttyrýdyń jáne elimiz­diń tranzıttik áleýetin odan ári nyǵaıtý­dyń mańyzdy sharty ekenin atap ótti. Prezı­dent jarııalaǵan Sıfrlandyrý jáne jasan­dy ıntellekt jylyn eskere otyryp, sıfr­lyq sheshimderdi engizý men úderisterdi avto­mattandyrýǵa erekshe nazar aýdarý kerek.

«Heart Center Foundation» QQ zaýytynda Oljas Bektenov medısınalyq maqsattaǵy plastıkalyq buıymdar óndirisiniń iske qosylýymen jáne kásiporynnyń tehnologııalyq jabdyqtalýymen tanys­ty. Jobanyń sońǵy kezeńi júzege asyrylyp jatyr. Zaýyt bıyl mamyr aıynda paıdalanýǵa berilgen. Tamyzda barlyq jelide ónim shyǵarý bastalady, al bıylǵy qyrkúıek aıynda tolyq qýatyna shyqpaq.

Joba «Qazaqmys korporasııasy» JShS-nyń qoldaýymen №1 ındýstrııalyq park aýmaǵynda júzege asyrylyp jatyr. Investısııalardyń jalpy kólemi – shamamen 5,1 mlrd teńge. Kásiporynnyń negizgi ónimi – ALEM ataýymen qysqartylǵan «Astana life Ex-situ Machine» jobasy. Bul – otandyq ınjenerler men dárigerlerdiń donorlyq aǵzalardy saqtaý, qalpyna keltirý men tasymaldaý úshin jasap shyǵar­ǵan biregeı ázirlemesi. Tehnologııa donor­lyq aǵzanyń saqtalý merzimin birneshe saǵat­tan bir táýlikke deıin jáne odan da kóp uzar­týǵa múmkindik beredi. Bul otandyq trans­p­lantologııaǵa jańa múmkindikter ashady. О́ndiriste otandyq shıkizatty – Atyraý qalasyndaǵy KPI zaýytynyń plastı­kalyq túıirshikterin paıdalaný jospar­lanyp otyr. Bul medısınalyq buıym­dar óndirisin lokalızasııalaý deńgeıin art­tyrýǵa múmkindik beredi. Zaýyt­tyń joba­lyq qýaty 15-20 birlik ALEM jabdy­ǵyn shyǵa­rýǵa jetedi. Ol degenimiz – jylyna bıo­ma­te­rıaldy irikteýge arnalǵan shamamen 6 mln konteıner men 45 myń drenajdyq qurylǵy.

UMC qorynyń basqarma tóraǵasy Iýrıı Pıa jańa óndiris ımporttyq medısınalyq shyǵyndaýǵa arnalǵan materıaldarǵa táýeldilikti azaıtatynyn aıtty. Onyń sózinshe, kardıologııa men kardıohırýrgııaǵa qajetti quraldardyń basym bóligi shetelden satyp alynady. Osyǵan baılanysty elde medısınalyq buıymdar óndirisin jolǵa qoıý týraly sheshim qabyldanǵan. Qazir donorlyq organdardy saqtaýǵa arnalǵan apparattyń prototıpi ázirlenip, jyl sońyna deıin za­ýytta alǵashqy úlgisin shyǵarý kózdelip otyr.

Oljas Bektenov ǵylymı ázirlemeler negizinde otandyq medısına ónerkásibin damytý men olardy densaýlyq saqtaý salasyna is júzinde engizýdiń mańyzdylyǵyn atap ótti. Qazir elimiz ómir súrý uzaqtyǵy turǵysynan 76 jyldyq kórsetkishke jaqyndady. Zamanaýı medısınalyq kómekke qol jetimdilikti keńeıte otyryp, osy qarqyndy jalǵastyrý mańyzdy.

«RnR Group» JShS-nyń nan-toqash jáne sút ónimderin shyǵarý zaýyttarynda Premer-mınıstr kásiporyndardyń óndiristik qýattary men jumysty uıymdastyrý jaǵdaıyn qarap shyqty.

Úkimet basshysyna qaıta óńdeýdi damytýǵa, otandyq azyq-túlik ónimderin shyǵarýdy keńeıtýge, elordanyń azyq-túlik qaýipsizdigin nyǵaıtýǵa jalpy quny 8,8 mlrd teńge bolatyn jobalar baǵyttalǵany baıandaldy. О́ndiristerdiń qýattylyǵy – táýligine 25 tonnaǵa deıin un ónimderi jáne 100 tonnaǵa deıin sút ónimderi. Kásiporyndar jergilikti shıkizat bazasyn paıdalanady. О́nimder elordanyń saýda núktelerine, áleýmettik nysandary men jelilerine jetkiziledi.

2025–2026 jyldary Astanada syıymdylyǵy 12 myń tonna bolatyn eki kókónis qoımasy men jylyna 53 myń tonna ónim óńdeýge qaýqarly úsh qaıta óńdeý zaýyty iske qosyldy. 18 myń tonna kókónis jetkizý kelisimsharttary jasaldy. Aldaǵy eki jylda agroónerkásiptik keshen salasynda jalpy quny 180 mlrd teńgeni quraıtyn 7 ınvestısııalyq jobany iske qosý josparlanyp otyr. Nátıjesinde, 1,6 myń jańa jumys orny ashylady.

Premer-mınıstr Oljas Bektenov «Astana ETKOM» JShS  et óńdeý zaýytynyń alańynda bolyp, óndiristiń tehnologııalyq úderisimen jáne shyǵarylatyn ónim túrlerimen tanysty.

Zaýyt bıylǵy jyldyń ekinshi toqsanyn­da paıdalanýǵa beriletinin málimdedi. Jobalyq qýaty táýligine 50 tonnaǵa deıin daıyn ónimdi, ıaǵnı jylyna 18 myń tonnadan astam ónim shyǵarýǵa jol ashady. Shıkizatty otandyq óndirýshilerden, sonyń ishinde «Aıtas» AQ, «KazBeef» JShS jáne óńirlerdegi sharýa qojalyqtarynan satyp alý josparlanǵan. Alǵashqy kezeńde kásiporynda 100-ge deıin jumys orny ashylsa, tolyq qýatqa shyqqanda 300-ge deıin jetedi. Kadr daıarlaý maqsatynda kásiporyn kolledjder men basqa da oqý oryndarynyń stýdentterin oqytýdy uıymdastyrdy. Olarǵa keıinnen jumysqa ornalasý múmkindigi qarastyrylǵan.

Oljas Bektenov tereń óńdeý agroóner­kásip­tik keshendi damytýdyń negizgi baǵyt­tarynyń biri bolyp qala beretinin atap ótti. Prezıdenttiń tapsyrmasyna sáıkes Úkimet agrarlyq sektordy qoldaýdy kúsheıtip, onyń ishinde bıologııalyq qaýipsizdiktiń negizi sanalatyn veterınarııa salasyn damy­týǵa, ınfraqurylymdy jetildirýge, baqy­laý júıesin jańǵyrtýǵa basymdyq berip otyr. Elimizdiń aýsyldan taza el márte­besin alýy mal sharýashylyǵyn damy­týǵa ári eksporttyq múmkindikterdi keńeı­týge qosymsha jol ashady. Turaqty shıki­zat bazasy men keıingi jyldardaǵy joǵary ónimdilik qaıta óńdeý kólemin arttyrý­ǵa, daıyn ónim shyǵarýdy kóbeıtýge, otan­dyq ta­ýar­lardy ishki ári syrtqy naryqtar­ǵa ilgeri­letýge qolaıly jaǵdaı qalyptastyrady.

«Prezıdent elordaǵa erekshe mindetter júktep otyr: Astana árdaıym aýqymdy bastamalardyń aldyńǵy shebinde bolyp, barlyq óńirge úlgi bolýǵa tıis. Elorda ınfraqurylym, ónerkásip, logıstıka, sıfrlyq sheshimder jáne áleýmettik sala baǵyttarynda damýdyń joǵary qarqynyn qalyptastyrýy qajet. Árbir joba qalanyń ekonomıkasyn nyǵaıtyp, jumys oryndaryn ashyp, azamattardyń ómir súrý sapasyn arttyryp, bıznes úshin jańa múmkindikterge jol ashýy mańyzdy. Sondyqtan ákimdik pen salalyq mınıstrlikterdiń mindeti – jobalardy súıemeldeýdi qamtamasyz etý, kásiporyndardy ýaqtyly iske qosý jáne óndiristerdiń turaqty júktelýine jaǵdaı jasaý», dedi Úkimet basshysy.