Túrkistan oblysynyń Arys qalasynda mas kúıinde jol talǵamaıtyn kólik júrgizip, bir top adamdy qaǵyp ketken áıel 2 aıǵa qamaýǵa alyndy. Oqıǵa ornynda 29 jastaǵy júkti áıel, onyń 2 jasar uly jáne kórshileriniń 5 jasar qyzy qaza tapqan. Taǵy 3 adam aýrýhanada jatyr, dep habarlaıdy Egemen.kz.
Ktk.kz málimetinshe, qaıǵyly oqıǵa senbi kúni keshke Arys qalasyndaǵy kóshelerdiń birinde bolǵan.
«JAC markaly avtokóliktiń júrgizýshisi alkogoldik masań kúıde birneshe adamdy qaǵyp, keıin oqıǵa ornynan jasyrynǵan. Jedel-izdestirý sharalary barysynda kúdikti anyqtalyp, ustalyp, ýaqytsha ustaý ızolıatoryna qamaldy» dep málimdedi oblystyń polısııa departamenti.
Eki eresek adam men bir jarym jasar bala dárigerlerdiń jiti qadaǵalaýynda. Bala jansaqtaý bóliminde jatyr.
«1 jas 6 aılyq bala jansaqtaý bólimine óte aýyr jaǵdaıda tústi. Oǵan mıdyń shaıqalýy, oń jaq kókirek qýysynyń kóptegen jabyq synyǵy, sol jaq san súıeginiń jabyq synyǵy jáne travmatıkalyq shok dıagnozy qoıyldy. Sábıdi oblystyq balalar aýrýhanasyna aýystyrdyq», delingen habarlamada.
Atalǵan fakti boıynsha tergeý amaldary júrgizilip jatyr.