Almatylyq oqýshylar dene shynyqtyrý sabaǵyn endi Almaty SuperSki kýrortynyń aýmaǵynda ótedi. Bul týraly Úkimet otyrysynda Kazakh Tourism Development LTD kompanııasynyń bas dırektory Erjan Erkinbaev málimdedi, dep habarlaıdy Egemen.kz.
Onyń aıtýynsha, jańa taý kýrortynda jalpy uzyndyǵy 60 shaqyrym bolatyn taý-shańǵy trassalary salynady. Kýrort kúnine 10 myńnan astam shańǵyshyny qabyldaı alady. Trassalardyń 70 paıyzy jasyl jáne kók sanatqa jatady, ıaǵnı balalar men shańǵy sportymen endi aınalysa bastaǵandarǵa qolaıly bolady.
«Joba aıasynda Almaty qalasynyń ákimdigimen birlesip, bolashaq kýrort aýmaǵynda mektep oqýshylaryna arnalǵan dene shynyqtyrý sabaqtaryn ótkizý máselesi qarastyrylyp jatyr. Bul tájirıbe Eýropanyń birqatar elinde keńinen qoldanylady. Máselen, Aýstrııada jyl saıyn 80 myńnan astam oqýshy mektep baǵdarlamasy aıasynda shańǵy sportymen aınalyssa, Shveısarııada 128 myńnan astam bala qysqy sporttyq-saýyqtyrý baǵdarlamalaryna qatysady. Fransııa men Italııada mektep oqýshylarynyń taý shańǵysy kýrorttaryna barýyn qoldaıtyn memlekettik baǵdarlamalar júzege asyrylady», dedi Erjan Erkinbaev.
Týrızmniń el ekonomıkasyna qosqan úlesi 5 trln teńgege jetti
Bolashaqta kýrort aýmaǵynda 11 zamanaýı aspaly jol salynbaq. Sol arqyly kelýshiler Medeý stansasynan Qumbel shyńyna deıin esh kedergisiz jete alady. Kompanııa basshynyń aıtýynsha, aspaly joldardyń qyzmetin zeınetkerler, balalar jáne múmkindigi shekteýli jandar úshin tegin etý josparlanyp otyr.
Aıta keteıik, Almaty SuperSki kýrorty 2028 jyldyń sońynda paıdalanýǵa berilmek. Buǵan deıin jobaǵa qatysty Almaty qalasynda qoǵamdyq tyńdalym ótip, týrıstik bastama kásipkerler, sarapshylar men turǵyndar tarapynan qoldaý tapqan bolatyn.